ਜਗਰਾਓਂ, 29 ਜੁਲਾਈ : ਜਗਰਾਓਂ ਦੇ ਪਿੰਡ ਅਖਾੜਾ ਵਿਚ ਪੰਚਾਇਤ ਦੀ ਸ਼ਿਕਾਇਤ ’ਤੇ ਪੁਲਿਸ ਚੌਕੀ ਬੁਲਾਉਣ ਤੋਂ ਪਰੇਸ਼ਾਨ ਹੋਏ 72 ਸਾਲਾ ਬਜ਼ੁਰਗ ਨੇ ਜ਼ਹਿਰੀਲੀ ਦਵਾਈ ਪੀ ਲਈ, ਜਿਸ ਨੂੰ ਜਗਰਾਓਂ ਦੇ ਨਿੱਜੀ ਹਸਪਤਾਲ ’ਚ ਭਰਤੀ ਕਰਵਾਇਆ ਗਿਆ, ਜਿਥੇ ਬਜ਼ੁਰਗ ਨੇ ਕੁਝ ਘੰਟਿਆਂ ਬਾਅਦ ਦਮ ਤੋੜ ਦਿੱਤਾ। ਜਾਣਕਾਰੀ ਅਨੁਸਾਰ ਪਿੰਡ ਅਖਾੜਾ ਵਾਸੀ ਜ਼ੋਰਾ ਸਿੰਘ, ਜਿਸਦੇ ਘਰ ਅਗਲੀ ਗਲੀ ਨੂੰ ਲੈ ਕੇ ਪੰਚਾਇਤ ਨਾਲ ਰੌਲਾ ਚੱਲ ਰਿਹਾ ਸੀ। ਜ਼ੋਰਾ ਸਿੰਘ ਗਲੀ ਦਾ ਪੱਧਰ ਉੱਚਾ ਕਰਨ ਕਾਰਨ ਵਿਰੋਧ ਕਰ ਰਿਹਾ ਸੀ। ਇਸ ’ਤੇ ਪੰਚਾਇਤ ਨਾਲ ਤੂੰ-ਤੂੰ ਮੈਂ-ਮੈਂ ਹੋਣ ’ਤੇ ਪੰਚਾਇਤ ਨੇ ਜ਼ੋਰਾ ਸਿੰਘ ਖ਼ਿਲਾਫ਼ ਸ਼ਿਕਾਇਤ ਕਰ ਦਿੱਤੀ। ਇਸ ਸ਼ਿਕਾਇਤ ’ਤੇ ਪੁਲਿਸ ਚੌਕੀ ਕਾਉਂਕੇ ਕਲਾਂ ਦੀ ਪੁਲਿਸ ਨੇ ਉਸ ਨੂੰ ਚੌਕੀ ਬੁਲਾ ਲਿਆ। ਸੋਮਵਾਰ ਸਵੇਰੇ ਪੁਲਿਸ ਦੇ ਚੌਕੀ ਸੱਦਣ ਤੋਂ ਪਰੇਸ਼ਾਨ ਹੋਏ ਜ਼ੋਰਾ ਸਿੰਘ ਨੇ ਘਰ ਵਿਚ ਪਈ ਸਲਫਾਸ ਨਿਗਲ ਲਈ ਤੇ ਉਸਦੀ ਹਾਲਤ ਵਿਗੜੀ ਦੇਖ ਪਰਿਵਾਰਕ ਮੈਂਬਰ ਕਲਿਆਣੀ ਹਸਪਤਾਲ ਜਗਰਾਓਂ ਲੈ ਆਏ। ਇਸ ਦੌਰਾਨ ਹਸਪਤਾਲ ਵਿਚ ਜ਼ੋਰਾ ਸਿੰਘ ਨੇ ਵੀਡੀਓ ਵਿਚ ਵੀ ਇਸ ਘਟਨਾ ਲਈ ਪੰਚਾਇਤ ਵੱਲੋਂ ਤੰਗ ਪਰੇਸ਼ਾਨ ਕਰਨ ਦੇ ਦੋਸ਼ ਲਗਾਏ। ਹਸਪਤਾਲ ਵਿਚ ਕੁਝ ਘੰਟਿਆਂ ਬਾਅਦ ਜ਼ੋਰਾ ਸਿੰਘ ਦੀ ਮੌਤ ਹੋ ਗਈ। ਉਸ ਦੇ ਪੁੱਤਰ ਸੁਖਦੇਵ ਸਿੰਘ ਨੇ ਕਿਹਾ ਕਿ ਉਸ ਦੇ ਪਿਤਾ ਅਤੇ ਉਨ੍ਹਾਂ ਨੂੰ ਪੰਚਾਇਤ ਵੱਲੋਂ ਦਰਖਾਸਤਾਂ ਦੇ ਕੇ ਪੁਲਿਸ ਚੌਕੀ ਵਿਚ ਬੇਇੱਜ਼ਤ ਕਰਵਾਇਆ ਜਾ ਰਿਹਾ ਸੀ। ਬੀਤੀ ਕੱਲ੍ਹ ਪੁਲਿਸ ਚੌਕੀ ਕਾਉਂਕੇ ਕਲਾਂ ਉਨ੍ਹਾਂ ਨੂੰ ਸੱਦਿਆ ਗਿਆ ਪਰ ਦੂਸਰੀ ਧਿਰ ਨੂੰ ਬੁਲਾਇਆ ਤੱਕ ਨਹੀਂ ਗਿਆ। ਦੇਰ ਰਾਤ ਅੱਜ ਫਿਰ ਪੇਸ਼ ਹੋਣ ਦਾ ਕਹਿ ਕੇ ਛੱਡਿਆ ਗਿਆ, ਜਿਸ ਤੋਂ ਪਰੇਸ਼ਾਨ ਹੋਏ ਉਸ ਦੇ ਪਿਤਾ ਨੇ ਆਪਣੀ ਜੀਵਨ ਲੀਲਾ ਸਮਾਪਤ ਕਰ ਲਈ। ਇਸ ਸਬੰਧੀ ਜਗਰਾਓਂ ਥਾਣਾ ਸਦਰ ਦੇ ਮੁਖੀ ਸੁਰਜੀਤ ਸਿੰਘ ਨੇ ਕਿਹਾ ਕਿ ਮ੍ਰਿਤਕ ਦੇ ਪਰਿਵਾਰਕ ਮੈਂਬਰਾਂ ਦੇ ਇਸ ਮਾਮਲੇ ਵਿਚ ਬਿਆਨ ਕਲਮਬੰਦ ਕਰ ਕੇ ਕਾਰਵਾਈ ਕੀਤੀ ਜਾ ਰਹੀ ਹੈ।
