ਕਿਸਾਨਾਂ ਨੂੰ ਯੂਰੀਆ ਖਾਦ ਦੀ ਘਾਟ ਨਾਲ ਪਵੇਗਾ ਜੂਝਣਾ

ਬਠਿੰਡਾ, 24 ਅਗਸਤ : ਖੇਤੀਬਾੜੀ ਮੰਤਰਾਲੇ ਦੇ ਅੰਕੜਿਆਂ ਅਨੁਸਾਰ 1 ਅਗਸਤ 2025 ਨੂੰ ਦੇਸ਼ ਵਿਚ ਯੂਰੀਆ ਦਾ ਬੰਦ ਸਟਾਕ 37.19 ਲੱਖ ਟਨ ਸੀ, ਜੋ ਕਿ ਪਿਛਲੇ ਸਾਲ ਨਾਲੋਂ 49.24 ਲੱਖ ਟਨ ਘੱਟ ਹੈ। 1 ਅਗਸਤ, 2024 ਨੂੰ ਦੇਸ਼ ਵਿਚ ਯੂਰੀਆ ਦਾ ਬੰਦ ਸਟਾਕ 86.43 ਲੱਖ ਟਨ ਸੀ। ਇਸ ਤਰ੍ਹਾਂ ਯੂਰੀਆ ਦਾ ਸਟਾਕ ਪਿਛਲੇ ਸਾਲ ਦੇ ਮੁਕਾਬਲੇ ਅੱਧੇ ਤੋਂ ਵੀ ਘੱਟ ਹੈ। ਹਾਲ ਹੀ ਵਿਚ ਰਾਜਾਂ ਦੇ ਖੇਤੀਬਾੜੀ ਮੰਤਰੀਆਂ ਨੇ ਯੂਰੀਆ ਦੀ ਘਾਟ ਦਾ ਮੁੱਦਾ ਉਠਾਇਆ ਸੀ ਅਤੇ ਕੇਂਦਰ ਸਰਕਾਰ ਤੋਂ ਵਾਧੂ ਯੂਰੀਆ ਦੀ ਮੰਗ ਕੀਤੀ ਸੀ। ਇਹ ਜਾਣਕਾਰੀ ਦਿੰਦਿਆਂ ਭਾਰਤੀ ਕਿਸਾਨ ਯੂਨੀਅਨ ਲੱਖੋਵਾਲ ਟਿਕੈਤ ਦੇ ਸੂਬਾ ਜਨਰਲ ਸਕੱਤਰ ਸਰੂਪ ਸਿੰਘ ਰਾਮਾਂ ਨੇ ਦੱਸਿਆ ਕਿ ਦੂਜੇ ਪਾਸੇ ਅੰਤਰਰਾਸ਼ਟਰੀ ਬਾਜ਼ਾਰ ਵਿਚ ਯੂਰੀਆ ਦੀਆਂ ਕੀਮਤਾਂ ਵਿਚ ਵਾਧੇ ਕਾਰਨ ਦੇਸ਼ ਵਿਚ ਆਯਾਤ ਕੀਤੇ ਯੂਰੀਆ ਦੀ ਕੀਮਤ 530 ਡਾਲਰ ਪ੍ਰਤੀ ਟਨ ਤੱਕ ਪਹੁੰਚ ਗਈ ਹੈ, ਜੋ ਕਿ ਮਈ ਵਿਚ ਲਗਪਗ 400 ਡਾਲਰ ਸੀ। ਪਿਛਲੇ ਸਾਲ ਦੇ ਮੁਕਾਬਲੇ ਦੇਸ਼ ਵਿਚ ਯੂਰੀਆ ਦੇ ਸਟਾਕ ਵਿਚ ਭਾਰੀ ਗਿਰਾਵਟ ਆਈ ਹੈ। ਇਸ ਕਾਰਨ ਕਈ ਰਾਜਾਂ ਦੇ ਕਿਸਾਨ ਯੂਰੀਆ ਦੀ ਉਪਲੱਬਧਤਾ ਦੇ ਸੰਕਟ ਦਾ ਸਾਹਮਣਾ ਕਰ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਇਸ ਸਾਲ ਦੇਸ਼ ਵਿਚ ਬਿਹਤਰ ਮੌਨਸੂਨ ਕਾਰਨ ਸਾਉਣੀ ਦੀ ਬਿਜਾਈ ਰਿਕਾਰਡ ਖੇਤਰ ਵਿਚ ਕੀਤੀ ਗਈ ਹੈ। ਬਿਜਾਈ ਖੇਤਰ ਵਿਚ ਸਭ ਤੋਂ ਵੱਧ ਵਾਧਾ ਝੋਨਾ ਅਤੇ ਮੱਕੀ ਵਿਚ ਹੋਇਆ ਹੈ ਅਤੇ ਇਹ ਦੋਵੇਂ ਫਸਲਾਂ ਯੂਰੀਆ ਦੀ ਜ਼ਿਆਦਾ ਖਪਤ ਕਰਦੀਆਂ ਹਨ ਜਦੋਂ ਕਿ ਤੇਲ ਬੀਜ ਅਤੇ ਕੁਝ ਦਾਲਾਂ ਵਰਗੀਆਂ ਘੱਟ ਯੂਰੀਆ ਦੀ ਲੋੜ ਵਾਲੀਆਂ ਫਸਲਾਂ ਦਾ ਖੇਤਰ ਘੱਟ ਗਿਆ ਹੈ। ਇਸ ਸਥਿਤੀ ਨੇ ਯੂਰੀਆ ਦੀ ਮੰਗ ਵਧਾ ਦਿੱਤੀ ਹੈ ਜਦੋਂ ਕਿ ਦੇਸ਼ ਵਿਚ ਉਪਲੱਬਧ ਸਟਾਕ ਪਿਛਲੇ ਸਾਲ ਨਾਲੋਂ ਅੱਧਾ ਵੀ ਨਹੀਂ ਹੈ। ਇਸ ਕਾਰਨ ਕਈ ਰਾਜਾਂ ਦੇ ਕਿਸਾਨ ਯੂਰੀਆ ਲਈ ਲੰਬੀਆਂ ਲਾਈਨਾਂ ਵਿਚ ਦਿਖਾਈ ਦੇ ਰਹੇ ਹਨ ਕਿਉਂਕਿ ਇਸ ਸਮੇਂ ਉਨ੍ਹਾਂ ਲਈ ਯੂਰੀਆ ਦੀ ਉਪਲਬਧਤਾ ਮਹੱਤਵਪੂਰਨ ਹੈ। ਉਨ੍ਹਾਂ ਕਿਹਾ ਕਿ ਜਿੱਥੇ ਯੂਰੀਆ ਦੀ ਘਾਟ ਪਿੱਛੇ ਵਿਸ਼ਵਵਿਆਪੀ ਕੀਮਤਾਂ ਵਿਚ ਵਾਧਾ ਇਕ ਵੱਡਾ ਕਾਰਨ ਹੈ, ਉੱਥੇ ਚੀਨ ਵੱਲੋਂ ਭਾਰਤ ਨੂੰ ਯੂਰੀਆ ਨਿਰਯਾਤ ਨਾ ਕਰਨਾ ਵੀ ਇਕ ਕਾਰਨ ਹੈ। ਹਾਲਾਂਕਿ ਅਜਿਹੀਆਂ ਖ਼ਬਰਾਂ ਆ ਰਹੀਆਂ ਹਨ ਕਿ ਚੀਨ ਭਾਰਤ ਨੂੰ ਖਾਦ ਨਿਰਯਾਤ ‘ਤੇ ਪਾਬੰਦੀ ਹਟਾ ਰਿਹਾ ਹੈ। ਪਰ ਹੁਣ ਜੇਕਰ ਭਾਰਤ ਚੀਨ ਨਾਲ ਆਯਾਤ ਸੌਦੇ ਵੀ ਕਰਦਾ ਹੈ ਤਾਂ ਉੱਥੋਂ ਆਯਾਤ ਕੀਤੇ ਗਏ ਯੂਰੀਆ ਨੂੰ ਕਿਸਾਨਾਂ ਤਕ ਪਹੁੰਚਣ ਵਿਚ ਇਕ ਤੋਂ ਡੇਢ ਮਹੀਨੇ ਲੱਗਣਗੇ।