ਦੋਵਾਂ ਦੀ ਵਿਚਾਰਧਾਰਾ ਬਣੀ ਗੈਂਗ ਟੁੱਟਣ ਦਾ ਕਾਰਨ
ਲਾਰੈਂਸ ਗੈਂਗ ਨਾਲ ਜੁੜੇ ਕੁਝ ਲੋਕਾਂ ਤੇ ਪੰਜਾਬ ਪੁਲਿਸ ਦੇ ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਲਾਰੈਂਸ ਲਈ ਕੰਮ ਕਰ ਰਹੇ ਗੈਂਗਸਟਰ ਗੋਲਡੀ ਬਰਾੜ ਦਾ ਉਸ ਤੋਂ ਵੱਖ ਹੋਣ ਦਾ ਸਭ ਤੋਂ ਵੱਡਾ ਕਾਰਨ ਦੋਵਾਂ ਦੀ ਵਿਚਾਰਧਾਰਾ ਹੈ। ਲਾਰੈਂਸ ਭਾਰਤ ’ਚ ਇਕ ਹਿੰਦੂ ਗੈਂਗਸਟਰ ਦੇ ਤੌਰ ’ਤੇ ਆਪਣੇ ਆਪ ਨੂੰ ਦਰਸਾਉਂਦਾ ਹੈ। ਇਹੀ ਕਾਰਨ ਹੈ ਕਿ ਪਹਿਲਗਾਮ ’ਚ ਹੋਏ ਅੱਤਵਾਦੀ ਹਮਲੇ ਤੋਂ ਬਾਅਦ ਗੈਂਗਸਟਰ ਬਿਸ਼ਨੋਈ ਤੇ ਪਾਕਿਸਤਾਨ ਦੇ ਡਾਨ ਭੱਟੀ ਦੋਵੇਂ ਇੰਟਰਨੈੱਟ ਮੀਡੀਆ ’ਤੇ ਆਹਮੋ-ਸਾਹਮਣੇ ਹੋ ਗਏ ਸਨ। ਜਦੋਂਕਿ ਗੋਲਡੀ ਬਰਾੜ ਦੇ ਲਿੰਕ ਖ਼ਾਲਿਸਤਾਨੀ ਅੱਤਵਾਦੀਆਂ ਨਾਲ ਵੀ ਹਨ। ਪੰਜਾਬ ਪੁਲਿਸ ਦੀ ਜਾਂਚ ’ਚ ਕਈ ਵਾਰ ਸਾਹਮਣੇ ਆ ਚੁੱਕਾ ਹੈ ਕਿ ਗੋਲਡੀ ਬਰਾੜ ਖ਼ਾਲਿਸਤਾਨੀ ਅੱਤਵਾਦੀਆਂ ਦੇ ਸੰਪਰਕ ’ਚ ਹੈ।
ਪੰਚਕੂਲਾ ’ਚ ਪਹਿਲਵਾਨ ਦੀ ਹੱਤਿਆ ’ਚ ਕੇਵਲ ਅਨਮੋਲ ਦਾ ਨਾਮ ਆਇਆ
ਹਰਿਆਣਾ ਦੇ ਪੰਚਕੂਲਾ ’ਚ ਬੀਤੇ ਵੀਰਵਾਰ ਨੂੰ ਦੇਰ ਰਾਤ ਪਹਿਲਵਾਨ ਸੋਨੂੰ ਨੌਲਟਾ ਦੀ ਗੋਲ਼ੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ। ਇਹ ਵਾਰਦਾਤ ਖ਼ੁਦ ਨੂੰ ਅਨਮੋਲ ਬਿਸ਼ਨੋਈ ਦਾ ਕਰੀਬੀ ਦੱਸਣ ਵਾਲੇ ਪੀਯੂਸ਼ ਨਾਮ ਦੇ ਨੌਜਵਾਨ ਨੇ ਆਪਣੇ ਹੋਰ ਸਾਥੀਆਂ ਨਾਲ ਮਿਲ ਕੇ ਕੀਤੀ। ਉਕਤ ਵਾਰਦਾਤ ਦੀ ਜ਼ਿੰਮੇਵਾਰੀ ਸੋਸ਼ਲ ਮੀਡੀਆ ’ਤੇ ਪੋਸਟ ਪਾ ਕੇ ਲਈ ਗਈ। ਇਸ ’ਚ ਦੋਸ਼ੀਆਂ ਨੇ ਕਿਹਾ ਕਿ ਇਹ ਵਾਰਦਾਤ ਅਨਮੋਲ ਬਿਸ਼ਨੋਈ ਦੇ ਕਹਿਣ ’ਤੇ ਕੀਤੀ ਗਈ। ਅਜਿਹਾ ਲਾਰੈਂਸ ਦੀ ਤਰਫ਼ੋਂ ਵੀ ਪਹਿਲੀ ਵਾਰ ਹੋਇਆ ਹੈ ਕਿ ਕਿਸੇ ਵਾਰਦਾਤ ’ਚ ਸਿਰਫ਼ ਅਨਮੋਲ ਬਿਸ਼ਨੋਈ ਦਾ ਨਾਮ ਲਿਆ ਗਿਆ ਹੈ। ਲਾਰੈਂਸ ਦਾ ਪੱਖ ਹੁਣ ਬਰਾੜ ਦੀ ਥਾਂ ਅਨਮੋਲ ਨੂੰ ਸਾਰੇ ਗੈਂਗ ਦਾ ਕਰਤਾ-ਧਰਤਾ ਬਣਾਉਣ ਦੀ ਕੋਸ਼ਿਸ਼ ’ਚ ਜੁਟਿਆ ਹੋਇਆ ਹੈ।
