ਜਲੰਧਰ, 3 ਜੁਲਾਈ 2025 : ਆਵਾਰਾ ਕੁੱਤਿਆਂ ਨੇ ਪਾਸ਼ ਇਲਾਕੇ ਮਾਡਲ ਟਾਊਨ ’ਚ ਇਕ ਨੌਜਵਾਨ ’ਤੇ ਹਮਲਾ ਕਰ ਦਿੱਤਾ। ਇਸ ਹਮਲੇ ’ਚ ਨੌਜਵਾਨ ਡਿੱਗ ਪਿਆ ਤੇ ਕੁੱਤੇ ਉਸਨੂੰ ਵੱਢਦੇ ਰਹੇ। ਉੱਥੋਂ ਲੰਘ ਰਹੇ ਇਕ ਹੋਰ ਨੌਜਵਾਨ ਨੇ ਕੁੱਤਿਆਂ ’ਤੇ ਪੱਥਰ ਮਾਰ ਕੇ ਉਨ੍ਹਾਂ ਨੂੰ ਡਰਾ ਦਿੱਤਾ, ਜਿਸ ਕਾਰਨ ਕੁੱਤਿਆਂ ਨੇ ਨੌਜਵਾਨ ਨੂੰ ਛੱਡ ਦਿੱਤਾ। ਕੁੱਤਿਆਂ ਨੇ ਨੌਜਵਾਨ ਨੂੰ ਲੱਤਾਂ ’ਤੇ 9 ਥਾਵਾਂ ’ਤੇ ਵੱਢਿਆ। ਕੁੱਤੇ ਦੇ ਵੱਢਣ ਕਾਰਨ ਖੂਨ ਵਹਿ ਰਿਹਾ ਸੀ ਪਰ ਨੌਜਵਾਨ ਖੁਦ ਸਕੂਟਰ ਚਲਾ ਕੇ ਸਿਵਲ ਹਸਪਤਾਲ ਪਹੁੰਚਿਆ। ਡੂੰਘੇ ਜ਼ਖ਼ਮਾਂ ਤੋਂ ਜ਼ਿਆਦਾ ਖੂਨ ਵਹਿਣ ਕਾਰਨ ਸਿਵਲ ਹਸਪਤਾਲ ਦੇ ਡਾਕਟਰਾਂ ਨੇ ਨੌਜਵਾਨ ਨੂੰ ਲਗਭਗ ਚਾਰ ਘੰਟੇ ਆਈਸੀਯੂ ’ਚ ਰੱਖਿਆ। ਕੁੱਤਿਆਂ ਦਾ ਹਮਲਾ ਇੰਨਾ ਘਾਤਕ ਸੀ ਕਿ ਨੌਜਵਾਨ ਦੀ ਲੱਤ ਦਾ ਮਾਸ ਲਟਕ ਗਿਆ ਤੇ ਹੱਡੀ ਦਿਖਾਈ ਦੇਣ ਲੱਗ ਪਈ। ਡਾਕਟਰਾਂ ਵੱਲੋਂ ਇਲਾਜ ਤੋਂ ਬਾਅਦ ਪਰਿਵਾਰਕ ਮੈਂਬਰ ਨੌਜਵਾਨ ਨੂੰ ਘਰ ਲੈ ਗਏ। ਜ਼ਖਮੀ ਨੌਜਵਾਨ ਚੰਦਰ ਮੋਹਨ ਤੇਜ ਮੋਹਨ ਨਗਰ ਦਾ ਰਹਿਣ ਵਾਲਾ ਹੈ। ਡਾਕਟਰਾਂ ਨੇ ਉਸਨੂੰ ਇਕ ਟੀਕਾ ਲਗਾਇਆ ਹੈ, ਜਦੋਂ ਕਿ ਤਿੰਨ ਹੋਰ ਟੀਕੇ ਲਗਾਉਣੇ ਹਨ। ਚੰਦਰ ਮੋਹਨ ਨੇ ਦੱਸਿਆ ਕਿ ਉਹ ਜਿੰਮ ਟ੍ਰੇਨਰ ਹੈ ਤੇ ਉਸਦੀ ਇਕ ਕੋਰੀਅਰ ਸਰਵਿਸ ਏਜੰਸੀ ਵੀ ਹੈ। ਸੋਮਵਾਰ ਨੂੰ, ਉਹ ਸੁਵਿਧਾ ਸੈਂਟਰ ਦੇ ਸਾਹਮਣੇ ਕਾਲੋਨੀ ਵੱਲ ਜਾਣ ਵਾਲੀ ਗਲੀ ’ਚ ਇਕ ਕਲਾਇੰਟ ਤੋਂ ਕੋਰੀਅਰ ਲੈਣ ਲਈ ਮਾਡਲ ਟਾਊਨ ਗਿਆ ਸੀ। ਕਲਾਇੰਟ ਨਾਲ ਗੱਲ ਕਰਨ ਤੋਂ ਬਾਅਦ ਉਹ ਪੰਜ ਮਿੰਟ ਆਰਾਮ ਕਰਨ ਲਈ ਕਾਲੋਨੀ ਪਾਰਕ ’ਚ ਗਿਆ। ਉਹ ਪਾਰਕ ਅੰਦਰ ਗਿਆ ਹੀ ਸੀ ਕਿ ਅਚਾਨਕ ਚਾਰ ਕੁੱਤਿਆਂ ਨੇ ਉਸ ’ਤੇ ਹਮਲਾ ਕਰ ਦਿੱਤਾ। ਡਿੱਗੇ ਪਏ ਨੂੰ ਵੀ ਕੁੱਤੇ ਤਿੰਨ ਮਿੰਟ ਤੱਕ ਵੱਢਦੇ ਰਹੇ। ਪਾਰਕ ’ਚ ਬੈਠੇ ਨੌਜਵਾਨ ਨੇ ਕੁੱਤਿਆਂ ਤੋਂ ਉਸਨੂੰ ਛੁਡਾਇਆ। ਚੰਦਰ ਮੋਹਨ ਨੇ ਦੱਸਿਆ ਕਿ ਕੁੱਤਿਆਂ ਨੂੰ ਭਜਾਉਣ ਤੋਂ ਬਾਅਦ ਉਹ ਆਪਣੇ ਸਕੂਟਰ ’ਤੇ ਸਿਵਲ ਹਸਪਤਾਲ ਪਹੁੰਚਿਆ। ਆਈਸੀਯੂ ’ਚ ਲਗਭਗ ਚਾਰ ਘੰਟੇ ਤੱਕ ਉਸਦਾ ਇਲਾਜ ਚੱਲਿਆ। ਇਸ ਦੌਰਾਨ ਉਸਦੇ ਮਾਪੇ ਹਸਪਤਾਲ ਪਹੁੰਚੇ ਤੇ ਉਸਨੂੰ ਘਰ ਲੈ ਗਏ।
ਡੂੰਘੇ ਜ਼ਖ਼ਮਾਂ ਦਾ ਇਲਾਜ ਬਿਨਾਂ ਟਾਂਕਿਆਂ ਦੇ ਕੀਤਾ
35 ਸਾਲਾ ਚੰਦਰ ਮੋਹਨ ਨੇ ਦੱਸਿਆ ਕਿ ਉਸਦੇ ਜ਼ਖ਼ਮ ਬਹੁਤ ਡੂੰਘੇ ਸਨ ਪਰ ਡਾਕਟਰਾਂ ਨੇ ਉਨ੍ਹਾਂ ਨੂੰ ਟਾਂਕੇ ਨਹੀਂ ਲਗਾਏ ਕਿਉਂਕਿ ਜ਼ਖ਼ਮਾਂ ਨੂੰ ਵਾਰ-ਵਾਰ ਧੋਣਾ ਸੀ। ਕੁੱਤੇ ਦੇ ਵੱਢਣ ਕਾਰਨ ਕੁੱਤੇ ਦੀ ਲਾਰ ਜ਼ਖ਼ਮਾਂ ’ਚ ਜਾਣ ਦਾ ਖ਼ਤਰਾ ਸੀ। ਡਾਕਟਰਾਂ ਦੇ ਕਹਿਣ ’ਤੇ ਉਹ ਘਰ ਗਿਆ ਤੇ ਹਰ ਡੇਢ ਘੰਟੇ ਬਾਅਦ ਜ਼ਖ਼ਮਾਂ ਨੂੰ ਧੋਤਾ, ਤਾਂ ਜੋ ਕੁੱਤੇ ਦੀ ਲਾਰ ਵਹਿ ਜਾਵੇ ਤੇ ਕੋਈ ਖ਼ਤਰਾ ਨਾ ਰਹੇ। ਜਦੋਂ ‘ਪੰਜਾਬੀ ਜਾਗਰਣ’ ਟੀਮ ਚੰਦਰ ਮੋਹਨ ਨੂੰ ਮਿਲੀ, ਤਾਂ ਉਸਨੇ ਕਿਹਾ ਕਿ ਜ਼ਖ਼ਮਾਂ ’ਚ ਬਹੁਤ ਦਰਦ ਹੋ ਰਿਹਾ ਸੀ ਤੇ ਖੂਨ ਵਹਿਣ ਕਾਰਨ ਕਮਜ਼ੋਰੀ ਸੀ।
