ਅੰਮ੍ਰਿਤਸਰ, 11 ਜਨਵਰੀ: ਪਾਕਿਸਤਾਨ ਦੀ ਪੰਜਾਬ (ਲਾਹੌਰ) ਹਾਈ ਕੋਰਟ ਨੇ ਸਰਬਜੀਤ ਕੌਰ ਉਰਫ਼ ਨੂਰ ਫਾਤਿਮਾ ਮਾਮਲੇ ਵਿੱਚ ਸਖ਼ਤ ਰੁਖ਼ ਅਖਤਿਆਰ ਕੀਤਾ ਹੈ। ਅਦਾਲਤ ਨੇ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਦੀ ਕੈਬਨਿਟ, ਘੱਟ ਗਿਣਤੀ ਮਾਮਲਿਆਂ ਦੇ ਮੰਤਰੀ, ਐਫਆਈਏ (FIA) ਦੇ ਡੀਜੀ, ਪੰਜਾਬ ਪੁਲਿਸ ਦੇ ਆਈਜੀ, ਈਟੀਪੀਬੀ (ETPB) ਤੇ ਹੋਰ ਉੱਚ ਅਧਿਕਾਰੀਆਂ ਨੂੰ ਦੋ ਹਫ਼ਤਿਆਂ ਦੇ ਅੰਦਰ ਵਿਸਤ੍ਰਿਤ ਰਿਪੋਰਟ ਪੇਸ਼ ਕਰਨ ਦਾ ਹੁਕਮ ਦਿੱਤਾ ਹੈ। ਰਿਪੋਰਟ ਵਿੱਚ ਇਹ ਦੱਸਿਆ ਜਾਵੇ ਕਿ ਸਰਬਜੀਤ ਸਿੱਖ ਜੱਥੇ ਤੋਂ ਕਿਵੇਂ ਵੱਖ ਹੋਈ, ਉਸ ਦੀ ਦੇਸ਼ ਨਿਕਾਲੇ (ਡਿਪੋਰਟੇਸ਼ਨ) ਦੀ ਸਥਿਤੀ ਕੀ ਹੈ, ਉਸ ਨੂੰ ਕਾਨੂੰਨੀ ਤੌਰ ‘ਤੇ ਕਿਸ ਦੇ ਹਵਾਲੇ ਕੀਤਾ ਗਿਆ ਅਤੇ ਜਿਨ੍ਹਾਂ ਪੁਲਿਸ ਅਧਿਕਾਰੀਆਂ ਦੀ ਲਾਪਰਵਾਹੀ ਰਹੀ, ਉਨ੍ਹਾਂ ਖ਼ਿਲਾਫ਼ ਕੀ ਕਾਰਵਾਈ ਕੀਤੀ ਗਈ। ਇਸ ਦੇ ਨਾਲ ਹੀ, ਯਾਤਰਾ ਵੀਜ਼ੇ ਦੀ ਦੁਰਵਰਤੋਂ ਕਾਰਨ ਸਿੱਖ ਭਾਈਚਾਰੇ ਨੂੰ ਹੋਏ ਨੁਕਸਾਨ ਦਾ ਵੇਰਵਾ ਵੀ ਮੰਗਿਆ ਗਿਆ ਹੈ।
ਸਰਬਜੀਤ ਕੌਰ ਦੇ ਵਿਆਹ ਦੀ ਵੀਡੀਓ ਆਈ ਸੀ ਸਾਹਮਣੇ
ਸਰਬਜੀਤ ਕੌਰ, ਜਿਸ ਨੇ ਲਾਹੌਰ ਦੇ ਨਾਸਿਰ ਹੁਸੈਨ ਨਾਲ ਵਿਆਹ ਕਰਕੇ ਇਸਲਾਮ ਕਬੂਲ ਕੀਤਾ ਤੇ ਆਪਣਾ ਨਾਂ ਨੂਰ ਫਾਤਿਮਾ ਰੱਖਿਆ, ਫਿਲਹਾਲ ਲਾਹੌਰ ਦੇ ‘ਦਾਰੁਲ ਅਮਾਨ’ ਵਿੱਚ ਰੱਖੀ ਗਈ ਹੈ। ਮੈਡੀਕਲ ਟੀਮ ਨੇ ਉਸ ਦੀ ਸਿਹਤ ਨੂੰ ਠੀਕ ਦੱਸਿਆ ਹੈ, ਪਰ ਪਾਕਿਸਤਾਨ ਦੀ ਗ੍ਰਹਿ ਮੰਤਰਾਲੇ ਨੇ ਅਜੇ ਤੱਕ ਉਸ ਨੂੰ ਐਗਜ਼ਿਟ ਪਰਮਿਟ (ਬਾਹਰ ਜਾਣ ਦੀ ਇਜਾਜ਼ਤ) ਦੇਣ ਬਾਰੇ ਕੋਈ ਫੈਸਲਾ ਨਹੀਂ ਲਿਆ ਹੈ।
ਵਕੀਲ ਨੇ ਸ਼ਰਨ ਲੈਣ ਦੇ ਦਾਅਵਿਆਂ ਨੂੰ ਦੱਸਿਆ ਗਲਤ
ਹਾਈ ਕੋਰਟ ਵਿੱਚ ਪਟੀਸ਼ਨ ਦਾਇਰ ਕਰਨ ਵਾਲੇ ਵਕੀਲ ਅਲੀ ਚੇਂਗੇਜ਼ੀ ਸੰਧੂ ਨੇ ਕਿਹਾ ਹੈ ਕਿ ਟ੍ਰੈਵਲ ਪਰਮਿਟ ਮਿਲਦੇ ਹੀ ਸਰਬਜੀਤ ਨੂੰ ਅਗਲੇ ਹਫ਼ਤੇ ਤੱਕ ਭਾਰਤ ਭੇਜਿਆ ਜਾ ਸਕਦਾ ਹੈ। ਉਨ੍ਹਾਂ ਨੇ ਸਰਬਜੀਤ ਵੱਲੋਂ ਸ਼ਰਨ ਮੰਗਣ ਦੇ ਦਾਅਵਿਆਂ ਨੂੰ ਗਲਤ ਕਰਾਰ ਦਿੱਤਾ ਹੈ। ਪੂਰਾ ਮਾਮਲਾ ਉਦੋਂ ਸ਼ੁਰੂ ਹੋਇਆ ਜਦੋਂ ਸਰਬਜੀਤ 4 ਨਵੰਬਰ 2025 ਨੂੰ ਗੁਰੂ ਨਾਨਕ ਦੇਵ ਜੀ ਦੇ ਪ੍ਰਕਾਸ਼ ਪੁਰਬ ‘ਤੇ ਸਿੱਖ ਜੱਥੇ ਨਾਲ ਨਨਕਾਣਾ ਸਾਹਿਬ ਗਈ ਸੀ। 13 ਨਵੰਬਰ ਨੂੰ ਵੀਜ਼ਾ ਖ਼ਤਮ ਹੋਣ ‘ਤੇ ਜੱਥਾ ਭਾਰਤ ਪਰਤ ਆਇਆ, ਪਰ ਸਰਬਜੀਤ ਉੱਥੇ ਹੀ ਰੁਕ ਗਈ। 4 ਜਨਵਰੀ 2026 ਨੂੰ ਨਨਕਾਣਾ ਸਾਹਿਬ ਦੇ ਨੇੜੇ ਉਸ ਨੂੰ ਵੀਜ਼ਾ ਨਿਯਮਾਂ ਦੀ ਉਲੰਘਣਾ ਕਰਨ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।
ਪਾਕਿਸਤਾਨ ਵਿੱਚ ਚੱਲ ਰਹੀਆਂ ਹਨ ਦੋ ਪਟੀਸ਼ਨਾਂ
5 ਜਨਵਰੀ ਨੂੰ ਉਸ ਨੂੰ ਭਾਰਤ ਭੇਜਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ, ਪਰ ਵਾਹਗਾ ਸਰਹੱਦ ਬੰਦ ਹੋਣ ਅਤੇ ਕਾਨੂੰਨੀ ਅੜਚਨਾਂ ਕਾਰਨ ਇਹ ਸੰਭਵ ਨਹੀਂ ਹੋ ਸਕਿਆ। ਪਾਕਿਸਤਾਨ ਵਿੱਚ ਇਸ ਸਮੇਂ ਦੋ ਪਟੀਸ਼ਨਾਂ ਚੱਲ ਰਹੀਆਂ ਹਨ, ਇੱਕ ਵਿੱਚ ਪਾਕਿਸਤਾਨੀ ਨਾਗਰਿਕਤਾ ਅਤੇ ਸੁਰੱਖਿਆ ਦੀ ਮੰਗ ਕੀਤੀ ਗਈ ਹੈ, ਜਦਕਿ ਦੂਜੀ ਵਿੱਚ ਤੁਰੰਤ ਡਿਪੋਰਟੇਸ਼ਨ (ਭਾਰਤ ਵਾਪਸ ਭੇਜਣ) ਦੀ ਅਪੀਲ ਕੀਤੀ ਗਈ ਹੈ।