ਬੀਤੇ ਦਿਨੀਂ ਕੈਨੇਡਾ ’ਚ ਕਾਰੋਬਾਰੀ ਦੀ ਹੱਤਿਆ ’ਚ ਲਾਰੈਂਸ ਦਾ ਨਾਮ ਸ਼ਾਮਲ ਨਹੀਂ
ਕੈਨੇਡਾ ਦੇ ਮਿਸਿਸਾਗਾ ਸ਼ਹਿਰ ’ਚ 14 ਮਈ, 2025 ਨੂੰ ਟਰੱਕਿੰਗ ਸੇਫ਼ਟੀ ਤੇ ਕੰਪਲਾਈਂਸ ਕਾਰੋਬਾਰੀ ਹਰਜੀਤ ਸਿੰਘ ਧੱਡਾ ਨੂੰ ਦੁਪਹਿਰ ਦੇ ਸਮੇਂ ਗੋਲ਼ੀ ਮਾਰ ਦਿੱਤੀ ਗਈ। ਇਸ ਮਾਮਲੇ ’ਚ ਕੈਨੇਡਾ ਪੁਲਿਸ ਨੇ ਪੰਜਾਬੀ ਮੂਲ ਦੇ 2 ਨੌਜਵਾਨਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਸ ਹੱਤਿਆ ਦੀ ਜ਼ਿੰਮੇਵਾਰੀ ਰੋਹਿਤ ਗੋਦਾਰਾ ਤੇ ਗੋਲਡੀ ਬਰਾੜ ਨੇ ਲਈ ਸੀ। ਕਾਰੋਬਾਰੀ ਧੱਡਾ ਨੂੰ ਫਿਰੌਤੀ ਲਈ ਕਈ ਦਿਨਾਂ ਤੋਂ ਧਮਕੀਆਂ ਮਿਲ ਰਹੀਆਂ ਸਨ। ਇਹ ਹੱਤਿਆ ਇਸ ਲਈ ਵੀ ਖ਼ਾਸ ਹੋ ਜਾਂਦੀ ਹੈ, ਕਿਉਂਕਿ ਇਹ ਪਹਿਲੀ ਵਾਰਦਾਤ ਸੀ, ਜਿਸ ਦੀ ਜ਼ਿੰਮੇਵਾਰੀ ਲੈਂਦੇ ਸਮੇਂ ਬਰਾੜ ਅਤੇ ਗੋਦਾਰਾ ਨੇ ਲਾਰੈਂਸ ਗੈਂਗ ਦਾ ਨਾਮ ਨਹੀਂ ਲਿਆ।
ਟ੍ਰਾਈਸਿਟੀ ਵਿੱਚ ਪਹਿਲਾਂ ਵੀ ਹੋ ਚੁੱਕੀਆਂ ਹਨ ਗੈਂਗਵਾਰ ਦੀਆਂ ਘਟਨਾਵਾਂ
ਟ੍ਰਾਈਸਿਟੀ ਵਿੱਚ ਇਸ ਤੋਂ ਪਹਿਲਾਂ ਵੀ ਗੈਂਗਵਾਰ ਦੀਆਂ ਕਈ ਘਟਨਾਵਾਂ ਦੇਖਣ ਨੂੰ ਮਿਲੀਆਂ ਹਨ। ਇਸ ਵਿੱਚ 10 ਅਕਤੂਬਰ 2020 ਨੂੰ ਗੋਲਡੀ ਬਰਾੜ ਦੇ ਭਰਾ ਗੁਰਲਾਲ ਬਰਾੜ ਦੀ ਗੋਲ਼ੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਇਹ ਘਟਨਾ ਸਿਟੀ ਐਂਪੋਰਿਅਮ ਮਾਲ, ਇੰਡਸਟਰੀ ਏਰੀਆ, ਚੰਡੀਗੜ੍ਹ ਵਿੱਚ ਵਾਪਰੀ ਸੀ। ਗੁਰਲਾਲ ਬਰਾੜ ਦੀ ਹੱਤਿਆ ਦੇ ਦੋਸ਼ ਦਵਿੰਦਰ ਬੰਬੀਹਾ ਗੈਂਗ ‘ਤੇ ਲੱਗੇ ਸਨ। ਇਸ ਦਾ ਬਦਲਾ ਲੈਣ ਲਈ ਹੀ ਮੁਹਾਲੀ ਦੇ ਸੈਕਟਰ 71 ਵਿੱਚ 7 ਅਗਸਤ 2021 ਨੂੰ ਵਿਕੀ ਮਿੱਡੂਖੇੜਾ ਦਾ ਕਤਲ ਕੀਤਾ ਗਿਆ ਸੀ। ਇਹ ਕਤਲ ਵੀ ਗੈਂਗਸਟਰਾਂ ਦੇ ਗਰੁੱਪ ਦਾ ਆਪਸੀ ਝਗੜਾ ਸੀ।
