ਸਮਝ ਨਹੀਂ ਆ ਰਹੀ, ਪੁੱਤਰ ਦੇ ਮੁੜਨ ਦਾ ਜਸ਼ਨ ਜਾਂ ਕਰਜ਼ੇ ਦਾ ਸੋਗ ਮਨਾਈਏ; 15 ਦਿਨ ਪਹਿਲਾਂ ਅਮਰੀਕਾ ਪਹੁੰਚਿਆ, ਕੀਤਾ ਡਿਪੋਰਟ

ਅੰਮ੍ਰਿਤਸਰ, 16 ਫਰਵਰੀ- ਮੈਨੂੰ ਸਮਝ ਨਹੀਂ ਆ ਰਿਹਾ ਕਿ ਮੈਨੂੰ ਆਪਣੇ ਪੁੱਤਰ ਦੇ ਆਉਣ ਦਾ ਜਸ਼ਨ ਮਨਾਉਣਾ ਚਾਹੀਦਾ ਹੈ ਜਾਂ ਕਰਜ਼ੇ ’ਚ ਡੁੱਬੇ ਹੋਣ ਦੇ ਦਰਦ ਨੂੰ ਜ਼ਾਹਰ ਕਰਨਾ ਚਾਹੀਦਾ ਹੈ। ਇਹ ਸਾਡੇ ਲਈ ਚੰਗੀ ਖ਼ਬਰ ਹੈ ਕਿ ਸਾਡਾ ਪੁੱਤਰ ਸੁਰੱਖਿਅਤ ਵਾਪਸ ਆ ਗਿਆ ਹੈ ਪਰ ਅਸੀਂ ਕਰਜ਼ਾ ਕਿਵੇਂ ਲਾਹਾਂਗੇ, ਇਹ ਚਿੰਤਾ ਦਾ ਵਿਸ਼ਾ ਹੈ। ਇਹ ਕਹਿੰਦੇ ਹੋਏ ਬਲਵਿੰਦਰ ਕੌਰ ਦੀਆਂ ਅੱਖਾਂ ਭਰ ਗਈਆਂ। ਅਮਰੀਕਾ ਤੋਂ ਡਿਪੋਰਟ ਕੀਤੇ ਗਏ ਭਾਰਤੀਆਂ ਵਿਚ ਰਾਜਾਸਾਂਸੀ ਵਿਧਾਨ ਸਭਾ ਹਲਕੇ ਦੇ ਪਿੰਡ ਭੁੱਲਰ ਦਾ ਨੌਜਵਾਨ ਗੁਰਜਿੰਦਰ ਸਿੰਘ ਵੀ ਸ਼ਾਮਲ ਹੈ। ਉਹ ਗਰੀਬੀ ਦੂਰ ਕਰਨ ਲਈ ਘਰੋਂ ਬਾਹਰ ਨਿਕਲਿਆ ਸੀ। ਗੁਰਜਿੰਦਰ ਇਕ ਟ੍ਰੈਵਲ ਏਜੰਟ ਰਾਹੀਂ ਵਿਦੇਸ਼ ਗਿਆ ਸੀ, ਨੂੰ ਨਹੀਂ ਪਤਾ ਸੀ ਕਿ ਉਸ ਨੂੰ ਗੈਰ-ਕਾਨੂੰਨੀ ਢੰਗ ਨਾਲ ਭੇਜਿਆ ਜਾ ਰਿਹਾ ਹੈ। ਕਈ ਮਹੀਨੇ ਭਟਕਣ ਤੋਂ ਬਾਅਦ, ਉਹ ਅਮਰੀਕਾ ਪਹੁੰਚ ਗਿਆ ਅਤੇ ਫਿਰ ਫੜਿਆ ਗਿਆ। ਗੁਰਜਿੰਦਰ ਦੀ ਮਾਂ ਬਲਵਿੰਦਰ ਕੌਰ ਨੇ ਦੱਸਿਆ ਕਿ ਉਸ ਦੇ ਪਤੀ ਦੀ ਮੌਤ ਹੋ ਚੁੱਕੀ ਹੈ। ਬਾਰ੍ਹਵੀਂ ਜਮਾਤ ਪਾਸ ਕਰਨ ਤੋਂ ਬਾਅਦ ਪੁੱਤਰ ਘਰ ਦੀ ਗਰੀਬੀ ਮਿਟਾਉਣ ਲਈ ਵਿਦੇਸ਼ ਚਲਾ ਗਿਆ। ਟ੍ਰੈਵਲ ਏਜੰਟ ਨੇ ਪੰਜਾਹ ਲੱਖ ਰੁਪਏ ਲਏ। ਅਸੀਂ ਜ਼ਮੀਨ ਵੇਚ ਦਿੱਤੀ ਅਤੇ ਕਰਜ਼ਾ ਵੀ ਲਿਆ। ਆਪਣਾ ਦੇਸ਼ ਛੱਡਣ ਤੋਂ ਬਾਅਦ ਗੁਰਜਿੰਦਰ ਇਕ ਸਾਲ ਤੱਕ ਭਟਕਦਾ ਰਿਹਾ। ਕਦੇ ਜੰਗਲ ’ਚ ਰਹਿੰਦਾ ਸੀ ਅਤੇ ਕਦੇ ਫੁੱਟਪਾਥ ‘ਤੇ। ਪੰਦਰਾਂ ਦਿਨ ਪਹਿਲਾਂ ਉਹ ਕਿਸੇ ਤਰ੍ਹਾਂ ਅਮਰੀਕਾ ’ਚ ਦਾਖਲ ਹੋਇਆ ਪਰ ਸਥਾਨਕ ਪੁਲਿਸ ਨੇ ਉਸ ਨੂੰ ਫੜ ਲਿਆ। ਅੱਜ ਮੈਨੂੰ ਪਤਾ ਲੱਗਾ ਕਿ ਉਸ ਨੂੰ ਵਾਪਸ ਭੇਜਿਆ ਜਾ ਰਿਹਾ ਹੈ। ਪੰਜਾਬ ਸਰਕਾਰ ਨੂੰ ਬੇਨਤੀ ਕਰਦੀ ਹਾਂ ਕਿ ਮੇਰੇ ਪੁੱਤਰ ਲਈ ਨੌਕਰੀ ਦਾ ਪ੍ਰਬੰਧ ਕੀਤਾ ਜਾਵੇ ਤਾਂ ਜੋ ਮੈਂ ਕਰਜ਼ਾ ਚੁਕਾ ਸਕਾਂ ਅਤੇ ਆਪਣੀਆਂ ਧੀਆਂ ਦਾ ਵਿਆਹ ਕਰਵਾ ਸਕਾਂ।