ਪਾਬੰਦੀ ਦੇ ਬਾਵਜੂਦ ਕਿਸਾਨਾਂ ਨੇ ਵੱਡੇ ਪੱਧਰ ‘ਤੇ ਬੀਜੀ ਪੂਸਾ 44 ਦੀ ਪਨੀਰੀ, ਖੇਤੀਬਾੜੀ ਵਿਭਾਗ ‘ਤੇ ਉੱਠੇ ਸਵਾਲ, ਕਿਸਾਨਾਂ ਵੱਲੋਂ ਪਨੀਰੀ ਬੀਜਣ ਮੌਕੇ ਕਿੱਥੇ ਸਨ ਅਧਿਕਾਰੀ

ਦੋਵੇ ਧਿਰਾਂ ਰਾਜੀ, ਸਰਕਾਰ ਅੜੀ

ਪੂਸਾ 44 ਝੋਨੇ ‘ਚ ਟੁੱਟ ਘੱਟ ਬਣਨ ਕਾਰਨ ਸ਼ੈਲਰ ਮਾਲਕ ਇਸ ਨੂੰ ਪਹਿਲ ਦੇ ਆਧਾਰ ’ਤੇ ਖਰੀਦਦੇ ਹਨ ਤੇ ਕਿਸਾਨ ਇਸ ਨੂੰ ਜਿਆਦਾ ਝਾੜ ਨਿਕਲਣ ਵਾਲੀ ਕਿਸਮ ਮੰਨ ਕੇ ਬੀਜਦੇ ਹਨ, ਪਰ ਝੋਨੇ ਦੀਆਂ ਜਿਹੜੀਆਂ ਕਿਸਮਾਂ ਸਰਕਾਰ ਕਿਸਾਨਾਂ ਨੂੰ ਬੀਜਣ ਲਈ ਕਹਿੰਦੀ ਹੈ ਉਸ ਨੂੰ ਸ਼ੈਲਰ ਮਾਲਕ ਖ਼ਰੀਦ ਕੇ ਖ਼ੁਸ਼ ਨਹੀਂ ਹਨ, ਕਿਉਂਕਿ ਉਸ ਝੋਨੇ ‘ਚ ਟੁੱਟ ਬਹੁਤ ਬਣਦੀ ਹੈ। ਇਹ ਕਿਸਮ ਜ਼ਿਆਦਾ ਸਮਾਂ ਲੈਣ ਕਰ ਕੇ ਪਾਣੀ ਬਹੁਤ ਲੈਂਦੀ ਹੈ, ਜਿਸ ਕਾਰਨ ਸਰਕਾਰ ਨੇ ਇਸ ਕਿਸਮ ਨੂੰ ਬੰਦ ਕੀਤਾ ਹੋਇਆ ਹੈ।

ਪੂਸਾ 44 ਪੰਜਾਬ ਨੂੰ ਡਾਰਕ ਜ਼ੋਨ ਤੋਂ ਅੱਗੇ ਮਾਰੂਥਲ ਬਣਾ ਦੇਵੇਗੀ

ਇਸ ਸਬੰਧੀ ਕਈ ਲੋਕਾਂ ਨੇ ਦੱਸਿਆ ਕਿ ਇਕ ਜੂਨ ਤੋਂ ਅਗੇਤਾ ਝੋਨਾ ਪੂਸਾ 44 ਹੀ ਲੱਗੇਗਾ, ਜੋ ਪਿਛਲੇ ਇਕ ਸਾਲ ਤੋਂ ਬੈਨ ਹੈ, ਇਹ ਝੋਨਾ ਪਾਣੀ ਦਾ ਦੁਸ਼ਮਣ ਹੈ। ਉਨ੍ਹਾਂ ਕਿਹਾ ਕਿ ਝੋਨੇ ਦੀ ਇਸ ਵਰਾਇਟੀ ਨੂੰ ਰੋਕਣ ਲਈ ਪੰਜਾਬ ਸਰਕਾਰ ਪੂਰੀ ਸਖ਼ਤੀ ਕਰੇ ਤਾਂ ਜੋ ਪਾਣੀ ਦੇ ਹੇਠਾਂ ਜਾ ਰਹੇ ਪੱਧਰ ਨੂੰ ਰੋਕਿਆ ਜਾ ਸਕੇ। ਉਨ੍ਹਾਂ ਕਿਹਾ ਕਿਸਾਨ ਘੱਟ ਸਮੇਂ ‘ਚ ਤਿਆਰ ਹੋਣ ਵਾਲੀਆਂ ਝੋਨੇ ਦੀਆਂ ਕਿਸਮਾਂ ਲਗਾਉਣ ਤਾਂ ਜੋ ਪਾਣੀ ਦੇ ਪੱਧਰ ਨੂੰ ਹੇਠਾਂ ਜਾਣ ਤੋਂ ਰੋਕਿਆ ਜਾ ਸਕੇ, ਜੇਕਰ ਕਿਸਾਨਾਂ ਵੱਲੋਂ ਪੂਸਾ 44 ਝੋਨਾ ਹੀ ਲਗਾਇਆ ਗਿਆ ਤਾਂ ਇਹ ਬਹੁਤ ਛੇਤੀ ਪੰਜਾਬ ਨੂੰ ਮਾਰੂਥਲ ਬਣਾ ਦੇਵੇਗਾ।

