ਲੁਧਿਆਣਾ, 17 ਜਨਵਰੀ : ਆਪਣੀ ਭੈਣ ਨੂੰ ਪ੍ਰੇਸ਼ਾਨ ਕਰਨ ਵਾਲੇ ਤੇ ਭੜਕੇ ਭਰਾ ਨੇ ਆਪਣੇ ਦੋ ਦੋਸਤਾਂ ਨਾਲ ਮਿਲ ਕੇ ਛੇੜਖਾਨੀ ਕਰਨ ਵਾਲੇ ਨੂੰ ਕਤਲ ਕਰ ਦਿੱਤਾ। ਕਤਲ ਕਰਨ ਤੋਂ ਪਹਿਲਾਂ ਉਨ੍ਹਾਂ ਮਿੱਥੀ ਸਾਜਿਸ਼ ਤਹਿਤ ਉਸ ਨੂੰ ਆਪਣੇ ਘਰ ਬੁਲਾਇਆ ਅਤੇ ਸਿਰ ਤੇ ਰਾੜ ਮਾਰ ਕੇ ਕਤਲ ਕਰਨ ਮਗਰੋਂ ਲਾਸ਼ ਨੂੰ ਅੱਗ ਲੱਗਾ ਦਿੱਤੀ। ਸਬੂਤ ਮਿਟਾਉਣ ਲਈ ਸੜੀ ਹੋਈ ਲਾਸ਼ ਨੂੰ ਲਵਾਰਿਸ ਹਾਲਤ ’ਚ ਸੁੱਟ ਦਿੱਤਾ। 10 ਦਿਨ ਪਹਿਲਾਂ ਹੋਏ ਇਸ ਅੰਨ੍ਹੇ ਕਤਲ ਦੇ ਮਾਮਲੇ ਵਿੱਚ ਪੁਲਿਸ ਨੇ ਤਫਤੀਸ਼ ਸ਼ੁਰੂ ਕੀਤੀ ਤਾਂ ਕੜੀਆਂ ਜੋੜਦੇ ਹੋਏ ਕਾਤਲਾਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। ਸੀਆਈਏ ਸਮੇਤ ਫੋਰੈਂਸਿਕ ਅਤੇ ਹੋਰ ਟੀਮਾਂ ਵੱਲੋਂ ਸਾਂਝੇ ਤੌਰ ਤੇ ਕਾਰਵਾਈ ਕਰਦੇ ਹੋਏ ਪੁਲਿਸ ਨੇ ਮਰੇ ਵਿਅਕਤੀ ਦੀ ਸ਼ਨਾਖਤ ਗਿਆਸਪੁਰਾ ਦੇ ਰਹਿਣ ਵਾਲੇ ਸੰਜੇ ਸਿੰਘ ਦੇ ਰੂਪ ਵਿੱਚ ਕੀਤੀ। ਡੀਸੀਪੀ ਜਸ ਕਿਰਨਜੀਤ ਸਿੰਘ ਤੇਜਾ ਮੁਤਾਬਕ 5 ਜਨਵਰੀ ਨੂੰ ਥਾਣਾ ਮੇਹਰਬਾਨ ਦੇ ਇਲਾਕੇ ਵਿੱਚ ਇੱਕ ਬੀਆਬਾਨ ਪਲਾਟ ਤੋਂ ਲਵਾਰਿਸ ਹਾਲ ਲਾਸ਼ ਬਰਾਮਦ ਹੋਈ ਸੀ। ਕਤਲ ਕੀਤੇ ਗਏ ਵਿਅਕਤੀ ਨੂੰ ਦੋ ਹਿੱਸਿਆਂ ਵਿੱਚ ਵੱਢ ਕੇ ਲਾਸ਼ ਨੂੰ ਅੱਗ ਲਗਾ ਦਿੱਤੀ ਗਈ ਸੀ। ਪੁਲਿਸ ਲਈ ਸਭ ਤੋਂ ਅਹਿਮ ਸਵਾਲ ਮ੍ਰਿਤਕ ਦੀ ਸ਼ਨਾਖਤ ਕਰਨਾ ਸੀ ਅਤੇ ਲਾਸ਼ ਦੀ ਸ਼ਨਾਖਤ ਲਈ ਸਿਵਲ ਹਸਪਤਾਲ ਰਖਵਾ ਕੇ ਵੱਖ ਵੱਖ ਟੀਮਾਂ ਵੱਲੋਂ ਉਦਮ ਸ਼ੁਰੂ ਕੀਤਾ ਗਿਆ। ਬੀਤੇ ਦਿਨਾਂ ਵਿੱਚ ਆਸ ਪਾਸ ਦੇ ਇਲਾਕਿਆਂ ਤੋਂ ਗੁੰਮਸ਼ੁਦਾ ਵਿਅਕਤੀਆਂ ਦੀ ਸੂਚੀ ਤਿਆਰ ਕਰਕੇ ਜਾਂਚ ਅੱਗੇ ਵਧਾਈ ਗਈ ਤਾਂ ਪਤਾ ਲੱਗਾ ਕਿ ਲਗਭਗ ਇਸ ਉਮਰ ਦਾ ਹੀ ਇੱਕ ਵਿਅਕਤੀ ਥਾਣਾ ਸਾਹਨੇਵਾਲ ਅਧੀਨ ਇਲਾਕੇ ਵਿੱਚੋਂ 5 ਜਨਵਰੀ ਤੋਂ ਲਾਪਤਾ ਸੀ। ਗੁੰਮਸ਼ੁਦਾ ਦੇ ਪਰਿਵਾਰਿਕ ਮੈਂਬਰਾਂ ਵੱਲੋਂ ਥਾਣਾ ਸਾਨੇਵਾਲ ਪੁਲਿਸ ਕੋਲ ਇੱਕ ਗੁੰਮਸ਼ੁਦਗੀ ਵੀ ਦਰਜ ਕਰਵਾਈ ਗਈ ਸੀ। ਇਸ ਜਾਣਕਾਰੀ ਦੇ ਆਧਾਰ ਤੇ ਗੁੰਮਸ਼ੁਦਾ ਦੇ ਪਰਿਵਾਰਕ ਮੈਂਬਰਾਂ ਨੂੰ ਮੌਕੇ ਤੇ ਸੱਦ ਕੇ ਲਾਸ਼ ਵਿਖਾਈ ਗਈ ਤਾਂ ਮਰੇ ਵਿਅਕਤੀ ਦੀ ਸ਼ਨਾਖਤ ਕਰਦਿਆਂ ਪਰਿਵਾਰਿਕ ਮੈਂਬਰਾਂ ਨੇ ਦੱਸਿਆ ਕਿ ਲਾਸ਼ ਸੰਜੇ ਸਿੰਘ ਉਮਰ ਕਰੀਬ 42 ਸਾਲ ਦੀ ਹੈ। ਲਾਸ਼ ਦੀ ਸ਼ਿਨਾਖਤ ਹੋਣ ਮਗਰੋਂ ਪੁਲਿਸ ਨੇ ਜਾਂਚ ਦਾ ਦਾਇਰਾ ਵਧਾਇਆ ਅਤੇ ਆਸ ਪਾਸ ਲੱਗੇ ਸੀਸੀ ਟੀਵੀ ਕੈਮਰਿਆਂ ਦੀ ਫੁਟੇਜ ਦੇ ਆਧਾਰ ਤੇ ਕੁਝ ਸ਼ੱਕੀ ਵਿਅਕਤੀਆਂ ਨੂੰ ਘੇਰੇ ਅੰਦਰ ਲੈ ਕੇ ਪੜਤਾਲ ਸ਼ੁਰੂ ਕੀਤੀ। ਮਾਮਲੇ ਦੀ ਗਹਿਨ ਪੜਤਾਲ ਮਗਰੋਂ ਪੁਲਿਸ ਨੇ ਮੁੰਨਾ, ਰਜੇਸ਼ ਅਤੇ ਮੰਗਲ ਨਾਮ ਦੇ ਤਿੰਨ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰਕੇ ਉਨ੍ਹਾਂ ਦੇ ਕਬਜ਼ੇ ਵਿੱਚੋਂ ਕਤਲ ਵੇਲੇ ਇਸਤੇਮਾਲ ਕੀਤੀ ਗਈ ਲੋਹੇ ਦੀ ਰਾੜ, ਮੋਟਰਸਾਈਕਲ ਅਤੇ ਲਾਸ਼ ਸੁੱਟਣ ਲਈ ਵਰਤਿਆ ਗਿਆ ਰੇਹੜਾ ਵੀ ਬਰਾਮਦ ਕਰ ਲਿਆ।
ਗਿਆਸਪੁਰਾ ਇਲਾਕੇ ਵਿੱਚ ਕਤਲ ਕਰਕੇ ਮਿਹਰਬਾਨ ਸੁੱਟੀ ਲਾਸ਼
