ਅੰਮ੍ਰਿਤਸਰ, 6 ਦਸੰਬਰ : ਅਜਨਾਲਾ ਦੇ ਕਯਾਮ ਇਲਾਕੇ ਵਿੱਚ ਪਿਤਾ ਨੇ ਝਗੜੇ ਦੌਰਾਨ ਆਪਣੇ ਪੁੱਤਰ ਦਾ ਕਤਲ ਕਰ ਦਿੱਤਾ। ਘਰ ਵਿੱਚ ਮਾਮੂਲੀ ਗੱਲ ਨੂੰ ਲੈ ਕੇ ਵਿਵਾਦ ਹੋਇਆ ਸੀ। ਪੁਲਿਸ ਨੇ ਸਿਮਰਜੰਗ ਦੀ ਲਾਸ਼ ਕਬਜ਼ੇ ਵਿੱਚ ਲੈ ਕੇ ਪੋਸਟਮਾਰਟਮ ਕਰਵਾਉਣ ਮਗਰੋਂ ਵਾਰਸਾਂ ਨੂੰ ਸੌਂਪ ਦਿੱਤੀ ਹੈ। ਇਸ ਦੌਰਾਨ, ਅਜਨਾਲਾ ਥਾਣੇ ਦੀ ਪੁਲਿਸ ਨੇ ਹਰਪਾਲ ਸਿੰਘ ਅਤੇ ਸੁਖਜੀਤ ਕੌਰ ਖਿਲਾਫ ਕੇਸ ਦਰਜ ਕਰ ਲਿਆ ਹੈ। ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਇਹ ਕਾਰਵਾਈ ਦਾਦੇ ਕਸ਼ਮੀਰ ਸਿੰਘ ਦੀ ਸ਼ਿਕਾਇਤ ‘ਤੇ ਕੀਤੀ ਗਈ ਹੈ। ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ ਸ਼ੁੱਕਰਵਾਰ ਸ਼ਾਮ ਨੂੰ ਪਿਓ ਹਰਪਾਲ ਸਿੰਘ ਅਤੇ ਪੁੱਤ ਸਿਮਰਜੰਗ ਵਿਚਾਲੇ ਘਰ ਵਿੱਚ ਝਗੜਾ ਸ਼ੁਰੂ ਹੋ ਗਿਆ ਸੀ। ਪੋਤੇ ਸਿਮਰਜੰਗ ਨੇ ਪਿਤਾ ‘ਤੇ ਡੰਡਿਆਂ ਨਾਲ ਹਮਲਾ ਕਰ ਦਿੱਤਾ ਸੀ। ਦੋਵੇਂ ਇੱਕ ਦੂਜੇ ਨਾਲ ਬੁਰੀ ਤਰ੍ਹਾਂ ਭਿੜੇ ਹੋਏ ਸਨ। ਪਰਿਵਾਰ ਦੇ ਹੋਰ ਲੋਕ ਝਗੜਾ ਸੁਲਝਾਉਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਇਸੇ ਦੌਰਾਨ ਹਰਪਾਲ ਸਿੰਘ ਨੇ ਇੱਕ ਇੱਟ ਫੜ੍ਹ ਕੇ ਸਿਮਰਜੰਗ ਦੇ ਸਿਰ ‘ਤੇ ਚਾਰ-ਪੰਜ ਵਾਰ ਵਾਰ ਕੀਤਾ। ਮੌਕੇ ‘ਤੇ ਹੀ ਸਿਮਰਜੰਗ ਦੀ ਮੌਤ ਹੋ ਗਈ।
