ਜਸਵਿੰਦਰ ਸਿੰਘ ਸੰਧੂ
ਚੰਡੀਗੜ੍ਹ, 24 ਦਸੰਬਰ : ਇਹ ਅਨਾਊਂਸਮੈਂਟ ਸਿਰਫ਼ ਸਟੇਸ਼ਨ ‘ਤੇ ਹੀ ਨਹੀਂ, ਤੁਹਾਡੀ ਜੇਬ ਲਈ ਵੀ ਹੈ। ਰੇਲਵੇ ਨੇ ਸਫ਼ਰ ਦੇ ਨਿਯਮ ਬਦਲ ਦਿੱਤੇ ਹਨ ਅਤੇ ਹੁਣ ਜ਼ਿਆਦਾ ਸਾਮਾਨ ਲੈ ਕੇ ਚੱਲਣਾ ਆਸਾਨ ਨਹੀਂ ਹੋਵੇਗਾ। ਨਵੇਂ ਨਿਯਮਾਂ ਤਹਿਤ ਹਰ ਯਾਤਰੀ ਨੂੰ ਤੈਅ ਸੀਮਾ ਤੱਕ ਹੀ ਸਾਮਾਨ ਮੁਫ਼ਤ ਲਿਜਾਣ ਦੀ ਇਜਾਜ਼ਤ ਹੋਵੇਗੀ। ਨਿਰਧਾਰਤ ਵਜ਼ਨ ਤੋਂ ਜ਼ਿਆਦਾ ਸਾਮਾਨ ਹੋਣ ‘ਤੇ ਵਾਧੂ ਫ਼ੀਸ (Surcharge) ਦੇਣੀ ਪਵੇਗੀ। ਇੰਨਾ ਹੀ ਨਹੀਂ, ਤੈਅ ਸੀਮਾ ਤੋਂ ਵੱਧ ਸਾਮਾਨ ਨੂੰ ਕੋਚ ਵਿੱਚ ਰੱਖਣ ਦੀ ਇਜਾਜ਼ਤ ਨਹੀਂ ਹੋਵੇਗੀ, ਸਗੋਂ ਉਸ ਨੂੰ ਵੱਖਰੇ ਤੌਰ ‘ਤੇ ਬੁੱਕ ਕਰਵਾਉਣਾ ਪਵੇਗਾ। ਵਾਧੂ ਸਾਮਾਨ ਨੂੰ ਬੁਕਿੰਗ ਰਾਹੀਂ ਵੱਖਰਾ ਭੇਜਣਾ ਹੋਵੇਗਾ, ਜਿਸ ਵਿੱਚ ਸਾਮਾਨ ਦੇ ਸਾਈਜ਼ ਅਨੁਸਾਰ ਤੁਹਾਨੂੰ ਚਾਰਜ ਦੇਣਾ ਪਵੇਗਾ। ਇਹ ਨਿਯਮ ਸਲੀਪਰ, ਏਸੀ ਸਮੇਤ ਸਾਰੀਆਂ ਸ਼੍ਰੇਣੀਆਂ ਦੇ ਯਾਤਰੀਆਂ ‘ਤੇ ਲਾਗੂ ਹੋਣਗੇ। ਯਾਤਰੀ ਆਪਣੀ ਸ਼੍ਰੇਣੀ ਅਨੁਸਾਰ ਤੈਅ ਵੱਧ ਤੋਂ ਵੱਧ ਸੀਮਾ ਤੱਕ ਵਾਧੂ ਸਾਮਾਨ ਨੂੰ ਕੋਚ ਵਿੱਚ ਨਾਲ ਲਿਜਾ ਸਕਦੇ ਹਨ, ਪਰ ਇਸ ਲਈ ਰੇਲਵੇ ਦੀ ਨਿਰਧਾਰਤ ਦਰ ਤੋਂ ਡੇਢ ਗੁਣਾ (1.5 ਗੁਣਾ) ਚਾਰਜ ਦੇਣਾ ਹੋਵੇਗਾ।
ਸੈਕਿੰਡ ਕਲਾਸ ਅਤੇ ਸਲੀਪਰ ਯਾਤਰੀਆਂ ਲਈ ਨਿਯਮ
