ਪਰਿਵਾਰ ਦੀ ਗ਼ਰੀਬੀ ਦੂਰ ਕਰਨ ਗਿਆ ਸੀ, ਔਰਤ ਦੇ ਝਾਂਸੇ ’ਚ ਆ ਕੇ ਰੂਸੀ ਫ਼ੌਜ ’ਚ ਫਸਿਆ ਮੋਗਾ ਦਾ ਨੌਜਵਾਨ

ਮੋਗਾ, 11 ਅਕਤੂਬਰ : ਪਰਿਵਾਰ ਦੀ ਗ਼ਰੀਬੀ ਦੂਰ ਕਰਨ ਰੂਸ ਗਏ ਪਿੰਡ ਚੱਕ ਕਨੀਆਂ ਕਲਾਂ ਦੇ ਨੌਜਵਾਨ ਨੂੰ ਜਬਰੀ ਰੂਸੀ ਫ਼ੌਜ ’ਚ ਭੇਜ ਦਿੱਤਾ ਗਿਆ। ਉੱਥੇ ਜੰਗ ਦੌਰਾਨ ਜ਼ਖਮੀ ਹੋਣ ਤੋਂ ਬਾਅਦ ਉਹ ਰੂਸ ਦੇ ਹਸਪਤਾਲ ’ਚ ਦਾਖ਼ਲ ਹੈ। ਨੌਜਵਾਨ ਦਾ ਪਰਿਵਾਰ ਚਿੰਤਾ ’ਚ ਹੈ ਤੇ ਉਸਨੇ ਵਿਦੇਸ਼ ਮੰਤਰਾਲੇ ਨੂੰ ਨੌਜਵਾਨ ਦੀ ਵਤਨ ਵਾਪਸੀ ਦੀ ਅਪੀਲ ਕੀਤੀ ਹੈ। ਵਿਧਾਨ ਸਭਾ ਹਲਕਾ ਧਰਮਕੋਟ ’ਚ ਪੈਂਦੇ ਪਿੰਡ ਚੱਕ ਕਨੀਆਂ ਕਲਾਂ ਦੇ ਨੌਜਵਾਨ ਬੂਟਾ ਦੀ ਭੈਣ ਨੇ ਭਰਾ ਨਾਲ ਵੀਡੀਓ ਕਾਲ ਕਰ ਕੇ ਗੱਲ ਕੀਤੀ ਤੇ ਹਾਲਾਤ ਜਾਣਨ ਮਗਰੋਂ ਉਸਨੂੰ ਵਾਪਸ ਲਿਆਉਣ ਦੀ ਮੰਗ ਕੀਤੀ। ਬੂਟਾ ਸਿੰਘ ਦੇ ਪਰਿਵਾਰ ਨਾਲ ਸਾਬਕਾ ਵਿਧਾਇਕ ਤੇ ਕਾਂਗਰਸ ਦੇ ਜ਼ਿਲ੍ਹਾ ਪ੍ਰਧਾਨ ਕਾਕਾ ਸੁਖਜੀਤ ਸਿੰਘ ਲੋਹਗੜ੍ਹ ਨੇ ਮੁਲਾਕਾਤ ਕਰ ਕੇ ਸਹਿਯੋਗ ਕਰਨ ਦਾ ਭਰੋਸਾ ਦਿੱਤਾ। ਬੂਟਾ ਸਿੰਘ ਦੀ ਭੈਣ ਕਰਮਜੀਤ ਕੌਰ ਨੇ ਕਿਹਾ ਕਿ ਉਹ ਦੋ ਭੈਣਾਂ ਹਨ। ਉਨ੍ਹਾਂ ਦਾ ਇਕਲੌਤਾ ਭਰਾ ਘਰ ਦੇ ਹਾਲਾਤ ਠੀਕ ਕਰਨ ਲਈ 24 ਅਕਤੂਬਰ 2024 ਨੂੰ ਰੂਸ ਗਿਆ ਸੀ। ਉਨ੍ਹਾਂ ਉੱਥੇ ਅੱਠ ਮਹੀਨੇ ਵਧੀਆ ਕੰਮ ਕੀਤਾ। ਫਿਰ ਕੰਮਕਾਜ ਨਾ ਮਿਲਣ ’ਤੇ ਇਕ ਔਰਤ ਨਾਲ ਤਾਲਮੇਲ ਕੀਤਾ। ਉਸ ਔਰਤ ਨੇ ਬੰਕਰ ਬਣਾਉਣ ਤੇ ਸਾਮਾਨ ਢੋਣ ਦਾ ਕੰਮ ਦਿਵਾਉਣ ਦੀ ਗੱਲ ਕਹੀ। ਉੱਥੋਂ ਉਸਦੇ ਭਰਾ ਨੂੰ ਜਬਰੀ ਰੂਸੀ ਫ਼ੌਜ ’ਚ ਭੇਜ ਦਿੱਤਾ ਗਿਆ। ਉੱਥੇ ਉਹ ਜ਼ਖਮੀ ਹੋ ਗਿਆ। ਉਸਦੀ ਹਾਲਤ ਗੰਭੀਰ ਹੈ। ਉਸਦੀ ਇਕ ਸਰਜਰੀ ਹੋ ਗਈ ਹੈ ਤੇ ਦੂਜੀ ਹੋਣੀ ਹੈ। ਕਰਮਜੀਤ ਕੌਰ ਨੇ ਕਿਹਾ ਕਿ ਉਹ ਖ਼ੁਦ ਦਿੱਲੀ ਗਈ ਸੀ। ਉੱਥੇ ਵਿਦੇਸ਼ ਮੰਤਰਾਲੇ ਨੇ ਉਨ੍ਹਾਂ ਨੂੰ ਸਹਿਯੋਗ ਕਰਨ ਦਾ ਪੂਰਾ ਭਰੋਸਾ ਦਿੱਤਾ ਹੈ। ਕਰਮਜੀਤ ਕੌਰ ਨੇ ਕਿਹਾ ਕਿ ਉਸਦੇ ਭਰਾ ਦੀ ਹਾਲਤ ਜ਼ਿਆਦਾ ਖਰਾਬ ਹੈ। ਹਾਲਾਂਕਿ ਉਹ ਉਨ੍ਹਾਂ ਨੂੰ ਦਿਲਾਸਾ ਦੇ ਰਹੇ ਹਨ ਕਿ ਉਹ ਠੀਕ ਹੈ।