ਨਵੀਂ ਦਿੱਲੀ, 25 ਦਸੰਬਰ : ਅੱਜ ਦੇ ਸਮੇਂ ਵਿੱਚ ਜ਼ਿਆਦਾਤਰ ਲੋਕ ਗੂਗਲ ਮੈਪਸ (Google Maps) ਦੀ ਵਰਤੋਂ ਕਰਦੇ ਹਨ। ਇਸ ਐਪ ਦੀ ਮਦਦ ਨਾਲ ਅਣਜਾਣ ਅਤੇ ਨਵੀਆਂ ਥਾਵਾਂ ਦੇ ਰਸਤੇ ਆਸਾਨੀ ਨਾਲ ਲੱਭੇ ਜਾ ਸਕਦੇ ਹਨ। ਚਾਹੇ ਤੁਸੀਂ ਕਿਸੇ ਨਵੀਂ ਜਗ੍ਹਾ ਘੁੰਮਣਾ ਚਾਹੁੰਦੇ ਹੋਵੋ ਜਾਂ ਕਿਸੇ ਨਵੇਂ ਸ਼ਹਿਰ ਵਿੱਚ ਜਾਣਾ ਹੋਵੇ, ਗੂਗਲ ਮੈਪਸ ਬਹੁਤ ਮਦਦਗਾਰ ਸਾਬਤ ਹੁੰਦਾ ਹੈ। ਹਾਲਾਂਕਿ, ਗੂਗਲ ਮੈਪਸ ਦੀ ਵਰਤੋਂ ਕਰਨ ਲਈ ਆਮ ਤੌਰ ‘ਤੇ ਇੰਟਰਨੈੱਟ ਦੀ ਲੋੜ ਹੁੰਦੀ ਹੈ। ਪਰ ਕਈ ਵਾਰ ਅਸੀਂ ਅਜਿਹੀਆਂ ਥਾਵਾਂ ‘ਤੇ ਹੁੰਦੇ ਹਾਂ ਜਿੱਥੇ ਇੰਟਰਨੈੱਟ ਜਾਂ ਨੈੱਟਵਰਕ ਦੀ ਕਵਰੇਜ ਜਾਂ ਤਾਂ ਬਹੁਤ ਘੱਟ ਹੁੰਦੀ ਹੈ ਜਾਂ ਬਿਲਕੁਲ ਨਹੀਂ ਹੁੰਦੀ। ਅਜਿਹੀ ਸਥਿਤੀ ਵਿੱਚ, ਲੋਕ ਉਲਝਣ ਵਿੱਚ ਪੈ ਜਾਂਦੇ ਹਨ ਕਿ ਰਸਤਾ ਕਿਵੇਂ ਲੱਭਿਆ ਜਾਵੇ। ਇਸ ਮੁਸ਼ਕਲ ਤੋਂ ਬਚਣ ਲਈ, ਗੂਗਲ ਮੈਪਸ ਦਾ ‘ਆਫਲਾਈਨ ਫੀਚਰ’ ਤੁਹਾਡੇ ਲਈ ਬਹੁਤ ਫਾਇਦੇਮੰਦ ਹੋ ਸਕਦਾ ਹੈ। ਇਸ ਫੀਚਰ ਰਾਹੀਂ ਤੁਸੀਂ ਇੰਟਰਨੈੱਟ ਤੋਂ ਬਿਨਾਂ ਵੀ ਰਸਤੇ ਸਰਚ ਕਰ ਸਕਦੇ ਹੋ। ਇਹ ਫੀਚਰ Android ਅਤੇ iPhone ਦੋਵਾਂ ਯੂਜ਼ਰ਼ਜ਼ ਲਈ ਉਪਲਬਧ ਹੈ।
ਆਫਲਾਈਨ ਗੂਗਲ ਮੈਪਸ ਦੀ ਵਰਤੋਂ ਕਿਵੇਂ ਕਰੀਏ?
ਸਭ ਤੋਂ ਪਹਿਲਾਂ ਆਪਣੇ ਸਮਾਰਟਫੋਨ ਵਿੱਚ Google Maps ਐਪ ਖੋਲ੍ਹੋ। ਇਸ ਤੋਂ ਬਾਅਦ, ਉੱਪਰ ਸੱਜੇ ਪਾਸੇ (top-right corner) ਦਿਖਾਈ ਦੇ ਰਹੇ ਆਪਣੇ ਪ੍ਰੋਫਾਈਲ ਆਈਕਨ ‘ਤੇ ਟੈਪ ਕਰੋ। ਇੱਥੇ ਤੁਹਾਨੂੰ ਕਈ ਆਪਸ਼ਨ ਦਿਖਾਈ ਦੇਣਗੇ। ਤੁਹਾਨੂੰ ‘Offline Maps’ ਵਾਲੇ ਆਪਸ਼ਨ ‘ਤੇ ਕਲਿੱਕ ਕਰਨਾ ਹੈ। ਹੁਣ ‘Select Your Own Map’ ‘ਤੇ ਜਾ ਕੇ ਉਸ ਇਲਾਕੇ ਨੂੰ ਚੁਣੋ ਜਿਸ ਨੂੰ ਤੁਸੀਂ ਡਾਊਨਲੋਡ ਕਰਨਾ ਚਾਹੁੰਦੇ ਹੋ। ਇਲਾਕਾ ਚੁਣਨ ਤੋਂ ਬਾਅਦ Download ਬਟਨ ‘ਤੇ ਟੈਪ ਕਰੋ। ਡਾਊਨਲੋਡ ਹੋਣ ਤੋਂ ਬਾਅਦ, ਇਹ ਮੈਪ ਤੁਹਾਡੀ ਆਫਲਾਈਨ ਲਿਸਟ ਵਿੱਚ ਦਿਖਾਈ ਦੇਣ ਲੱਗੇਗਾ। ਹੁਣ ਤੁਸੀਂ ਇੰਟਰਨੈੱਟ ਤੋਂ ਬਿਨਾਂ ਵੀ ਉਸ ਇਲਾਕੇ ਦੇ ਰਸਤੇ ਲੱਭ ਸਕਦੇ ਹੋ। ਤੁਹਾਨੂੰ ਬਸ ਗੂਗਲ ਮੈਪਸ ‘ਤੇ ਜਾ ਕੇ ਸਰਚ ਬਾਰ ਵਿੱਚ ਆਪਣੀ ਮੰਜ਼ਿਲ ਦਾ ਨਾਮ ਲਿਖਣਾ ਹੈ। ਇਸ ਤਰ੍ਹਾਂ, ਕਿਸੇ ਵੀ ਘੱਟ ਨੈੱਟਵਰਕ ਵਾਲੀ ਥਾਂ ‘ਤੇ ਜਾਣ ਤੋਂ ਪਹਿਲਾਂ ਤੁਸੀਂ ਉੱਥੋਂ ਦਾ ਮੈਪ ਡਾਊਨਲੋਡ ਕਰਕੇ ਆਪਣਾ ਸਫਰ ਸੌਖਾ ਬਣਾ ਸਕਦੇ ਹੋ।
