ਅੰਮ੍ਰਿਤਸਰ, 26 ਅਕਤੂਬਰ : ਨਸ਼ੀਲੀ ਦਵਾਈਆਂ ਦੀ ਤਸਕਰੀ ਦੇ ਵੱਡੇ ਮਾਮਲੇ ਵਿਚ ਡਾਕਟਰਾਂ ਤੇ ਵੈੱਬ ਚੈਨਲ ਸੰਚਾਲਕ ਦੀਪਕ ਭੰਡਾਰੀ ਤੋਂ ਬਾਅਦ ਨਾਰਕੋਟਿਕਸ ਕੰਟਰੋਲ ਬਿਊਰੋ (ਐਨਸੀਬੀ) ਨੇ ਹੁਣ ਸਿਹਤ ਵਿਭਾਗ ਦੇ ਮੁਲਾਜਮਾਂ ’ਤੇ ਵੀ ਸ਼ਿਕੰਜਾ ਕੱਸਣਾ ਸ਼ੁਰੂ ਕਰ ਦਿੱਤਾ ਹੈ। ਇਕ ਮੁਲਾਜਮ ਸਿਵਲ ਹਸਪਤਾਲ ਵਿਚ ਡਿਊਟੀ ਕਰ ਚੁੱਕਾ ਹੈ ਅਤੇ ਇਸ ਸਮੇਂ ਗੁਰਦਾਸਪੁਰ ਵਿਚ ਤਾਇਨਾਤ ਹੈ। ਇਕ ਹੋਰ ਸ਼ੱਕੀ ਰਘੂ ਜ਼ਿਆਦਾਤਰ ਅੰਮ੍ਰਿਤਸਰ ਵਿਚ ਸਿਵਲ ਸਰਜਨ ਦਫ਼ਤਰ ਵਿਚ ਡਿਊੂਟੀ ਕਰ ਚੁੱਕਾ ਹੈ ਅਤੇ ਇਸ ਸਮੇਂ ਤਰਨਤਾਰਨ ਜ਼ਿਲ੍ਹੇ ਵਿਚ ਸੇਵਾ ਨਿਭਾ ਰਿਹਾ ਹੈ। ਦੱਸਣਯੋਗ ਹੈ ਕਿ ਵਿਜੀਲੈਂਸ ਬਿਊਰੋ ਨੇ ਪਹਿਲਾਂ ਰਘੂ ਵਿਰੁੱਧ ਪਰਚਾ ਦਰਜ ਕੀਤੀ ਹੈ। ਦੋਸ਼ ਸੀ ਕਿ ਰਘੂ ਆਪਣੇ ਆਕਾ ਤਤਕਾਲੀ ਜ਼ਿਲ੍ਹਾ ਸਿਹਤ ਅਧਿਕਾਰੀ ਡਾ. ਲਖਬੀਰ ਸਿੰਘ ਭਾਗੋਵਾਲੀਆ ਲਈ ਪੈਸੇ ਵਸੂਲਦਾ ਸੀ। ਮਾਮਲਾ ਅਦਾਲਤ ਵਿਚ ਚੱਲ ਰਿਹਾ ਹੈ। ਐਨਸੀਬੀ ਦੇ ਇਕ ਅਧਿਕਾਰੀ ਨੇ ਦੱਸਿਆ ਕਿ ਨਸ਼ੀਲੀ ਦਵਾਈਆਂ ਦੀ ਤਸਕਰੀ ਦੇ ਮਾਮਲੇ ਵਿਚ ਦੀਪਕ ਭੰਡਾਰੀ, ਉਸ ਦੇ ਭਰਾ ਅਨਿਲ ਭੰਡਾਰੀ, ਡਾ. ਜਤਿੰਦਰ ਮਲਹੋਤਰਾ, ਡਾ. ਰਾਜੇਸ਼ ਕੁਮਾਰ, ਡਾ. ਪ੍ਰਵੀਨ ਅਤੇ ਡਾ. ਬੋਧਰਾਜ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਰਘੂ ਨੂੰ ਪੁੱਛਗਿੱਛ ਲਈ ਬੁਲਾਇਆ ਗਿਆ ਸੀ। ਰਘੂ ਆਪਣੇ ਨਾਲ ਦਸ ਤੋਂ ਪੰਦਰਾਂ ਲੋਕਾਂ ਨੂੰ ਲੈ ਕੇ ਆਇਆ ਸੀ, ਪਰ ਉਹ ਪਹਿਲਾਂ ਹੀ ਆਪਣਾ ਮੋਬਾਈਲ ਫ਼ੋਨ ਆਪਣੇ ਨਜ਼ਦੀਕੀ ਸਾਥੀਆਂ ਨੂੰ ਦੇ ਚੁੱਕਾ ਸੀ। ਐਨਸੀਬੀ ਥਾਣੇ ਤੇ ਪਹੁੰਚਣ ਤੇ ਜਾਂਚ ਅਧਿਕਾਰੀ ਨੇ ਪਹਿਲਾਂ ਉਸ ਦਾ ਮੋਬਾਈਲ ਫ਼ੋਨ ਮੰਗਿਆ। ਫਿਰ ਉਸ ਨੂੰ ਵਾਪਸ ਲੈਣ ਲਈ ਹੇਠਾਂ ਭੇਜਿਆ ਗਿਆ। ਪਤਾ ਲੱਗਾ ਹੈ ਕਿ ਐਨਸੀਬੀ ਅਧਿਕਾਰੀਆਂ ਨੇ ਰਘੂ ਦਾ ਮੋਬਾਈਲ ਫ਼ੋਨ ਸੱਤ ਘੰਟੇ ਆਪਣੇ ਕੋਲ ਰੱਖਿਆ। ਐਨਸੀਬੀ ਨੇ ਕਈ ਈਮੇਲ, ਵਟਸਐਪ ਸੁਨੇਹੇ ਅਤੇ ਹੋਰ ਡੇਟਾ ਬਰਾਮਦ ਕੀਤਾ, ਜਿਸ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਅਧਿਕਾਰੀ ਨੇ ਕਿਹਾ ਕਿ ਜਾਂਚ ਰਾਤ 9 ਵਜੇ ਤੱਕ ਪੂਰੀ ਨਹੀਂ ਹੋਈ ਸੀ। ਰਘੂ ਅਤੇ ਹੋਰ ਸ਼ੱਕੀਆਂ ਨੂੰ ਹੁਣ ਲਈ ਰਿਹਾਅ ਕਰ ਦਿੱਤਾ ਗਿਆ ਹੈ। ਐਨਸੀਬੀ ਉਨ੍ਹਾਂ ਨੂੰ ਦੁਬਾਰਾ ਤਲਬ ਕਰ ਸਕਦੀ ਹੈ। ਇਕ ਵੱਡੀ ਕਾਰਵਾਈ ਵਿਚ ਐਨਸੀਬੀ ਨੇ ਡਾ. ਜਤਿੰਦਰ ਮਲਹੋਤਰਾ ਦੀ 25 ਕਰੋੜ ਰੁਪਏ ਦੀ ਜਾਇਦਾਦ, ਲਾਈਫ ਕੇਅਰ ਹਸਪਤਾਲ ਨੂੰ ਵੀ ਸੀਲ ਕਰ ਦਿੱਤਾ ਹੈ। ਦੋਸ਼ ਸੀ ਕਿ ਇਹ ਜਾਇਦਾਦ ਨਸ਼ੇ ਦੀ ਕਮਾਈ ਨਾਲ ਹਾਸਲ ਕੀਤੀ ਗਈ ਸੀ।