ਸਰਬਜੀਤ ਕੌਰ ਦੀ ਪਾਕਿਸਤਾਨ ਵਿੱਚ ਟਾਈਮਲਾਈਨ
4 ਨਵੰਬਰ 2025: ਸਰਬਜੀਤ ਕੌਰ ਯਾਤਰੀ ਵੀਜ਼ੇ ‘ਤੇ ਪਾਕਿਸਤਾਨ ਵਿੱਚ ਦਾਖ਼ਲ ਹੋਈ।
13 ਨਵੰਬਰ 2025: ਵੀਜ਼ਾ ਦੀ ਮਿਆਦ ਖ਼ਤਮ ਹੋ ਗਈ, ਜੱਥਾ ਭਾਰਤ ਪਰਤਿਆ ਪਰ ਸਰਬਜੀਤ ਵਾਪਸ ਨਹੀਂ ਆਈ।
4 ਜਨਵਰੀ 2026: ਵੀਜ਼ਾ ਮਿਆਦ ਤੋਂ ਵੱਧ ਸਮਾਂ ਰੁਕਣ (ਓਵਰਸਟੇਅ) ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰੀ।
5 ਜਨਵਰੀ 2026: ਭਾਰਤ ਭੇਜਣ ਦੀ ਕੋਸ਼ਿਸ਼ ਅਸਫਲ ਰਹੀ ਕਿਉਂਕਿ ਸਰਹੱਦ ਬੰਦ ਸੀ ਅਤੇ ਅਦਾਲਤੀ ਰੋਕ ਲੱਗ ਗਈ।
6 ਜਨਵਰੀ 2026: ਉਸ ਨੂੰ ਦਾਰੁਲ ਅਮਾਨ ਭੇਜਿਆ ਗਿਆ, ਉੱਥੋਂ ਮਨੁੱਖੀ ਅਧਾਰ ‘ਤੇ ਰਾਹਤ ਲਈ ਅਰਜ਼ੀ ਦਾਇਰ ਕੀਤੀ ਗਈ।
9 ਜਨਵਰੀ 2026: ਡਾਕਟਰਾਂ ਦੀ ਵਿਸ਼ੇਸ਼ ਟੀਮ ਨੇ ਸਰਬਜੀਤ ਦੀ ਸਿਹਤ ਦੀ ਜਾਂਚ ਕੀਤੀ ਅਤੇ ਰਿਪੋਰਟ ਤਸੱਲੀਬਖਸ਼ ਦੱਸੀ।
10 ਜਨਵਰੀ 2026: ਲਾਹੌਰ ਹਾਈ ਕੋਰਟ ਨੇ ਪਾਕਿਸਤਾਨੀ ਅਧਿਕਾਰੀਆਂ ਤੋਂ ਦੋ ਹਫ਼ਤਿਆਂ ਵਿੱਚ ਵਿਸਤ੍ਰਿਤ ਰਿਪੋਰਟ ਮੰਗੀ।
10 ਜਨਵਰੀ 2026: ਪਾਕਿਸਤਾਨੀ ਮੰਤਰੀ ਤਲਾਲ ਚੌਧਰੀ ਨੇ ਮਾਮਲੇ ਦੀ ਨਿਗਰਾਨੀ ਕੀਤੀ, ਮੈਡੀਕਲ ਕਲੀਅਰੈਂਸ ਦੇ ਬਾਵਜੂਦ ਗ੍ਰਹਿ ਮੰਤਰਾਲੇ ਨੇ ਡਿਪੋਰਟੇਸ਼ਨ ‘ਤੇ ਅੰਤਿਮ ਫੈਸਲਾ ਨਹੀਂ ਲਿਆ।