ਜੇਕਰ ਤੁਸੀਂ ਟ੍ਰੇਨ ਦੀ ਸੈਕਿੰਡ ਕਲਾਸ ਵਿੱਚ ਸਫ਼ਰ ਕਰ ਰਹੇ ਹੋ, ਤਾਂ ਧਿਆਨ ਦੇਣਾ ਜ਼ਰੂਰੀ ਹੈ ਕਿ ਤੁਸੀਂ ਸਿਰਫ਼ 35 ਕਿੱਲੋ ਤੱਕ ਦਾ ਵਜ਼ਨੀ ਸਾਮਾਨ ਮੁਫ਼ਤ ਲਿਜਾ ਸਕਦੇ ਹੋ। ਜੇਕਰ ਕੋਈ ਯਾਤਰੀ ਇਸ ਤੋਂ ਵੱਧ ਸਾਮਾਨ ਲਿਜਾਣਾ ਚਾਹੁੰਦਾ ਹੈ, ਤਾਂ ਉਹ ਵੱਧ ਤੋਂ ਵੱਧ 70 ਕਿੱਲੋ ਤੱਕ ਸਾਮਾਨ ਲਿਜਾ ਸਕਦਾ ਹੈ, ਪਰ ਇਸ ਲਈ ਉਸ ਨੂੰ ਤੈਅ ਚਾਰਜ ਦੇਣਾ ਪਵੇਗਾ। ਉੱਥੇ ਹੀ, ਸਲੀਪਰ ਕਲਾਸ ਦੇ ਯਾਤਰੀਆਂ ਲਈ ਮੁਫ਼ਤ ਇਜਾਜ਼ਤ (Free Allowance) ਥੋੜ੍ਹੀ ਜ਼ਿਆਦਾ ਹੈ। ਉਹ 40 ਕਿੱਲੋ ਤੱਕ ਦਾ ਸਾਮਾਨ ਬਿਨਾਂ ਕਿਸੇ ਵਾਧੂ ਖ਼ਰਚੇ ਦੇ ਲਿਜਾ ਸਕਦੇ ਹਨ। ਲੋੜ ਪੈਣ ‘ਤੇ 80 ਕਿੱਲੋ ਤੱਕ ਸਾਮਾਨ ਲਿਜਾਣ ਦੀ ਇਜਾਜ਼ਤ ਹੈ, ਪਰ ਇਸ ਲਈ ਵੀ ਵਾਧੂ ਚਾਰਜ ਦੇਣਾ ਹੋਵੇਗਾ।
AC ਅਤੇ ਚੇਅਰ ਕਾਰ ਵਿੱਚ ਜ਼ਿਆਦਾ ਸਖ਼ਤੀ
ਜੇਕਰ ਤੁਸੀਂ ਏਸੀ ਥ੍ਰੀ-ਟੀਅਰ (AC 3-Tier) ਜਾਂ ਚੇਅਰ ਕਾਰ ਰਾਹੀਂ ਯਾਤਰਾ ਕਰਦੇ ਹੋ, ਤਾਂ ਇੱਥੇ ਨਿਯਮ ਹੋਰ ਵੀ ਸਖ਼ਤ ਹਨ। ਇਨ੍ਹਾਂ ਕਲਾਸਾਂ ਵਿੱਚ ਯਾਤਰੀਆਂ ਨੂੰ ਸਿਰਫ਼ 40 ਕਿੱਲੋ ਤੱਕ ਦਾ ਹੀ ਸਾਮਾਨ ਲਿਜਾਣ ਦੀ ਇਜਾਜ਼ਤ ਹੈ ਅਤੇ ਇਹੀ ਉਨ੍ਹਾਂ ਦੀ ਵੱਧ ਤੋਂ ਵੱਧ ਸੀਮਾ ਵੀ ਹੈ। ਭਾਵ, ਏਸੀ ਕੋਚ ਵਿੱਚ ਇਸ ਤੋਂ ਵੱਧ ਵਜ਼ਨ ਦਾ ਸਾਮਾਨ ਲਿਜਾਣਾ ਨਿਯਮਾਂ ਅਨੁਸਾਰ ਸਵੀਕਾਰ ਨਹੀਂ ਕੀਤਾ ਜਾਵੇਗਾ।
