ਸ਼ਿਮਲਾ, 13 ਜੁਲਾਈ : ਸ਼ਿਮਲਾ ਜ਼ਿਲ੍ਹੇ ਦੇ ਨੇਰਵਾ ਤੋਂ ਲਗਪਗ 15 ਕਿਲੋਮੀਟਰ ਦੂਰ ਨੇਰਵਾ ਫੇਡਿਜ਼ ਬ੍ਰਿਜ ਰੋਡ ‘ਤੇ ਟੰਡੋਰੀ ਅਤੇ ਬਾਥਲ ਵਿਚਕਾਰ ਇੱਕ ਸੜਕ ਹਾਦਸਾ ਵਾਪਰਿਆ ਹੈ। ਇੱਥੇ ਸ਼ਨੀਵਾਰ ਦੇਰ ਸ਼ਾਮ ਨੂੰ ਪੰਜਾਬ ਨੰਬਰ ਵਾਲੀ ਇੱਕ ਸਕਾਰਪੀਓ ਸ਼ਾਲਵੀ ਨਦੀ ਵਿੱਚ ਡਿੱਗ ਗਈ। ਇਸ ਹਾਦਸੇ ਵਿੱਚ ਦੋ ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦੋਂ ਕਿ ਇੱਕ 10 ਸਾਲਾ ਬੱਚਾ ਲਾਪਤਾ ਹੈ। ਪੁਲਿਸ ਅਤੇ ਸਥਾਨਕ ਲੋਕਾਂ ਵੱਲੋਂ ਬੱਚੇ ਨੂੰ ਲੱਭਣ ਲਈ ਤਲਾਸ਼ੀ ਮੁਹਿੰਮ ਸ਼ੁਰੂ ਕੀਤੀ ਗਈ ਹੈ ਪਰ ਹੁਣ ਤੱਕ ਉਸ ਦਾ ਕੋਈ ਸੁਰਾਗ ਨਹੀਂ ਮਿਲਿਆ ਹੈ। ਇਹ ਖਦਸ਼ਾ ਹੈ ਕਿ ਬੱਚਾ ਨਦੀ ਦੇ ਤੇਜ਼ ਵਹਾਅ ਵਿੱਚ ਵਹਿ ਗਿਆ ਹੋ ਸਕਦਾ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ, ਇਹ ਲੋਕ ਨੇਰਵਾ ਵਿੱਚ ਇੱਕ ਸਤਸੰਗ ਵਿੱਚ ਹਿੱਸਾ ਲੈਣ ਆਏ ਸਨ। ਉਨ੍ਹਾਂ ਦੀ ਕਾਰ ਸੜਕ ਤੋਂ ਉਤਰ ਗਈ ਤੇ ਨੇਰਵਾ ਤੋਂ 15 ਕਿਲੋਮੀਟਰ ਦੂਰ ਨਦੀ ਵਿੱਚ ਡਿੱਗ ਗਈ।
ਮ੍ਰਿਤਕਾਂ ‘ਚ ਇੱਕ ਸ਼ਿਮਲਾ ਦਾ ਰਹਿਣ ਵਾਲਾ ਸੀ ਤੇ ਦੂਜਾ ਪੰਜਾਬ ਦਾ
ਕਾਰ ਵਿੱਚ ਕੁੱਲ ਚਾਰ ਲੋਕ ਅਤੇ ਇੱਕ ਬੱਚਾ ਸੀ। ਚਾਰਾਂ ਨੂੰ ਇੱਥੋਂ ਨੇਰਵਾ ਹਸਪਤਾਲ ਲਿਜਾਇਆ ਗਿਆ, ਜਦੋਂ ਕਿ ਬੱਚੇ ਦਾ ਕੋਈ ਸੁਰਾਗ ਨਹੀਂ ਮਿਲ ਸਕਿਆ। ਨੇਰਵਾ ਹਸਪਤਾਲ ਵਿੱਚ ਦੋ ਲੋਕਾਂ ਦੀ ਮੌਤ ਹੋ ਗਈ। ਮ੍ਰਿਤਕਾਂ ਦੀ ਪਛਾਣ ਕੁਮਾਰ ਸੁਚੇਤ ਨਿਵਾਸੀ ਤਹਿਸੀਲ ਨੇਰਵਾ ਜ਼ਿਲ੍ਹਾ ਸ਼ਿਮਲਾ, ਗੁਰਮੇਲ ਲਾਲ ਜ਼ਿਲ੍ਹਾ ਨਵਾਂਸ਼ਹਿਰ ਪੰਜਾਬ ਵਜੋਂ ਹੋਈ ਹੈ।
ਦੋਵੇਂ ਜ਼ਖਮੀ ਨਵਾਂਸ਼ਹਿਰ ਦੇ ਵਸਨੀਕ ਹਨ
ਜ਼ਖਮੀਆਂ ਦੀ ਪਛਾਣ 35 ਸਾਲਾ ਬਲਵਿੰਦਰ ਪਤਨੀ ਹਰਬੰਸ ਲਾਲ ਪਿੰਡ ਬੜਮਾਜਰਾ, ਨਵਾਂਸ਼ਹਿਰ ਪੰਜਾਬ, 32 ਸਾਲਾ ਕੇਸ਼ਵ ਕੁਮਾਰ ਪੁੱਤਰ ਨਰਿੰਦਰ ਕੁਮਾਰ ਪਿੰਡ ਬੰਗਾ ਨਵਾਂਸ਼ਹਿਰ ਪੰਜਾਬ ਵਜੋਂ ਹੋਈ ਹੈ। ਕਾਰ ਸੜਕ ਤੋਂ ਲਗਪਗ 80 ਤੋਂ 100 ਮੀਟਰ ਹੇਠਾਂ ਸਿੱਧੀ ਸ਼ਾਲਵੀ ਨਦੀ ਵਿੱਚ ਡਿੱਗ ਗਈ।
ਨਦੀ ਦਾ ਤੇਜ਼ ਵਹਾਅ ਖੋਜ ਕਾਰਜ ‘ਚ ਰੁਕਾਵਟ ਪੈਦਾ ਕਰ ਰਿਹਾ ਹੈ।
ਬਲਵਿੰਦਰ ਦਾ ਪੁੱਤਰ, ਜਿਸ ਦੀ ਉਮਰ 10 ਸਾਲ ਦੱਸੀ ਜਾ ਰਹੀ ਹੈ, ਹਾਦਸੇ ਦੌਰਾਨ ਪਾਣੀ ਵਿੱਚ ਵਹਿ ਗਿਆ। ਪੁਲਿਸ ਅਤੇ ਹੋਰ ਲੋਕਾਂ ਦੁਆਰਾ ਨਦੀ ਦੇ ਦੋਵੇਂ ਪਾਸੇ ਉਸ ਦੀ ਲਗਾਤਾਰ ਭਾਲ ਕੀਤੀ ਜਾ ਰਹੀ ਹੈ ਪਰ ਨਦੀ ਦਾ ਪਾਣੀ ਦਾ ਪੱਧਰ ਉੱਚਾ ਹੋਣ ਕਾਰਨ ਉਸ ਦਾ ਕੋਈ ਸੁਰਾਗ ਨਹੀਂ ਮਿਲਿਆ ਹੈ। ਥਾਣਾ ਇੰਚਾਰਜ ਆਪਣੀ ਪੁਲਿਸ ਟੀਮ ਅਤੇ ਸਥਾਨਕ ਲੋਕਾਂ ਨਾਲ ਮੌਕੇ ‘ਤੇ ਮੌਜੂਦ ਹੈ।
URL Copied
