ਐੱਸਏਐੱਸ ਨਗਰ, 8 ਮਈ- ਸਾਬਕਾ ਅਕਾਲੀ ਯੂਥ ਆਗੂ ਵਿਕੀ ਮਿੱਡੂਖੇੜਾ ਦੀ 2021 ਵਿਚ ਹੋਈ ਦਿਨ ਦਿਹਾੜੇ ਹੱਤਿਆ ਦੇ ਮਾਮਲੇ ਵਿਚ ਨਵਾਂ ਮੋੜ ਆ ਗਿਆ ਹੈ। ਮਾਮਲੇ ‘ਚ ਧਰਮਿੰਦਰ ਗੁੱਗਣੀ ਨੂੰ ਨਾਮਜ਼ਦ ਕੀਤਾ ਗਿਆ ਹੈ। ਗੁੱਗਣੀ ਨੇ ਆਪਣੇ ਵਕੀਲ ਰਾਹੀਂ ਮੋਹਾਲੀ ਜ਼ਿਲ੍ਹਾ ਅਦਾਲਤ ‘ਚ ਜ਼ਮਾਨਤ ਦੀ ਅਰਜ਼ੀ ਦਾਇਰ ਕੀਤੀ ਹੈ ਜਿਸ ‘ਤੇ ਅਦਾਲਤ ਨੇ ਮੋਹਾਲੀ ਪੁਲਿਸ ਨੂੰ ਨੋਟਿਸ ਜਾਰੀ ਕਰਦਿਆਂ 8 ਮਈ ਲਈ ਜਵਾਬ ਤਲਬ ਕੀਤਾ ਹੈ। ਹਾਲਾਂਕਿ ਧਰਮਿੰਦਰ ਗੁੱਗਣੀ ਇੱਕ ਹੋਰ ਕਤਲ ਮਾਮਲੇ ਵਿਚ ਪਹਿਲਾਂ ਤੋਂ ਸਜ਼ਾ ਭੁਗਤ ਰਿਹਾ ਹੈ।
ਕਈ ਗੈਂਗਸਟਰ ਪਹਿਲਾਂ ਹੀ ਅਦਾਲਤ ਤੋਂ ਬਰੀ
ਇਸ ਮਾਮਲੇ ਵਿਚ ਤਿੰਨ ਗੈਂਗਸਟਰਾਂ ਨੂੰ ਸਜ਼ਾ ਸੁਣਾਈ ਜਾ ਚੁੱਕੀ ਹੈ, ਜਦਕਿ ਕੁੱਝ ਹੋਰ ਜਿਵੇਂ ਕਿ ਸ਼ਗਨ ਪ੍ਰੀਤ ਸਿੰਘ, ਰਵਿੰਦਰ ਸਿੰਘ ਚੌਹਾਨ, ਸੌਰਵ ਠਾਕੁਰ, ਗੌਰਵ ਪਟਿਆਲਾ ਉਰਫ਼ ਲੱਕੀ ਪਟਿਆਲਾ, ਸੋਬੀਰ ਅਤੇ ਧਰਮਿੰਦਰ ਗੁੱਗਣੀ ਬਾਰੇ ਜਾਂਚ ਲਈ ਅਦਾਲਤ ਨੇ ਹੁਕਮ ਦਿੱਤੇ ਸਨ। ਮ੍ਰਿਤਕ ਦੇ ਪਰਿਵਾਰ ਨੇ ਪਹਿਲਾਂ ਹੀ ਸਾਫ਼ ਕਰ ਦਿੱਤਾ ਸੀ ਕਿ ਉਹ ਬਾਕੀ ਦੋਸ਼ੀਆਂ ਨੂੰ ਕਾਨੂੰਨੀ ਘੇਰੇ ‘ਚ ਲਿਆਉਣ ਲਈ ਅਖੀਰਲੇ ਸਾਹ ਤੱਕ ਲੜਾਈ ਲੜਨਗੇ। ਸਬੂਤਾਂ ਦੀ ਘਾਟ ਕਾਰਨ ਕੌਸ਼ਲ ਚੌਧਰੀ, ਅਮਿੱਤ ਡਾਗਰ ਅਤੇ ਭੁਪਿੰਦਰ ਸਿੰਘ ਭੁੱਪੀ ਰਾਣਾ ਨੂੰ ਅਦਾਲਤ ਨੇ ਬਰੀ ਕਰ ਦਿੱਤਾ ਸੀ।