ਸਾਡੇ ਵੱਲੋਂ ਕਿਸਾਨਾਂ ਨੂੰ ਪਹਿਲਾਂ ਹੀ ਕੀਤਾ ਗਿਆ ਸੀ ਜਾਗਰੂਕ : ਡਾ. ਜਗਦੀਸ਼ ਸਿੰਘ

ਇਸ ਸਬੰਧੀ ਜਦੋਂ ਜ਼ਿਲ੍ਹਾ ਖੇਤੀਬਾੜੀ ਚੀਫ ਡਾ. ਜਗਦੀ••ਸ਼ ਸਿੰਘ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਖੇਤੀਬਾੜੀ ਵਿਭਾਗ ਵੱਲੋਂ ਕਿਸਾਨਾਂ ਨੂੰ ਪਹਿਲਾ ਹੀ ਸਪੱਸ਼ਟ ਕਰ ਦਿੱਤਾ ਗਿਆ ਸੀ ਕਿ ਵੱਧ ਸਮਾਂ ਲੈਣ ਵਾਲੀ ਪੂਸਾ 44 ਝੋਨੇ ਦੀ ਕਿਸਮ ‘ਤੇ ਸੂਬਾ ਸਰਕਾਰ ਵੱਲੋਂ ਪਾਬੰਦੀ ਲਾਈ ਹੋਈ ਹੈ ਤੇ ਇਸ ਸਬੰਧੀ ਕਿਸਾਨਾਂ ਨੂੰ ਜਾਗਰੂਕ ਵੀ ਕੀਤਾ ਗਿਆ ਸੀ। ਉਨ੍ਹਾਂ ਕਿਹਾ ਕਿ ਜਿਹੜੇ ਕਿਸਾਨਾਂ ਵੱਲੋਂ ਇਹ ਪਨੀਰੀ ਬੀਜੀ ਹੈ, ਉਨ੍ਹਾਂ ਵੱਲੋਂ ਇਸ ਦਾ ਬੀਜ ਪਹਿਲਾ ਹੀ ਆਪਣੇ ਘਰ ਰੱਖਿਆ ਹੋਇਆ ਸੀ। ਉਨ੍ਹਾਂ ਨੇ ਬਜ਼ਾਰ ‘ਚੋਂ ਨਹੀਂ ਲਿਆ। ਉਨ੍ਹਾਂ ਵੱਲੋਂ ਦੁਕਾਨਦਾਰਾਂ ’ਤੇ ਬਾਜ ਅੱਖ ਰੱਖੀ ਹੋਈ ਸੀ ਤਾਂ ਜੋ ਕੋਈ ਦੁਕਾਨਦਾਰ ਪੂਸਾ 44 ਦਾ ਬੀਜ ਨਾ ਵੇਚੇ। ਉਨ੍ਹਾਂ ਕਿਹਾ ਕਿ ਕਿਸਾਨ ਨੂੰ ਕਦੇ ਵੀ ਸਜ਼ਾ ਨਹੀਂ ਦਿੱਤੀ ਜਾ ਸਕਦੀ, ਸਿਰਫ ਸਮਝਾਇਆਂ ਹੀ ਜਾ ਸਕਦਾ ਹੈ। ਸੂਬਾ ਸਰਕਾਰ ਵੱਲੋਂ ਵੀ ਸਿਰਫ ਬੀਜ ਵਿਕਰੀ ’ਤੇ ਬੈਨ ਹੈ। ਇਹ ਕਿਸਮ ਕਦੇ ਵੀ ਫੇਲ੍ਹ ਹੋ ਸਕਦੀ ਹੈ। ਜ਼ਿਆਦਾ ਸਮਾਂ ਲੈਣ ਕਾਰਨ ਇਸ ’ਤੇ ਖਰਚ ਵੀ ਵੱਧ ਆਉਂਦਾ ਹੈ। ਕਿਸਾਨਾਂ ਨੂੰ ਤਬਦੀਲ ਹੋਣ ’ਤੇ ਸਮਾਂ ਲੱਗੇਗਾ, ਉਹ ਪ੍ਰੇਰਿਤ ਕਰਨ ’ਤੇ ਲੱਗੇ ਹੋਏ ਹਨ।