ਆਪਣੇ ਬੁੱਤ ਦੇਖ ਕੇ ਭਾਵੁਕ ਹੋ ਗਏ ਸੁਨੀਲ ਗਾਵਸਕਰ

ਨਵੀਂ ਦਿੱਲੀ, 24 ਅਗਸਤ : ਮੁੰਬਈ ਦੇ ਵਾਨਖੇੜੇ ਸਟੇਡੀਅਮ ਵਿੱਚ ਭਾਰਤੀ ਟੀਮ ਦੇ ਸਾਬਕਾ ਕਪਤਾਨ ਅਤੇ ਮਹਾਨ ਬੱਲੇਬਾਜ਼ ਸੁਨੀਲ ਗਾਵਸਕਰ ਦੇ ਬੁੱਤ ਦਾ ਉਦਘਾਟਨ ਕੀਤਾ ਗਿਆ। ਗਾਵਸਕਰ ਦਾ ਇਹ ਬੁੱਤ ਐਮਸੀਏ ਦੇ ਸ਼ਰਦ ਪਵਾਰ ਕ੍ਰਿਕਟ ਅਜਾਇਬ ਘਰ ਵਿੱਚ ਸਥਾਪਿਤ ਕੀਤਾ ਗਿਆ ਹੈ ਜੋ ਸਟੇਡੀਅਮ ਵਿੱਚ ਬਣਾਇਆ ਗਿਆ ਹੈ। ਗਾਵਸਕਰ ਦੇ ਬੁੱਤ ਦਾ ਉਦਘਾਟਨ ਬੀਸੀਸੀਆਈ ਦੇ ਸਾਬਕਾ ਪ੍ਰਧਾਨ ਸ਼ਰਦ ਪਵਾਰ ਦੀ ਮੌਜੂਦਗੀ ਵਿੱਚ ਕੀਤਾ ਗਿਆ। ਗਾਵਸਕਰ ਦਾ ਕਾਂਸੀ ਦਾ ਬਣਿਆ ਬੁੱਤ ਅਜਾਇਬ ਘਰ ਦੇ ਬਾਹਰ ਲਗਾਇਆ ਗਿਆ ਹੈ। ਇਹ ਅਜਾਇਬ ਘਰ ਅਜੇ ਆਮ ਲੋਕਾਂ ਲਈ ਖੁੱਲ੍ਹਾ ਨਹੀਂ ਹੈ। ਇਸ ਨੂੰ 22 ਸਤੰਬਰ ਤੋਂ ਆਮ ਲੋਕਾਂ ਲਈ ਖੋਲ੍ਹ ਦਿੱਤਾ ਜਾਵੇਗਾ। ਗਾਵਸਕਰ ਨੂੰ ਭਾਰਤ ਦੇ ਮਹਾਨ ਬੱਲੇਬਾਜ਼ਾਂ ਵਿੱਚ ਗਿਣਿਆ ਜਾਂਦਾ ਹੈ ਅਤੇ ਇਹ ਬੁੱਤ ਉਨ੍ਹਾਂ ਦੀਆਂ ਪ੍ਰਾਪਤੀਆਂ ਨੂੰ ਸ਼ਰਧਾਂਜਲੀ ਵਜੋਂ ਲਗਾਇਆ ਗਿਆ ਹੈ।

ਗਾਵਸਕਰ ਹੋਏ ਭਾਵੁਕ

ਗਾਵਸਕਰ ਆਪਣੇ ਬੁੱਤ ਦੇ ਉਦਘਾਟਨ ਮੌਕੇ ਭਾਵੁਕ ਹੋ ਗਏ। ਗਾਵਸਕਰ ਨੇ ਕਿਹਾ, “ਮੇਰੇ ਕੋਲ ਆਪਣੀਆਂ ਭਾਵਨਾਵਾਂ ਨੂੰ ਪ੍ਰਗਟ ਕਰਨ ਲਈ ਸ਼ਬਦ ਨਹੀਂ ਹਨ, ਕਿਉਂਕਿ ਮੈਂ ਇਸ ਵਿਸ਼ੇਸ਼ ਸਨਮਾਨ ਤੋਂ ਬਹੁਤ ਪ੍ਰਭਾਵਿਤ ਹਾਂ। ਇਹ ਹਰ ਕਿਸੇ ਨਾਲ ਨਹੀਂ ਹੁੰਦਾ। ਇਹ ਬੁੱਤ ਅਜਾਇਬ ਘਰ ਦੇ ਬਾਹਰ ਹੈ ਅਤੇ ਬਹੁਤ ਸਾਰੇ ਲੋਕ ਇੱਥੇ ਆਉਂਦੇ-ਜਾਂਦੇ ਹਨ।” ਇਸ ਦੌਰਾਨ ਗਾਵਸਕਰ ਨੇ ਆਪਣੇ ਕਰੀਅਰ ਵਿੱਚ ਐਮਸੀਏ ਦੇ ਯੋਗਦਾਨ ਦੀ ਪ੍ਰਸ਼ੰਸਾ ਕੀਤੀ। ਗਾਵਸਕਰ ਨੇ ਕਿਹਾ ਕਿ ਉਨ੍ਹਾਂ ਦੇ ਕਰੀਅਰ ਨੂੰ ਬਣਾਉਣ ਵਿੱਚ ਐਮਸੀਏ ਦੀ ਭੂਮਿਕਾ ਇੱਕ ਮਾਂ ਵਰਗੀ ਰਹੀ ਹੈ। ਉਨ੍ਹਾਂ ਕਿਹਾ, “ਮੈਂ ਇਹ ਪਹਿਲਾਂ ਵੀ ਕਿਹਾ ਹੈ ਕਿ ਐਮਸੀਏ ਮੇਰੀ ਮਾਂ ਵਰਗਾ ਹੈ। ਇਸ ਨੇ ਮੇਰਾ ਹੱਥ ਫੜਿਆ ਸੀ ਜਦੋਂ ਮੈਂ ਆਪਣਾ ਕਰੀਅਰ ਸ਼ੁਰੂ ਕਰ ਰਿਹਾ ਸੀ ਅਤੇ ਬੰਬਈ ਵਿੱਚ ਸਕੂਲ ਕ੍ਰਿਕਟ ਖੇਡ ਰਿਹਾ ਸੀ। ਇਸ ਤੋਂ ਬਾਅਦ ਰਣਜੀ ਟਰਾਫੀ ਅਤੇ ਫਿਰ ਅੱਗੇ ਦਾ ਕਰੀਅਰ। ਮੁੰਬਈ ਲਈ ਖੇਡਣਾ ਇੱਕ ਵਰਦਾਨ ਵਾਂਗ ਹੈ। ਮੈਂ ਕਦੇ ਨਹੀਂ ਸੋਚਿਆ ਸੀ ਕਿ ਮੈਂ ਇਹ ਕਰ ਸਕਾਂਗਾ।”