ਰੋਹਤਕ, 26 ਦਸੰਬਰ : ਸ਼ਹਿਰ ਦੇ ਮਾਤਾ ਦਰਵਾਜ਼ਾ ਚੌਕ ਖੇਤਰ ਵਿੱਚ ਵੀਰਵਾਰ ਸਵੇਰੇ ਆਨਰ ਕਿਲਿੰਗ (ਮਾਣ-ਸਨਮਾਨ ਦੇ ਨਾਂ ‘ਤੇ ਕਤਲ) ਦੀ ਵਾਰਦਾਤ ਸਾਹਮਣੇ ਆਈ। 35 ਸਾਲਾ ਬਿਊਟੀ ਪਾਰਲਰ ਸੰਚਾਲਿਕਾ ਮਾਇਆ ਦੀ ਉਸ ਦੇ ਸਕੇ ਭਰਾ ਨੇ ਤੇਜ਼ਧਾਰ ਹਥਿਆਰ ਨਾਲ ਗਲਾ ਵੱਢ ਕੇ ਹੱਤਿਆ ਕਰ ਦਿੱਤੀ। ਇਹ ਘਟਨਾ ਸਵੇਰੇ ਕਰੀਬ ਸਾਢੇ ਦਸ ਵਜੇ ਉਸ ਸਮੇਂ ਵਾਪਰੀ, ਜਦੋਂ ਮਾਇਆ ਆਪਣੇ ਪਾਰਲਰ ਵਿੱਚ ਮੌਜੂਦ ਸੀ। ਪੁਲਿਸ ਨੇ ਮੁਲਜ਼ਮ ਨੂੰ ਹਿਰਾਸਤ ਵਿੱਚ ਲੈ ਲਿਆ ਹੈ। ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਮਾਇਆ ਦਾ ਵਿਆਹ ਕਰੀਬ ਦਸ ਸਾਲ ਪਹਿਲਾਂ ਪੰਜਾਬ ਵਿੱਚ ਹੋਇਆ ਸੀ। ਜੋੜੇ ਦੀ ਕੋਈ ਸੰਤਾਨ ਨਹੀਂ ਸੀ। ਤਿੰਨ ਮਹੀਨੇ ਪਹਿਲਾਂ ਮਾਇਆ ਨੇ ਪਤੀ ਤੋਂ ਤਲਾਕ ਲੈ ਲਿਆ ਸੀ। ਹੁਣ ਮਾਇਆ ਖੋਖਰਾਕੋਟ ਇਲਾਕੇ ਵਿੱਚ ਇੱਕ ਨੌਜਵਾਨ ਨਾਲ ਕਿਰਾਏ ਦੇ ਮਕਾਨ ਵਿੱਚ ਰਹਿ ਰਹੀ ਸੀ। ਭੈਣ ਦੇ ਚਰਿੱਤਰ ‘ਤੇ ਸੀ ਸ਼ੱਕ ਇਸੇ ਗੱਲ ਨੂੰ ਲੈ ਕੇ ਉਸ ਦਾ ਭਰਾ ਜਵਾਲਾ ਪ੍ਰਸਾਦ ਨਾਰਾਜ਼ ਸੀ ਅਤੇ ਆਪਣੀ ਭੈਣ ਦੇ ਚਰਿੱਤਰ ‘ਤੇ ਸ਼ੱਕ ਕਰਦਾ ਸੀ। ਉਸ ਨੇ ਕਤਲ ਦੀ ਯੋਜਨਾ ਬਣਾਈ। ਪੁੱਛਗਿੱਛ ਦੌਰਾਨ ਉਸ ਨੇ ਦੱਸਿਆ ਕਿ ਉਸ ਦੀ ਭੈਣ ਇੱਕ ਨੌਜਵਾਨ ਨਾਲ ਕਿਰਾਏ ਦੇ ਮਕਾਨ ਵਿੱਚ ਉਨ੍ਹਾਂ ਤੋਂ ਵੱਖ ਰਹਿੰਦੀ ਸੀ। ਲੋਕ ਉਸ ਨੂੰ ਤਾਅਨੇ ਮਾਰਦੇ ਸਨ। ਮੁਲਜ਼ਮ ਨੇ ਪੁਲਿਸ ਨੂੰ ਕਿਹਾ ਕਿ ਉਹ ਰੋਜ਼ਾਨਾ ਦੀ ਬੇਇੱਜ਼ਤੀ ਬਰਦਾਸ਼ਤ ਨਹੀਂ ਕਰ ਸਕਦਾ ਸੀ। ਡੀ.ਐੱਸ.ਪੀ. ਹੈੱਡਕੁਆਰਟਰ ਰਵੀ ਖੁੰਡੀਆ ਨੇ ਦੱਸਿਆ ਕਿ ਪੁਲਿਸ ਮੁਲਜ਼ਮ ਨੂੰ ਸ਼ੁੱਕਰਵਾਰ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ ਰਿਮਾਂਡ ‘ਤੇ ਲਵੇਗੀ। ਦੂਜੀ ਕੁੜੀ ਡਰ ਕੇ ਬੇਹੋਸ਼ ਵੀਰਵਾਰ ਸਵੇਰੇ ਮਾਇਆ ਰੋਜ਼ਾਨਾ ਦੀ ਤਰ੍ਹਾਂ ਆਪਣੇ ਬਿਊਟੀ ਪਾਰਲਰ ਪਹੁੰਚੀ ਸੀ। ਪਾਰਲਰ ਵਿੱਚ ਉਸ ਦੀ ਇੱਕ ਸਹਿਯੋਗੀ ਕਰਮਚਾਰੀ ਲਕਸ਼ਮੀ ਵੀ ਮੌਜੂਦ ਸੀ। ਇਸੇ ਦੌਰਾਨ ਮਾਇਆ ਦਾ ਵੱਡਾ ਭਰਾ, ਕਬੀਰ ਕਲੋਨੀ ਨਿਵਾਸੀ ਜਵਾਲਾ ਪ੍ਰਸਾਦ ਉੱਥੇ ਪਹੁੰਚਿਆ ਅਤੇ ਤੇਜ਼ਧਾਰ ਹਥਿਆਰ ਨਾਲ ਮਾਇਆ ਦੀ ਗਰਦਨ ‘ਤੇ ਵਾਰ ਕਰ ਦਿੱਤਾ। ਗੰਭੀਰ ਸੱਟ ਲੱਗਣ ਕਾਰਨ ਮਾਇਆ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਉੱਥੇ ਹੀ, ਸਹਿਯੋਗੀ ਕਰਮਚਾਰੀ ਲਕਸ਼ਮੀ ਡਰ ਕੇ ਬੇਹੋਸ਼ ਹੋ ਗਈ।
