ਟੋਇਆ ਪੁੱਟਦੇ ਕੁੱਤੇ ਨੇ ਬਾਹਰ ਕੱਢ ਲਈ ਬੱਚੀ ਦੀ ਲਾਸ਼, ਨੋਚਦਾ ਰਿਹਾ ਬੱਚੀ ਦੀ ਲਾਸ਼

ਲੁਧਿਆਣਾ, 25 ਮਈ- ਸਥਾਨਕ ਲਕਸ਼ਮਣ ਨਗਰ ਇਲਾਕੇ ’ਚ ਉਸ ਵੇਲੇ ਦਹਿਸ਼ਤ ਦਾ ਮਾਹੌਲ ਬਣ ਗਿਆ, ਜਦੋਂ ਅਵਾਰਾ ਕੁੱਤੇ ਨੇ ਗਲੀ ਨੰਬਰ 3 ਵਿਚ ਟੋਇਆ ਪੱਟ ਕੇ ਮਾਸੂਮ ਬੱਚੀ ਦੀ ਲਾਸ਼ ਬਾਹਰ ਕੱਢ ਦਿੱਤੀ ਤੇ ਲਾਸ਼ ਨੂੰ ਕਈ ਥਾਵਾਂ ਤੋਂ ਨੋਚ ਦਿੱਤਾ। ਹੈਵਾਨੀਅਤ ਭਰੀ ਇਸ ਘਟਨਾ ਨੂੰ ਦੇਖਦੇ ਹੋਏ ਆਲੇ-ਦੁਆਲੇ ਦੇ ਲੋਕਾਂ ਨੇ ਕੁੱਤਾ ਭਜਾ ਦਿੱਤਾ ਤੇ ਫਿਰ ਤੇ ਥਾਣਾ ਡਾਬਾ ਦੀ ਪੁਲਿਸ ਨੂੰ ਸੂਚਨਾ ਦਿੱਤੀ। ਮੌਕੇ ’ਤੇ ਪਹੁੰਚੀ ਪੁਲਿਸ ਨੇ ਬੱਚੀ ਦੀ ਲਾਸ਼ ਨੂੰ ਕਬਜ਼ੇ ਵਿਚ ਲੈ ਕੇ ਸਿਵਲ ਹਸਪਤਾਲ ਦੀ ਮੋਰਚਰੀ ’ਚ ਪੋਸਟਮਾਰਟਮ ਲਈ ਰਖਵਾ ਦਿੱਤੀ ਹੈ। ਲਾਸ਼ ਨੂੰ ਦੇਖ ਕੇ ਇੰਝ ਜਾਪ ਰਿਹਾ ਹੈ ਕਿ ਬੱਚੀ ਦਾ ਜਨਮ ਕੁਝ ਸਮਾਂ ਪਹਿਲਾਂ ਹੀ ਹੋਇਆ ਹੋਵੇਗਾ। ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਗਲੀ ਨੰ. 3 ਵਿਚ ਅਵਾਰਾ ਕੁੱਤੇ ਨੇ ਉੱਥੇ ਟੋਇਆ ਪੁੱਟਣਾ ਸ਼ੁਰੂ ਕੀਤਾ ਸੀ। ਕੁਝ ਸਮੇਂ ਬਾਅਦ ਕੁੱਤੇ ਨੇ ਮਾਸੂਮ ਬੱਚੀ ਦੀ ਲਾਸ਼ ਬਾਹਰ ਕੱਢ ਲਈ। ਓਧਰ ਇਸ ਮਾਮਲੇ ’ਚ ਐੱਸਐੱਚਓ ਗੁਰਦਿਆਲ ਸਿੰਘ ਨੇ ਦੱਸਿਆ ਕਿ ਮੁੱਢਲੀ ਪੜਤਾਲ ਦੌਰਾਨ ਸਾਹਮਣੇ ਆਇਆ ਹੈ ਕਿ ਇਹ ਟੋਇਆ ਜਾਣ-ਬੁੱਝ ਕੇ ਪੱਟਿਆ ਗਿਆ ਸੀ। ਕਿਸੇ ਵਿਅਕਤੀ ਨੇ ਟੋਇਆ ਪੁੱਟ ਕੇ ਬੱਚੀ ਦੀ ਲਾਸ਼ ਦਫਨਾ ਦਿੱਤੀ ਸੀ, ਜਦੋਂ ਅਵਾਰਾ ਕੁੱਤਾ ਟੋਇਆ ਪੱਟ ਰਿਹਾ ਸੀ ਤਾਂ ਲੋਕਾਂ ਦੀ ਨਜ਼ਰ ਅਚਾਨਕ ਪੈ ਗਈ। ਬੱਚੀ ਦੇ ਸਰੀਰ ਦੀਆਂ ਕਈ ਥਾਵਾਂ ’ਤੇ ਕੁੱਤੇ ਦੇ ਕੱਟਣ ਦੇ ਨਿਸ਼ਾਨ ਸਨ।