ਅੰਮ੍ਰਿਤਸਰ, 15 ਅਪਰੈਲ-ਮਜੀਠਾ ਥਾਣੇ ਅਧੀਨ ਆਉਂਦੇ ਪਿੰਡ ਕਲੇਰ ਮਾਂਗਟ ਦੇ ਪੈਟਰੋਲ ਪੰਪ ਤੇ ਗੋਲੀਆਂ ਚਲਾ ਕੇ ਗੌਤਮ ਦੀ ਹੱਤਿਆ ਕਰਨ ਵਾਲੇ ਮੁਲਜ਼ਮਾਂ ਦਾ ਪਤਾ ਲਗਾਉਣ ਲਈ ਪੁਲਿਸ ਅੱਡੀ ਚੋਟੀ ਦਾ ਜ਼ੋਰ ਲਗਾ ਰਹੀ ਹੈ। ਪੁਲਿਸ ਨੇ ਕਾਤਲਾਂ ਦਾ ਪਤਾ ਲਗਾਉਣ ਲਈ ਪਿਛਲੇ 18 ਘੰਟਿਆਂ ਵਿਚ 25 ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਚੈੱਕ ਕੀਤੀਆਂ ਹਨ। ਐੱਸਐਸੱਪੀ (ਦਿਹਾਤੀ) ਮਨਿੰਦਰ ਸਿੰਘ ਨੇ ਦਾਅਵਾ ਕੀਤਾ ਕਿ ਮੁਲਜ਼ਮਾਂ ਦੀ ਪਛਾਣ ਕਰਕੇ ਉਨ੍ਹਾਂ ਨੂੰ ਜਲਦੀ ਹੀ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ। ਫਿਲਹਾਲ ਪੁਲਿਸ ਇਸ ਘਟਨਾ ਸਬੰਧੀ ਗੈਂਗਸਟਰ ਅਤੇ ਡਕੈਤੀ ਦੇ ਪਹਿਲੂਆਂ ’ਤੇ ਕੰਮ ਕਰ ਰਹੀ ਹੈ। ਘਟਨਾ ਤੋਂ ਬਾਅਦ ਪੁਲਿਸ ਮੁਲਜ਼ਮਾਂ ਦੇ ਭੱਜਣ ਦੇ ਰੂਟ ਮੈਪ ਦਾ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਦੂਜੇ ਪਾਸੇ, ਗੋਲ਼ੀ ਨਾਲ ਜ਼ਖਮੀ ਹੋਏ ਅਮਿਤ ਦੀ ਹਾਲਤ ਗੰਭੀਰ ਹੈ ਅਤੇ ਅਰਪਨ ਕੁੱਟਮਾਰ ਦੌਰਾਨ ਜ਼ਖਮੀ ਹੋ ਗਿਆ। ਅਮਿਤ ਦੇ ਜਬਾੜੇ ਵਿਚ ਗੋਲੀ ਲੱਗੀ ਹੈ। ਪੁਲਿਸ ਨੇ ਸੋਮਵਾਰ ਦੁਪਹਿਰ ਨੂੰ ਗੌਤਮ ਦਾ ਪੋਸਟਮਾਰਟਮ ਕਰਵਾਇਆ ਅਤੇ ਲਾਸ਼ ਉਸ ਦੇ ਵਾਰਸਾਂ ਨੂੰ ਸੌਂਪ ਦਿੱਤੀ। ਜਾਣਕਾਰੀ ਅਨੁਸਾਰ ਤਿੰਨੇ ਨੌਜਵਾਨ ਸ਼੍ਰੋਮਣੀ ਅਕਾਲੀ ਦਲ ਦੇ ਮੈਂਬਰ ਜੋਧ ਸਿੰਘ ਸਮਰਾ ਦੇ ਪੈਟਰੋਲ ਪੰਪ ਤੇ ਕੰਮ ਕਰਦੇ ਸਨ। ਐਤਵਾਰ ਦੇਰ ਰਾਤ ਨੂੰ ਤਿੰਨ ਨਕਾਬਪੋਸ਼ ਨੌਜਵਾਨ ਇਕ ਕਾਰ ਵਿਚ ਉਸ ਦੇ ਪੰਪ ਤੇ ਪਹੁੰਚੇ। ਮੁਲਜ਼ਮਾਂ ਦਾ ਹੁਲੀਆ ਦੇਖ ਕੇ ਪੰਪ ਦੇ ਤਿੰਨੇ ਸੇਲਜ਼ਮੈਨਾਂ ਨੇ ਪੈਟਰੋਲ ਭਰਨ ਤੋਂ ਇਨਕਾਰ ਕਰ ਦਿੱਤਾ। ਇਸ ਦੌਰਾਨ ਤਿੰਨੋਂ ਨੌਜਵਾਨ ਕਾਰ ਤੋਂ ਹੇਠਾਂ ਉਤਰੇ, ਉਨ੍ਹਾਂ ਵੱਲ ਪਿਸਤੌਲ ਤਾਣ ਦਿੱਤੀ ਅਤੇ ਉਨ੍ਹਾਂ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇਣ ਲੱਗ ਪਏ। ਪੰਪ ਦੇ ਤਿੰਨੇਂ ਮੁਲਾਜ਼ਮ ਸਾਰਾ ਮਾਮਲਾ ਸਮਝ ਗਏ ਅਤੇ ਭੱਜ ਕੇ ਪੰਪ ’ਤੇ ਬਣੇ ਆਪਣੇ ਦਫਤਰ ਵਿਚ ਲੁਕਣ ਲੱਗ ਪਏ। ਤਿੰਨੇ ਬਦਮਾਸ਼ ਉਨ੍ਹਾਂ ਦਾ ਪਿੱਛਾ ਕਰ ਰਹੇ ਸਨ। ਦਫ਼ਤਰ ਦਾ ਦਰਵਾਜ਼ਾ ਬੰਦ ਕਰਨ ਨੂੰ ਲੈ ਕੇ ਦੋਵਾਂ ਧਿਰਾਂ ਵਿਚਕਾਰ ਕਾਫ਼ੀ ਤਕਰਾਰ ਹੋਈ। ਦੋ ਅਪਰਾਧੀ ਪਿਸਤੌਲਾਂ ਨਾਲ ਦਫਤਰ ਵਿਚ ਦਾਖਲ ਹੋ ਚੁੱਕੇ ਸਨ। ਪਰ ਗੌਤਮ, ਅਰਪਨ ਅਤੇ ਅਮਿਤ ਨੇ ਸਖ਼ਤ ਟੱਕਰ ਦਿੱਤੀ ਅਤੇ ਤਿੰਨ ਪਿਸਤੌਲਧਾਰੀ ਅਪਰਾਧੀਆਂ ਨੂੰ ਦਫ਼ਤਰ ਤੋਂ ਬਾਹਰ ਕੱਢ ਦਿੱਤਾ। ਬਾਹਰ ਆਉਣ ਤੋਂ ਬਾਅਦ ਮੁਲਜ਼ਮਾਂ ਨੇ ਗੋਲੀਆਂ ਚਲਾ ਦਿੱਤੀਆਂ। ਇਕ ਗੋਲੀ ਬੰਦ ਦਰਵਾਜ਼ੇ ਵਿੱਚੋਂ ਲੰਘੀ ਅਤੇ ਗੌਤਮ ਦੀ ਛਾਤੀ ਵਿਚ ਅਤੇ ਅਮਿਤ ਦੇ ਜਬਾੜੇ ਵਿਚ ਲੱਗੀ। ਗੌਤਮ ਕਮਰੇ ਵਿਚ ਉਸੇ ਥਾਂ ਡਿੱਗ ਪਿਆ। ਬਦਮਾਸ਼ਾਂ ਦੇ ਭੱਜਣ ਤੋਂ ਬਾਅਦ ਦੋਵਾਂ ਨੂੰ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ। ਜਿੱਥੇ ਗੌਤਮ ਦੀ ਮੌਤ ਹੋ ਗਈ ਸੀ। ——- ਗੌਤਮ ਨੂੰ ਉਸ ਦੀ ਇਮਾਨਦਾਰੀ ਦੇਖ ਦਿੱਤੀ ਸੀ ਨੌਕਰੀ ਪੰਪ ਦੇ ਮਾਲਕ ਤਜਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਇਹ ਪੈਟਰੋਲ ਪੰਪ ਪੰਜ ਸਾਲ ਪਹਿਲਾਂ ਕਿਸੇ ਹੋਰ ਤੋਂ ਖਰੀਦਿਆ ਸੀ। ਗੌਤਮ ਉਸ ਸਮੇਂ ਇੱਥੇ ਕੰਮ ਕਰਦਾ ਸੀ। ਜਦੋਂ ਉਨ੍ਹਾਂ ਨੇ ਕੰਮ ਸ਼ੁਰੂ ਕੀਤਾ, ਤਾਂ ਸਾਰੇ ਮੁਲਾਜ਼ਮਾਂ ਨੂੰ ਨਵੇਂ ਸਿਰਿਓਂ ਕੰਮ ਤੇ ਰੱਖਣਾ ਪਿਆ। ਪਰ ਪੁਰਾਣੇ ਮਾਲਕ ਨੇ ਉਸ ਅੱਗੇ ਇੱਕ ਸ਼ਰਤ ਰੱਖੀ ਕਿ ਉਸ ਨੂੰ ਗੌਤਮ ਨੂੰ ਆਪਣੇ ਕੋਲ ਰੱਖਣਾ ਪਵੇਗਾ। ਉਸ ਨੂੰ ਦੱਸਿਆ ਗਿਆ ਕਿ ਗੌਤਮ ਇਮਾਨਦਾਰ ਹੈ ਅਤੇ ਆਪਣੀ ਇਮਾਨਦਾਰੀ ਲਈ ਆਪਣੀ ਜਾਨ ਵੀ ਕੁਰਬਾਨ ਕਰ ਸਕਦਾ ਸੀ। ਜਦੋਂ ਵੀ ਗੌਤਮ ਛੁੱਟੀ ’ਤੇ ਜਾਂਦਾ ਸੀ, ਉਸ ਦਾ ਪੂਰਾ ਧਿਆਨ ਪੰਪ ’ਤੇ ਹੁੰਦਾ ਸੀ। ਉਹ ਛੁੱਟੀਆਂ ਦੌਰਾਨ ਵੀ ਤੇਜਿੰਦਰ ਸਿੰਘ ਤੋਂ ਪੰਪ ਦੇ ਕਾਰੋਬਾਰ ਬਾਰੇ ਪੁੱਛਦਾ ਅਤੇ ਦੱਸਦਾ ਰਹਿੰਦਾ ਸੀ। ਤੇਜਿੰਦਰ ਸਿੰਘ ਨੇ ਕਿਹਾ ਕਿ ਉਸ ਦੀ ਇਮਾਨਦਾਰੀ ਨੂੰ ਵੇਖਦਿਆਂ, ਉਸ ਨੇ ਕਦੇ ਵੀ ਗੌਤਮ ਦੀ ਦਿਹਾੜੀ ਨਹੀਂ ਕੱਟੀ। ————- ਤਿੰਨ ਬੱਚਿਆਂ ਦਾ ਪਿਤਾ ਸੀ ਗੌਤਮ ਤੇਜਿੰਦਰ ਸਿੰਘ ਨੇ ਦੱਸਿਆ ਕਿ ਉਸ ਨੇ ਗੌਤਮ ਨੂੰ ਆਪਣੇ ਬੱਚੇ ਵਾਂਗ ਰੱਖਿਆ ਸੀ। ਲਗਭਗ ਪੰਦਰਾਂ ਦਿਨ ਪਹਿਲਾਂ ਗੌਤਮ ਦੇ ਘਰ ਤੀਜੀ ਧੀ ਦਾ ਜਨਮ ਹੋਇਆ ਸੀ। ਜਿਵੇਂ ਗੌਤਮ ਆਪਣੇ ਕੰਮ ਪ੍ਰਤੀ ਵਫ਼ਾਦਾਰ ਸੀ, ਉਸੇ ਤਰ੍ਹਾਂ ਉਹ ਆਪਣੇ ਪਰਿਵਾਰ ਪ੍ਰਤੀ ਵੀ ਪੂਰੀ ਤਰ੍ਹਾਂ ਇਮਾਨਦਾਰ ਸੀ।