ਕੀ ਸੀ ਪੂਰਾ ਮਾਮਲਾ
7 ਅਗਸਤ 2021 ਨੂੰ ਸੈਕਟਰ 70 ਮੋਹਾਲੀ ‘ਚ ਵਿਕੀ ਮਿੱਡੂਖੇੜਾ ਦੀ ਉਸ ਸਮੇਂ ਹੱਤਿਆ ਕਰ ਦਿੱਤੀ ਗਈ ਜਦ ਉਹ ਆਪਣੇ ਪ੍ਰਾਪਰਟੀ ਡੀਲਰ ਦੋਸਤ ਦੇ ਦਫ਼ਤਰ ਤੋਂ ਨਿਕਲਿਆ। ਕਾਰ ਵੱਲ ਵਧਦੇ ਸਮੇਂ ਦੋ ਨਕਾਬਪੋਸ਼ ਹਮਲਾਵਰਾਂ ਨੇ ਉਸ ‘ਤੇ ਗੋਲਾਬਾਰੀ ਕਰ ਦਿੱਤੀ। ਵਿਕੀ ਨੇ ਬਚਣ ਦੀ ਕੋਸ਼ਿਸ਼ ਕਰਦਿਆਂ ਲਗਭਗ ਇੱਕ ਕਿੱਲੋਮੀਟਰ ਦੌੜ ਲਾਈ ਪਰ ਹਮਲਾਵਰ ਉਸ ਦਾ ਪਿੱਛਾ ਕਰਦੇ ਰਹੇ। ਕੁੱਲ 20 ਗੋਲੀਆਂ ਚਲਾਈਆਂ ਗਈਆਂ, ਜਿਨ੍ਹਾਂ ਵਿਚੋਂ 9 ਗੋਲੀਆਂ ਲੱਗਣ ਕਾਰਨ ਮੌਕੇ ‘ਤੇ ਹੀ ਉਸ ਦੀ ਮੌਤ ਹੋ ਗਈ। ਅਗਲੇ ਦਿਨ ਬੰਬੀਹਾ ਗੈਂਗ ਨੇ ਹੱਤਿਆ ਦੀ ਜ਼ਿੰਮੇਵਾਰੀ ਲੈ ਲਈ। ਸ਼ੁਰੂਆਤੀ ਜਾਂਚ ਵਿਚ ਲੱਕੀ ਪਟਿਆਲਾ ਦਾ ਨਾਮ ਸਾਹਮਣੇ ਆਇਆ ਜੋ ਇਸ ਗੈਂਗ ਨਾਲ ਜੁੜਿਆ ਹੋਇਆ ਹੈ। ਬਾਅਦ ਵਿਚ ਮੋਹਾਲੀ ਪੁਲਿਸ ਨੇ ਤਿਹਾੜ ਜੇਲ੍ਹ ਸਮੇਤ ਵੱਖ-ਵੱਖ ਥਾਵਾਂ ਤੋਂ 26 ਗੈਂਗਸਟਰਾਂ ਨੂੰ ਪੁੱਛਗਿੱਛ ਲਈ ਲਿਆਂਦਾ। ਆਖ਼ਰਕਾਰ ਦਿੱਲੀ ਪੁਲਿਸ ਨੇ ਇਸ ਮਾਮਲੇ ਦੇ ਕੁੱਝ ਮੁੱਖ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕੀਤਾ, ਜਿਸ ਨਾਲ ਹੱਤਿਆ ਦੀ ਯੋਜਨਾ ਬਾਰੇ ਖ਼ੁਲਾਸਾ ਹੋਇਆ। ਪਤਾ ਲੱਗਿਆ ਕਿ ਤਿਹਾੜ ਜੇਲ੍ਹ ਵਿਚ ਬੰਦ ਅਮਿੱਤ ਡਾਗਰ ਅਤੇ ਕੌਸ਼ਲ ਚੌਧਰੀ ਨੇ ਇਹ ਯੋਜਨਾ ਬਣਾਈ ਸੀ। ਉਨ੍ਹਾਂ ਨੇ ਕਾਰ ਅਤੇ ਸ਼ੂਟਰਾਂ ਦਾ ਪ੍ਰਬੰਧ ਕੀਤਾ ਸੀ।
