ਗੈਂਗਸਟਰ ਨੇ ਪੁਲਿਸ ’ਤੇ ਗੱਡੀ ਚੜ੍ਹਾਈ, ਨਾਕਾ ਤੋੜ ਕੇ ਭੱਜਣ ਦੀ ਕੋਸ਼ਿਸ਼

ਖੰਨਾ, 14 ਅਕਤੂਬਰ : ਖੰਨਾ ਦੋਰਾਹਾ ’ਚ ਇਕ ਬੀ-ਸ਼੍ਰੇਣੀ ਦੇ ਗੈਂਗਸਟਰ ਨੇ ਪੁਲਿਸ ਤੇ ਗੱਡੀ ਚੜ੍ਹਾਉਣ ਦੀ ਕੋਸ਼ਿਸ਼ ਕੀਤੀ ਤੇ ਨਾਕਾ ਤੋੜ ਕੇ ਭੱਜਣ ਦੀ ਕੋਸ਼ਿਸ਼ ਕੀਤੀ। ਇਸ ਦੌਰਾਨ ਏਐੱਸਆਈ ਲਖਵਿੰਦਰ ਸਿੰਘ ਦੇ ਪੈਰ ’ਤੇ ਗੱਡੀ ਦਾ ਟਾਇਰ ਚੜ੍ਹ ਗਿਆ। ਇਸ ਘਟਨਾ ਦੇ ਬਾਅਦ ਪੁਲਿਸ ਨੇ ਗੈਂਗਸਟਰ ਰਘਵਿੰਦਰ ਸਿੰਘ ਉਰਫ਼ ਰਿੱਕੀ ਅਜਨੌਦ (ਦੋਰਾਹਾ) ਤੇ ਉਸ ਦੇ ਸਾਥੀ ਜਸਪ੍ਰੀਤ ਸਿੰਘ ਬੱਬੀ, ਜੋ ਕਿ ਸ਼ੇਰੋ (ਸੰਗਰੂਰ) ਦਾ ਵਾਸੀ ਹੈ, ਨੂੰ ਗ੍ਰਿਫ਼ਤਾਰ ਕਰ ਲਿਆ। ਇਨ੍ਹਾਂ ਦੇ ਕਬਜ਼ੇ ਤੋਂ 2 ਪਿਸਤੋਲ ਵੀ ਬਰਾਮਦ ਕੀਤੀਆਂ ਗਈਆਂ। ਇਨ੍ਹਾਂ ਦਾ ਤੀਜਾ ਸਾਥੀ ਸਿਮਰਨਜੀਤ ਸਿੰਘ ਮੰਡ, ਜੋ ਕਿ ਭੁੱਟੋਂ (ਡੇਹਲੋਂ) ਦਾ ਵਾਸੀ ਹੈ, ਹਨੇਰੇ ਦਾ ਫਾਇਦਾ ਉਠਾ ਕੇ ਫਰਾਰ ਹੋ ਗਿਆ। ਜਾਣਕਾਰੀ ਮੁਤਾਬਕ, ਦੋਰਾਹਾ ਥਾਣੇ ਦੇ ਏਐੱਸਆਈ ਸਤਪਾਲ ਸਿੰਘ ਸਮੇਤ ਪੁਲਿਸ ਦੀ ਟੀਮ ਸ਼ੱਕੀ ਵਿਅਕਤੀਆਂ ਦੀ ਚੈਕਿੰਗ ਕਰ ਰਹੀ ਸੀ, ਜਦਕਿ ਕੇਐੱਫਸੀ ਸਰਵਿਸ ਰੋਡ ਦੋਰਾਹਾ ’ਤੇ ਇਕ ਬਿਨਾ ਨੰਬਰ ਦੀ ਸਕਾਰਪੀਓ ਗੱਡੀ ਖੰਨਾ ਵੱਲੋਂ ਆਈ। ਇਸ ਨੂੰ ਏਐੱਸਆਈ ਸਤਪਾਲ ਸਿੰਘ ਨੇ ਟਾਰਚ ਨਾਲ ਰੁਕਣ ਦਾ ਇਸ਼ਾਰਾ ਕੀਤਾ। ਪੁਲਿਸ ਅਨੁਸਾਰ ਗੱਡੀ ਨੂੰ ਰਿੱਕੀ ਅਜਨੌਦ ਚਲਾ ਰਿਹਾ ਸੀ, ਜਿਸ ਨੇ ਗੱਡੀ ਰੋਕਣ ਦੀ ਬਜਾਏ ਪੁਲਿਸ ਤੇ ਚੜ੍ਹਾਉਣ ਦੀ ਕੋਸ਼ਿਸ਼ ਕੀਤੀ। ਨਾਕੇ ’ਤੇ ਮੌਜੂਦ ਪੁਲਿਸ ਕਰਮਚਾਰੀਆਂ ਨੇ ਆਪਣੀ ਜਾਨ ਬਚਾਈ। ਇਸ ਦੌਰਾਨ ਗੱਡੀ ਦਾ ਟਾਇਰ ਏਐੱਸਆਈ ਲਖਵਿੰਦਰ ਸਿੰਘ ਦੇ ਪੈਰ ’ਤੇ ਚੜ੍ਹ ਗਿਆ। ਪੁਲਿਸ ਨੇ ਤੁਰੰਤ ਗੱਡੀ ਨੂੰ ਘੇਰ ਲਿਆ। ਮੌਕੇ ’ਤੇ ਰਿੱਕੀ ਅਜਨੌਦ ਨੂੰ ਫੜ ਕਰ ਕੇ ਡੱਬ ਤੋਂ 32 ਬੋਰ ਦੀ ਪਿਸਤੋਲ ਤੇ 5 ਜਿੰਦਾ ਕਾਰਤੂਸ ਬਰਾਮਦ ਕੀਤੇ ਗਏ। ਜਸਪ੍ਰੀਤ ਸਿੰਘ ਤੋਂ 32 ਬੋਰ ਦੀ ਪਿਸਤੋਲ ਤੇ 11 ਜਿੰਦਾ ਕਾਰਤੂਸ ਬਰਾਮਦ ਹੋਏ। ਦੋਵੇਂ ਦੋਸ਼ੀ ਪੁਲਿਸ ਰਿਮਾਂਡ ਤੇ ਹਨ ਤੇ ਉਨ੍ਹਾਂ ਨਾਲ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਪੁਲਿਸ ਅਨੁਸਾਰ, ਰਿੱਕੀ ਅਜਨੌਦ ਇਕ ਬੀ-ਸ਼੍ਰੇਣੀ ਦਾ ਅਪਰਾਧੀ ਹੈ ਤੇ ਉਸ ਦੇ ਖ਼ਿਲਾਫ਼ ਪਹਿਲਾਂ ਵੀ ਕਈ ਕੇਸ ਦਰਜ ਹਨ।