ਕਿਓਆਰ ਕੋਡ ਰਾਹੀਂ ਡਿਜੀਟਲ ਭੁਗਤਾਨ ਅਤੇ ਯੂਟੀਐੱਸ ਆਨ ਮੋਬਾਈਲ ਐਪ ਰਾਹੀਂ ਟਿਕਟਿੰਗ ਲਈ ਇੱਕ ਵਿਸ਼ੇਸ਼ ਮੁਹਿੰਮ ਚਲਾਈ ਗਈ

ਫਿਰੋਜ਼ਪੁਰ, 7 ਫਰਵਰੀ (ਬਾਲ ਕਿਸ਼ਨ)- ਫਿਰੋਜ਼ਪੁਰ ਡਿਵੀਜ਼ਨ ਦੇ ਸਾਰੇ ਮੁੱਖ ਰੇਲਵੇ ਸਟੇਸ਼ਨਾਂ ’ਤੇ ‘‘ਕਿਓਆਰ ਕੋਡ ਰਾਹੀਂ ਡਿਜੀਟਲ ਭੁਗਤਾਨ’’ ਅਤੇ ‘‘ਯੂਟੀਐੱਸ ਆਨ ਮੋਬਾਈਲ’’ ਐਪ ਰਾਹੀਂ ਟਿਕਟਿੰਗ ਲਈ ਇੱਕ ਵਿਸ਼ੇਸ਼ ਮੁਹਿੰਮ ਚਲਾਈ ਗਈ। ਜਿਸ ਵਿੱਚ ਰੇਲਵੇ ਯਾਤਰੀਆਂ ਨੂੰ ਜਾਗਰੂਕ ਕੀਤਾ ਗਿਆ ਕਿ ਉਹ ਰਿਜ਼ਰਵਡ/ਗੈਰ-ਰਿਜ਼ਰਵਡ ਟਿਕਟ ਕਾਊਂਟਰਾਂ ’ਤੇ ਸਥਾਪਤ ਕਿਓਆਰ ਕੋਡ ਡਿਸਪਲੇ ਮਸ਼ੀਨ ਰਾਹੀਂ ਸਧਾਰਨ ਡਿਜੀਟਲ ਭੁਗਤਾਨ ਕਰਕੇ ਆਪਣੀਆਂ ਯਾਤਰਾ ਟਿਕਟਾਂ ਪ੍ਰਾਪਤ ਕਰ ਸਕਦੇ ਹਨ। ਇਸ ਤੋਂ ਇਲਾਵਾ, ਰੇਲਵੇ ਯਾਤਰੀਆਂ ਨੂੰ ‘‘ਯੂਟੀਐਸ ਆਨ ਮੋਬਾਈਲ’’ ਐਪ ਰਾਹੀਂ ਅਣਰਾਖਵੀਂ ਯਾਤਰਾ ਟਿਕਟਾਂ, ਪਲੇਟਫਾਰਮ ਟਿਕਟਾਂ ਅਤੇ ਮਾਸਿਕ ਸੀਜ਼ਨ ਟਿਕਟਾਂ ਖਰੀਦਣ ਲਈ ਜਾਗਰੂਕ ਕੀਤਾ ਗਿਆ ਅਤੇ ਉਨ੍ਹਾਂ ਦੇ ਮੋਬਾਈਲ ਫੋਨਾਂ ਵਿੱਚ ‘‘ਯੂਟੀਐਸ ਆਨ ਮੋਬਾਈਲ’’ ਐਪ ਸਥਾਪਤ ਕੀਤੀ ਗਈ। ਰੇਲਵੇ ਯਾਤਰੀ ਡਿਜੀਟਲਾਈਜ਼ੇਸ਼ਨ ਦੀ ਵਰਤੋਂ ਕਰਕੇ ਸਰਲ ਭੁਗਤਾਨ ਕਰਕੇ ਆਪਣੀਆਂ ਯਾਤਰਾ ਟਿਕਟਾਂ ਪ੍ਰਾਪਤ ਕਰ ਸਕਦੇ ਹਨ। ਯਾਤਰੀਆਂ ਨੂੰ ਟਿਕਟ ਕਾਊਂਟਰ ’ਤੇ ਨਕਦੀ ਲੈ ਕੇ ਜਾਣ ਦੀ ਪ੍ਰੇਸ਼ਾਨੀ ਤੋਂ ਰਾਹਤ ਮਿਲੇਗੀ, ਉਹ ਕਿਓਆਰ ਕੋਡ ਰਾਹੀਂ ਡਿਜੀਟਲ ਭੁਗਤਾਨ ਕਰਕੇ ਆਸਾਨੀ ਨਾਲ ਆਪਣੀਆਂ ਟਿਕਟਾਂ ਪ੍ਰਾਪਤ ਕਰ ਸਕਦੇ ਹਨ। ਕਿਓਆਰ ਕੋਡ ਡਿਵਾਈਸਾਂ ਰਾਹੀਂ ਨਕਦ ਲੈਣ-ਦੇਣ ਸਰਲ, ਸੁਰੱਖਿਅਤ ਅਤੇ ਪਾਰਦਰਸ਼ੀ ਹਨ। ਉਨ੍ਹਾਂ ਨੂੰ ਲਾਈਨਾਂ ਵਿੱਚ ਨਹੀਂ ਖੜ੍ਹਨਾ ਪਵੇਗਾ, ਜਿਸ ਨਾਲ ਸਮਾਂ ਵੀ ਬਚੇਗਾ। ਇਹ ਮੁਹਿੰਮ ਅੰਮ੍ਰਿਤਸਰ, ਲੁਧਿਆਣਾ, ਜਲੰਧਰ ਸ਼ਹਿਰ, ਜਲੰਧਰ ਛਾਉਣੀ, ਫਿਰੋਜ਼ਪੁਰ ਛਾਉਣੀ, ਬਿਆਸ, ਫਾਜ਼ਿਲਕਾ, ਫਰੀਦਕੋਟ, ਫਗਵਾੜਾ, ਫਿਲੌਰ, ਕਪੂਰਥਲਾ, ਮੋਗਾ ਅਤੇ ਹੋਰ ਰੇਲਵੇ ਸਟੇਸ਼ਨਾਂ ’ਤੇ ਚਲਾਈ ਗਈ। ਸੀਨੀਅਰ ਡਿਵੀਜ਼ਨਲ ਕਮਰਸ਼ੀਅਲ ਮੈਨੇਜਰ ਪਰਮਦੀਪ ਸਿੰਘ ਸੈਣੀ ਨੇ ਦੱਸਿਆ ਕਿ ਭਾਰਤੀ ਰੇਲਵੇ ਵਿੱਚ ਯਾਤਰੀਆਂ ਨੂੰ ਡਿਜੀਟਲਾਈਜ਼ੇਸ਼ਨ ਦੀ ਸਹੂਲਤ ਪ੍ਰਦਾਨ ਕੀਤੀ ਜਾ ਰਹੀ ਹੈ। ਕਿਓਆਰ ਕੋਡ ਤਕਨਾਲੋਜੀ ਰਾਹੀਂ ਨਕਦੀ ਰਹਿਤ ਲੈਣ-ਦੇਣ ਦੀ ਸਹੂਲਤ ਵਧਾਈ ਜਾ ਰਹੀ ਹੈ। ਮੋਬਾਈਲ ’ਤੇ ਕਿਓਆਰ ਕੋਡ ਅਤੇ ਯੂਟੀਐੱਸ ਰਾਹੀਂ ਭੁਗਤਾਨ ਲੈਣ-ਦੇਣ ਵਿੱਚ ਘੱਟ ਸਮਾਂ ਲੱਗਦਾ ਹੈ, ਇਸ ਤਰ੍ਹਾਂ ਯਾਤਰੀਆਂ ਨੂੰ ਜਲਦੀ ਅਤੇ ਆਸਾਨੀ ਨਾਲ ਟਿਕਟਾਂ ਮਿਲਦੀਆਂ ਹਨ।