ਰਾਜ ਸੂਚਨਾ ਕਮਿਸ਼ਨਰ ਹਰਪ੍ਰੀਤ ਸੰਧੂ ਨੇ ਬਣਾਈ ਗੁਰਦੁਆਰਾ ਸ੍ਰੀ ਦਰਬਾਰ ਸਾਹਿਬ, ਤਰਨ ਤਾਰਨ ਸਾਹਿਬ ਬਾਰੇ ਦਸਤਾਵੇਜ਼ੀ

ਅੰਮ੍ਰਿਤਸਰ, 27 ਮਾਰਚ-ਗੁਰਦੁਆਰਾ ਸ੍ਰੀ ਦਰਬਾਰ ਸਾਹਿਬ, ਤਰਨਤਾਰਨ ਸਾਹਿਬ ਦੇ ਪਵਿੱਤਰ ਦ੍ਰਿਸ਼ਾਂ ਨੂੰ ਦਰਸਾਉਂਦੀ ਇੱਕ ਮਨਮੋਹਕ ਦਸਤਾਵੇਜ਼ੀ ਹਰਪ੍ਰੀਤ ਸੰਧੂ ਰਾਜ ਸੂਚਨਾ ਕਮਿਸ਼ਨਰ ਪੰਜਾਬ ਨੇ ਤਿਆਰ ਕੀਤੀ ਹੈ। ਜਿਸ ਵਿਚ ਚੜਦੇ ਸੂਰਜ ਵੇਲੇ ਦੇ ਦ੍ਰਿਸਾਂ ਨੂੰ ਦਰਸਾਇਆ ਗਿਆ ਹੈ। ਇਸ ਨੂੰ ਇਸ ਸਥਾਨ ਦੀ ਅਧਿਆਤਮਿਕ ਅਤੇ ਇਤਿਹਾਸਕ ਮਹੱਤਤਾ ਨੂੰ ਉਜਾਗਰ ਕਰਨ ਦੇ ਉਦੇਸ਼ ਨਾਲ ਤਿਆਰ ਕੀਤਾ ਗਿਆ ਹੈ। ਇਹ ਦਸਤਾਵੇਜ਼ੀ ਪਵਿੱਤਰ ਸਰੋਵਰ ਵਿਚ ਪਵਿੱਤਰ ਅਸਥਾਨ ਦੇ ਪਰਛਾਵੇਂ ਨਾਲ ਦਿਨ ਦੇ ਸ਼ੁਰੂਆਤੀ ਘੰਟਿਆਂ ਦੀ ਝਲਕ ਨੂੰ ਸੁੰਦਰਤਾ ਨਾਲ ਪ੍ਰਦਰਸ਼ਿਤ ਕਰਦੀ ਹੈ, ਜੋ ਇਸ ਧਾਰਮਿਕ ਅਸਥਾਨ ਨਾਲ ਜੁੜੇ ਅਟੁੱਟ ਵਿਸ਼ਵਾਸ ਦਾ ਪ੍ਰਤੀਕ ਹੈ। ਇਹ ਦਸਤਾਵੇਜ਼ੀ ਫਿਲਮ ਦਰਸ਼ਕਾਂ ਨੂੰ ਸ਼ਾਨਦਾਰ ਆਰਕੀਟੈਕਚਰ, ਗੁੰਬਦਾਂ, ਪਵਿੱਤਰ ਅਸਥਾਨ ਦੇ ਅੰਦਰ ਬਣੇ ਬੇਮਿਸਾਲ ਕਲਾਕ੍ਰਿਤੀਆਂ, ਗੁਰੂ ਅਰਜਨ ਦੇਵ ਜੀ ਦੀ ਵਿਰਾਸਤ ਤੇ ਇਸ ਪਵਿੱਤਰ ਸਥਾਨ ਵਿੱਚ ਸਥਾਪਿਤ ਚਾਰ ਪਰੰਪਰਾਗਤ ਦਰਵਾਜ਼ਿਆਂ ਦੇ ਕਾਰੀਗਰੀ ਅਜੂਬੇ ਰਾਹੀਂ ਇੱਕ ਦ੍ਰਿਸ਼ਟੀਗਤ ਅਤੇ ਅਧਿਆਤਮਿਕ ਯਾਤਰਾ ਤੇ ਲੈ ਜਾਂਦੀ ਹੈ ਜੋ ਸਿੱਖ ਸ਼ਰਧਾ ਅਤੇ ਸੇਵਾ ਦੇ ਪ੍ਰਕਾਸ਼ ਵਜੋਂ ਦਰਸਾਈ ਗਈ ਹੈ। ਇਹ ਦਸਤਾਵੇਜ਼ੀ ਨਾ ਸਿਰਫ਼ ਤਰਨਤਾਰਨ ਸਾਹਿਬ ਦੀ ਧਾਰਮਿਕ ਸ਼ਾਨ ਨੂੰ ਉਜਾਗਰ ਕਰਦੀ ਹੈ ਬਲਕਿ ਇਸ ਦੀ ਅਮੀਰ ਸੱਭਿਆਚਾਰਕ ਵਿਰਾਸਤ ਤੇ ਵੀ ਜ਼ੋਰ ਦਿੰਦੀ ਹੈ। ਜੋ ਸ਼ਰਧਾਲੂਆਂ ਅਤੇ ਇਤਿਹਾਸਕਾਰ ਦੋਵਾਂ ਨੂੰ ਆਕਰਸ਼ਿਤ ਕਰਦੀ ਹੈ। ਹਰਪ੍ਰੀਤ ਸੰਧੂ ਰਾਜ ਸੂਚਨਾ ਕਮਿਸ਼ਨਰ ਪੰਜਾਬ ਨੇ ਦੱਸਿਆ ਕਿ ਤਰਨਤਾਰਨ ਮੇਰਾ ਜਨਮ ਸਥਾਨ ਹੈ ਅਤੇ ਇਹ ਮੇਰੇ ਵੱਲੋਂ ਇੱਕ ਨਿਮਾਣੀ ਕੋਸ਼ਿਸ਼ ਹੈ। ਜਿਸਦਾ ਉਦੇਸ਼ ਤਰਨਤਾਰਨ ਸਾਹਿਬ ਦੇ ਸਿੱਖ ਇਤਿਹਾਸ, ਸ਼ਰਧਾ ਅਤੇ ਅਧਿਆਤਮਿਕ ਪਵਿੱਤਰਤਾ ਨੂੰ ਦਰਸਾਉਣਾ ਹੈ।