ਪ੍ਰੀਖਿਆ ਸਚਿਨ ਨੇ ਪਾਸ ਕੀਤੀ, ਨੌਕਰੀ ਨਵੀਨ ਨੂੰ…ਚੰਡੀਗੜ੍ਹ CTU ਕੰਡਕਟਰ ਭਰਤੀ ‘ਚ ਫਰਜ਼ੀਵਾੜਾ, ਬਾਇਓਮੈਟ੍ਰਿਕ ਜਾੰਚ ‘ਚ ਖੁੱਲ੍ਹੀ ਪੋਲ
ਜਸਵਿੰਦਰ ਸਿੰਘ ਸੰਧੂ
ਚੰਡੀਗੜ੍ਹ, 18 ਜੁਲਾਈ : ਦੋ ਸਾਲ ਪਹਿਲਾਂ ਸੀਟੀਯੂ ‘ਚ ਕੰਡਕਟਰ ਦੀ ਭਰਤੀ ਲਈ ਹੋਈ ਪ੍ਰੀਖਿਆ ‘ਚ ਗੜਬੜ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਸੈਕਟਰ-49 ਪੁਲਿਸ ਨੇ ਸੋਨੀਪਤ, ਹਰਿਆਣਾ ਨਿਵਾਸੀ ਨਵੀਨ ਤੇ ਸਚਿਨ ਨਾਂ ਦੇ ਇਕ ਸ਼ਖ਼ਸ ਖ਼ਿਲਾਫ਼ ਭਾਰਤੀ ਦੰਡਾਵਲੀ ਦੀ ਧਾਰਾ 419, 420, 120B ਤਹਿਤ ਕੇਸ ਦਰਜ ਕੀਤਾ ਹੈ। ਦੋਸ਼ਾਂ ਮੁਤਾਬਕ, ਨਵੀਨ ਨੇ ਸੀਟੀਯੂ ‘ਚ ਕੰਡਕਟਰ ਬਣਨ ਲਈ ਸਚਿਨ ਤੋਂ ਪ੍ਰੀਖਿਆ ਦਿਵਾਈ ਸੀ। ਇਸ ਤੋਂ ਇਲਾਵਾ, ਦਸਤਾਵੇਜ਼ਾਂ ਦੀ ਵੈਰੀਫਿਕੇਸ਼ਨ ਸਮੇਂ ਵੀ ਸਚਿਨ ਹੀ ਪਹੁੰਚਿਆ ਸੀ, ਜਿਸ ਕਾਰਨ ਇਹ ਮਾਮਲਾ ਸੀਟੀਯੂ ਦੀ ਪਕੜ ‘ਚ ਨਹੀਂ ਆਇਆ। ਸਚਿਨ ਨੇ ਭਰਤੀ ਪ੍ਰੀਖਿਆ ਪਾਸ ਕਰ ਲਈ, ਪਰ ਨਵੀਨ ਜੁੜਨ ਲਈ ਪਹੁੰਚਿਆ। ਉਸਨੇ ਲਗਪਗ 10 ਦਿਨਾਂ ਤਕ ਸੀਟੀਯੂ ‘ਚ ਕੰਡਕਟਰ ਦੇ ਤੌਰ ‘ਤੇ ਨੌਕਰੀ ਕੀਤੀ, ਪਰ ਇਸ ਦੌਰਾਨ ਵਿਭਾਗ ਨੂੰ ਇਸ ਗੜਬੜ ਦਾ ਪਤਾ ਲੱਗ ਗਿਆ। ਵਿਭਾਗ ਨੇ ਮੁਲਜ਼ਮ ਨੂੰ ਫੜਨ ਲਈ ਬਾਇਓਮੈਟ੍ਰਿਕ ਜਾਂਚ ਕਰਵਾਈ, ਜਿਸ ਵਿਚ ਨਵੀਨ ਫੜਿਆ ਗਿਆ।
ਦਿੱਲੀ ਪੁਲਿਸ ਤੋਂ ਜਾਣਕਾਰੀ ਮਿਲਣ ‘ਤੇ ਫੜਿਆ ਗਿਆ ਮਾਮਲਾ
ਦਿੱਲੀ ਪੁਲਿਸ ਨੇ ਕਿਸੇ ਭਰਤੀ ਪ੍ਰਕਿਰਿਆ ‘ਚ ਗੜਬੜ ਦੇ ਦੋਸ਼ਾਂ ‘ਤੇ ਸਚਿਨ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਉਸਨੇ ਪੁੱਛਗਿੱਛ ਦੌਰਾਨ ਚੰਡੀਗੜ੍ਹ ‘ਚ ਨਵੀਨ ਦੀ ਥਾਂ ਪੇਪਰ ਦੇਣ ਦੀ ਗੱਲ ਵੀ ਸਵੀਕਾਰ ਕੀਤੀ। ਇਸ ਸੰਦਰਭ ‘ਚ ਦਿੱਲੀ ਪੁਲਿਸ ਨੇ ਚੰਡੀਗੜ੍ਹ ਟ੍ਰਾਂਸਪੋਰਟ ਵਿਭਾਗ ਨੂੰ ਜਾਣਕਾਰੀ ਭੇਜੀ। ਦਿੱਲੀ ਪੁਲਿਸ ਤੋਂ ਜਾਣਕਾਰੀ ਮਿਲਣ ‘ਤੇ ਟ੍ਰਾਂਸਪੋਰਟ ਵਿਭਾਗ ਨੇ ਜਾਂਚ ਸ਼ੁਰੂ ਕੀਤੀ ਤੇ 2023 ਵਿਚ ਭਰਤੀ ਹੋਏ ਸਾਰੇ ਕੰਡਕਟਰਾਂ ਦੀ ਬਾਇਓਮੈਟ੍ਰਿਕ ਜਾਂਚ ਕਰਵਾਈ। ਇਸ ਦੌਰਾਨ ਨਵੀਨ ਫੜਿਆ ਗਿਆ।
