ਪੰਜਾਬ ਦਾ ਸਭ ਤੋਂ ਛੋਟਾ 0.94 ਇੰਚ ਦਾ ਕੁਰਾਨ-ਏ-ਸ਼ਰੀਫ, 150 ਸਾਲਾਂ ਤੋਂ ਮਰਿਆਦਾ ਨਾਲ ਸੰਭਾਲ ਰਹੀ ਸੂਦ ਪਰਿਵਾਰ ਦੀ ਚੌਥੀ ਪੀੜ੍ਹੀ
ਕਪੂਰਥਲਾ, 6 ਅਗਸਤ : ਪੰਜਾਬ ਦੇ ਇੱਕ ਪਰਿਵਾਰ ਨੇ 150 ਸਾਲ ਪੁਰਾਣੀ ਵਿਰਾਸਤ ਨੂੰ ਸੰਭਾਲਿਆ ਹੋਇਆ ਹੈ। ਜ਼ਿਲ੍ਹਾ ਕਪੂਰਥਲਾ ਦੇ ਇਸ ਹਿੰਦੂ ਪਰਿਵਾਰ ਕੋਲ ਸਭ ਤੋਂ ਛੋਟਾ 0.78 ਇੰਚ ਦਾ ਪਵਿੱਤਰ ਕੁਰਾਨ-ਏ-ਸ਼ਰੀਫ ਹੈ ਜਿਸ ਦੀ ਦੇਖਭਾਲ ਪੁਰਖਿਆਂ ਦੀ ਪਰੰਪਰਾ ਅਨੁਸਾਰ ਚੌਥੀ ਪੀੜ੍ਹੀ ਕਰ ਰਹੀ ਹੈ। ਸਭ ਤੋਂ ਛੋਟਾ ਹੋਣ ਦੇ ਨਾਲ-ਨਾਲ ਇਸ ਵਿੱਚ ਲਿਖੀਆਂ ਆਇਤਾਂ ਬਹੁਤ ਬਾਰੀਕ ਹਨ, ਜਿਨ੍ਹਾਂ ਨੂੰ ਪੜ੍ਹਨ ਲਈ ਲੈਂਜ਼ ਦੀ ਮਦਦ ਦੀ ਲੋੜ ਹੁੰਦੀ ਹੈ। ਇਸ ਦੀ ਵਿਸ਼ੇਸ਼ਤਾ ਇਹ ਹੈ ਕਿ ਇਹ ਅਰਬੀ ਭਾਸ਼ਾ ਵਿੱਚ ਲਿਖਿਆ ਗਿਆ ਹੈ। ਇੱਕ ਵਾਰ ਤਾਂ ਦੁਬਈ ਦੇ ਸ਼ੇਖ ਨੇ ਇਸ ਪਵਿੱਤਰ ਗ੍ਰੰਥ ਦੇ ਬਦਲੇ ਦੁਬਈ ਆਉਣ ਅਤੇ ਦੋ ਕਰੋੜ ਲੈਣ ਦੀ ਪੇਸ਼ਕਸ਼ ਵੀ ਕੀਤੀ ਸੀ ਪਰ ਹਿੰਦੂ ਸੂਦ ਪਰਿਵਾਰ ਦੀ ਚੌਥੀ ਪੀੜ੍ਹੀ ਦੇ ਸੰਜੀਵ ਕੁਮਾਰ ਸੂਦ ਨੇ ਪੈਸਿਆਂ ਵੱਲ ਧਿਆਨ ਨਾ ਦੇ ਕੇ ਪੁਰਖਿਆਂ ਦੀ ਪਰੰਪਰਾ ਨੂੰ ਬਚਾਉਣ ਦਾ ਫੈਸਲਾ ਕੀਤਾ। ਦੂਰ-ਦੁਰਾਡੇ ਤੋਂ ਲੋਕ ਇਸ ਕੁਰਾਨ-ਏ-ਸ਼ਰੀਫ਼ ਨੂੰ ਮੱਥਾ ਟੇਕਣ ਲਈ ਆਉਂਦੇ ਰਹਿੰਦੇ ਹਨ ਅਤੇ ਇਹ ਪਰੰਪਰਾ ਅਜੇ ਵੀ ਜਾਰੀ ਹੈ। ਵਿਸ਼ੇਸ਼ ਗੱਲਬਾਤ ਵਿੱਚ ਕਪੂਰਥਲਾ ਦੇ ਮੁਹੱਬਤ ਨਗਰ ਦੇ ਵਸਨੀਕ 56 ਸਾਲਾ ਸੰਜੀਵ ਕੁਮਾਰ ਸੂਦ ਨੇ ਦੱਸਿਆ ਕਿ ਲਗਪਗ 150 ਸਾਲ ਪਹਿਲਾਂ ਕਪੂਰਥਲਾ ਰਿਆਸਤ ਦੇ ਰਾਜ ਦੌਰਾਨ ਉਨ੍ਹਾਂ ਦੇ ਪੜਦਾਦਾ ਹਰਬੰਸ ਲਾਲ ਸੂਦ ਨੂੰ ਕਪੂਰਥਲਾ ਦੇ ਤਤਕਾਲੀ ਮਹਾਰਾਜਾ ਤੋਂ ਉੱਕਰੀ ਹੋਈ ਤਿੰਨ ਸੈਂਟੀਮੀਟਰ ਦੇ ਡੱਬੇ ਵਿੱਚ ਬਹੁਤ ਹੀ ਛੋਟਾ ਕੁਰਾਨ-ਏ-ਸ਼ਰੀਫ਼ ਮਿਲਿਆ ਸੀ। ਉਨ੍ਹਾਂ ਨੇ ਇਸ ਨੂੰ ਮਾਣ-ਸਤਿਕਾਰ ਨਾਲ ਸੰਭਾਲਿਆ ਅਤੇ ਫਿਰ ਇਸ ਨੂੰ ਆਪਣੇ ਦਾਦਾ ਜਸਵੰਤ ਰਾਏ ਸੂਦ ਨੂੰ ਸੌਂਪ ਦਿੱਤਾ। ਉਨ੍ਹਾਂ ਦੱਸਿਆ ਕਿ ਕਪੂਰਥਲਾ ਦੇ ਮਹਾਰਾਜਾ ਨੇ ਉਨ੍ਹਾਂ ਦੇ ਦਾਦਾ ਜੀ ਨੂੰ ਰਾਏ ਦਾ ਖਿਤਾਬ ਦਿੱਤਾ ਸੀ, ਉਹ ਉਸ ਸਮੇਂ ਪੜ੍ਹਾਉਣ ਲਈ ਰਿਆਸਤ ਜਾਂਦੇ ਸਨ। ਫਿਰ ਇਹ ਪਰੰਪਰਾ ਉਨ੍ਹਾਂ ਦੇ ਪਿਤਾ ਸ਼ਿਵ ਦਰਸ਼ਨ ਸੂਦ ਨੂੰ ਸੌਂਪੀ ਗਈ ਅਤੇ 65 ਸਾਲ ਦੀ ਉਮਰ ਵਿੱਚ ਉਨ੍ਹਾਂ ਦੀ ਮੌਤ ਤੋਂ ਬਾਅਦ ਉਹ ਇਸ ਵਿਰਾਸਤ ਨੂੰ ਅੱਗੇ ਵਧਾ ਰਹੇ ਹਨ।
