ਜਲੰਧਰ, 15 ਸਤੰਬਰ : 10ਵੇਂ ਆਯੁਰਵੇਦ ਦਿਵਸ ਮੌਕੇ ਦਯਾਨੰਦ ਆਯੁਰਵੇਦਿਕ ਕਾਲਜ ਵੱਲੋਂ ਪਿੰਡ ਰਾਘਵਨ ਮਸੰਦਾ ’ਚ ਸਿਹਤ ਸਬੰਧੀ ਭਾਸ਼ਣ ਦਿੱਤਾ ਗਿਆ। ਕਾਲਜ ਦੇ ਡਾ. ਗਗਨ ਠਾਕੁਰ ਤੇ ਡਾ. ਪ੍ਰਿਯੰਕਾ ਨੇ ਪਿੰਡ ਰੰਧਾਵਾ ਮਸੰਦਾ ’ਚ ਆਯੁਰਵੇਦ ਦਿਵਸ ਦੇ ਮੌਕੇ ’ਤੇ ਆਮ ਲੋਕਾਂ ਨੂੰ ਆਯੁਰਵੇਦ ਦੀ ਮਹੱਤਤਾ, ਰੋਜ਼ਾਨਾ ਰੁਟੀਨ ਤੇ ਮੌਸਮੀ ਰੁਟੀਨ ਬਾਰੇ ਜਾਣਕਾਰੀ ਦਿੱਤੀ। ਲੈਕਚਰ ਦੌਰਾਨ ਸਰਪੰਚ ਕੁਲਦੀਪ ਕੌਰ ਤੇ ਡਾ. ਹੇਮੰਤ ਮਲਹੋਤਰਾ ਵੀ ਵਿਸ਼ੇਸ਼ ਤੌਰ ’ਤੇ ਮੌਜੂਦ ਸਨ। ਡਾ. ਪ੍ਰਿਯੰਕਾ ਨੇ ਸਰਕਾਰੀ ਪ੍ਰਾਇਮਰੀ ਸਕੂਲ ’ਚ ਵੀ ਭਾਸ਼ਣ ਦਿੱਤਾ ਤੇ ਵਿਦਿਆਰਥੀਆਂ ਨੂੰ ਸਿਹਤ ਤੇ ਭੋਜਨ ਦੀ ਮਹੱਤਤਾ ਬਾਰੇ ਦੱਸਿਆ। ਆਉਣ ਵਾਲੇ ਹਫ਼ਤੇ ਰੰਧਾਵਾ ’ਚ ਇਕ ਮੈਡੀਕਲ ਕੈਂਪ ਵੀ ਲਗਾਇਆ ਜਾਵੇਗਾ। ਲੈਕਚਰ ਦੌਰਾਨ, ਡਾ. ਅਮਨਦੀਪ, ਐੱਮਡੀ ਵਿਦਿਆਰਥੀ ਡਾ. ਸਿਮਰਨ ਤੇ ਬੀਏਐੱਮਐੱਸ (ਦੂਜੇ ਸਾਲ) ਦੇ ਵਿਦਿਆਰਥੀ ਅਨੁਭਵ, ਕੰਨਨ, ਇਤਿਸ਼ਾ ਤੇ ਪੱਲਵੀ ਵੀ ਮੌਜੂਦ ਸਨ ਤੇ ਪਿੰਡ ਵਾਸੀਆਂ ਨੂੰ ਆਯੁਰਵੇਦਿਕ ਜੜੀ-ਬੂਟੀਆਂ ਦੀ ਮਹੱਤਤਾ ਬਾਰੇ ਦੱਸਿਆ। ਪ੍ਰਿੰਸੀਪਲ ਡਾ. ਚੰਦਰਸ਼ੇਖਰ ਸ਼ਰਮਾ ਨੇ ਕਿਹਾ ਕਿ ਦਯਾਨੰਦ ਕਾਲਜ ਨਿਯਮਿਤ ਤੌਰ ’ਤੇ ਪਿੰਡ ਰੰਧਾਵਾ ਮਸੰਦਾ ’ਚ ਮੈਡੀਕਲ ਕੈਂਪ ਲਗਾਉਂਦਾ ਹੈ ਤੇ ਮਰੀਜ਼ਾਂ ਦਾ ਮੁਫ਼ਤ ਇਲਾਜ ਵੀ ਕਰਦਾ ਹੈ। ਆਯੁਰਵੇਦ ਦਿਵਸ ਮੌਕੇ ਉਨ੍ਹਾਂ ਸਾਰੇ ਪਿੰਡ ਵਾਸੀਆਂ ਨੂੰ 15-16 ਸਤੰਬਰ ਤੇ 19 ਸਤੰਬਰ ਨੂੰ ਲੱਗਣ ਵਾਲੇ ਮੈਡੀਕਲ ਕੈਂਪਾਂ ਦਾ ਲਾਭ ਉਠਾਉਣ ਲਈ ਕਿਹਾ ਤੇ ਸਰਪੰਚ ਕੁਲਦੀਪ ਕੌਰ ਦਾ ਧੰਨਵਾਦ ਕੀਤਾ।
