ਨਵੀਂ ਦਿੱਲੀ, 9 ਜਨਵਰੀ : ਭਾਰਤ ਦੇ ਸਟਾਰ ਆਲਰਾਊਂਡਰ ਹਾਰਦਿਕ ਪਾਂਡਿਆ ਨੇ ਵੀਰਵਾਰ ਨੂੰ ਵਿਜੇ ਹਜ਼ਾਰੇ ਟਰਾਫੀ ਵਿੱਚ ਇੱਕ ਵਾਰ ਫਿਰ ਆਪਣਾ ਤੂਫ਼ਾਨੀ ਅਵਤਾਰ ਦਿਖਾਇਆ। ਪਾਂਡਿਆ ਨੇ ਰਾਜਕੋਟ ਦੇ ਨਿਰੰਜਨ ਸ਼ਾਹ ਸਟੇਡੀਅਮ ਵਿੱਚ ਚੰਡੀਗੜ੍ਹ ਵਿਰੁੱਧ ਐਲੀਟ ਗਰੁੱਪ-ਬੀ ਦੇ ਮੈਚ ਵਿੱਚ ਸਿਰਫ਼ 31 ਗੇਂਦਾਂ ਵਿੱਚ 75 ਦੌੜਾਂ ਠੋਕ ਦਿੱਤੀਆਂ। ਕ੍ਰੁਣਾਲ ਪਾਂਡਿਆ ਦੀ ਅਗਵਾਈ ਵਾਲੀ ਬੜੌਦਾ ਦੀ ਟੀਮ ਵੱਲੋਂ ਹਾਰਦਿਕ ਛੇਵੇਂ ਨੰਬਰ ‘ਤੇ ਬੱਲੇਬਾਜ਼ੀ ਕਰਨ ਉਤਰੇ ਅਤੇ ਮਹਿਜ਼ 19 ਗੇਂਦਾਂ ਵਿੱਚ ਆਪਣਾ ਅਰਧ ਸੈਂਕੜਾ ਪੂਰਾ ਕਰ ਲਿਆ। ਉਨ੍ਹਾਂ ਨੇ 31 ਗੇਂਦਾਂ ਵਿੱਚ 75 ਦੌੜਾਂ ਦੀ ਆਪਣੀ ਪਾਰੀ ਦੌਰਾਨ 9 ਛੱਕੇ ਅਤੇ 2 ਚੌਕੇ ਜੜੇ। 32 ਸਾਲਾ ਹਾਰਦਿਕ ਪਾਂਡਿਆ ਨੇ 241.93 ਦੇ ਸਟ੍ਰਾਈਕ ਰੇਟ ਨਾਲ ਇਹ ਦੌੜਾਂ ਬਣਾਈਆਂ। ਹਾਰਦਿਕ ਪਾਂਡਿਆ ਨੇ ਪ੍ਰਿਆਂਸ਼ੂ ਮੋਲੀਆ (113) ਦੇ ਨਾਲ ਪੰਜਵੀਂ ਵਿਕਟ ਲਈ ਸਿਰਫ਼ 51 ਗੇਂਦਾਂ ਵਿੱਚ 90 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਜ਼ਿਕਰਯੋਗ ਹੈ ਕਿ ਬੜੌਦਾ ਦੀ ਟੀਮ 49.1 ਓਵਰਾਂ ਵਿੱਚ 391 ਦੌੜਾਂ ਬਣਾ ਕੇ ਆਲ ਆਊਟ ਹੋ ਗਈ। ਹਾਰਦਿਕ ਤੋਂ ਇਲਾਵਾ ਓਪਨਰ ਪ੍ਰਿਆਂਸ਼ੂ ਮੋਲੀਆ (113), ਵਿਸ਼ਨੂੰ ਸੋਲੰਕੀ (54) ਅਤੇ ਜਿਤੇਸ਼ ਸ਼ਰਮਾ (73) ਨੇ ਵੀ ਸ਼ਾਨਦਾਰ ਪਾਰੀਆਂ ਖੇਡੀਆਂ।
ਹਾਰਦਿਕ ਦੀ ਸ਼ਾਨਦਾਰ ਫਾਰਮ
ਹਾਰਦਿਕ ਪਾਂਡਿਆ ਨੇ ਮੌਜੂਦਾ ਵਿਜੇ ਹਜ਼ਾਰੇ ਟਰਾਫੀ ਵਿੱਚ ਬਿਹਤਰੀਨ ਪ੍ਰਦਰਸ਼ਨ ਦਿਖਾਇਆ ਹੈ। ਉਨ੍ਹਾਂ ਨੇ ਹਾਲ ਹੀ ਵਿੱਚ ਵਿਦਰਭ ਵਿਰੁੱਧ ਸੈਂਕੜਾ ਜੜਿਆ ਸੀ। ਉਸ ਸਮੇਂ ਹਾਰਦਿਕ ਨੇ 92 ਗੇਂਦਾਂ ਵਿੱਚ 8 ਚੌਕਿਆਂ ਅਤੇ 11 ਛੱਕਿਆਂ ਦੀ ਮਦਦ ਨਾਲ 133 ਦੌੜਾਂ ਬਣਾਈਆਂ ਸਨ। ਹੁਣ ਉਨ੍ਹਾਂ ਨੇ ਚੰਡੀਗੜ੍ਹ ਵਿਰੁੱਧ ਤੂਫ਼ਾਨੀ ਪਾਰੀ ਖੇਡ ਕੇ ਆਪਣੀ ਅਹਿਮੀਅਤ ਸਾਬਤ ਕਰ ਦਿੱਤੀ ਹੈ।
ਨਿਊਜ਼ੀਲੈਂਡ ਵਿਰੁੱਧ ਖੇਡਣਗੇ ਹਾਰਦਿਕ
ਦੱਸ ਦੇਈਏ ਕਿ ਹਾਰਦਿਕ ਪਾਂਡਿਆ ਨੂੰ 10 ਓਵਰਾਂ ਦਾ ਕੋਟਾ ਪੂਰਾ ਨਾ ਕਰ ਸਕਣ ਕਾਰਨ ਨਿਊਜ਼ੀਲੈਂਡ ਵਿਰੁੱਧ ਵਨਡੇ ਸੀਰੀਜ਼ ਲਈ ਭਾਰਤੀ ਟੀਮ ਵਿੱਚ ਜਗ੍ਹਾ ਨਹੀਂ ਮਿਲੀ। ਪਰ, ਉਨ੍ਹਾਂ ਦੀ ਚੋਣ ਕੀਵੀ ਟੀਮ ਵਿਰੁੱਧ ਪੰਜ ਟੀ-20 ਇੰਟਰਨੈਸ਼ਨਲ ਮੈਚਾਂ ਦੀ ਸੀਰੀਜ਼ ਲਈ ਹੋਈ ਹੈ। ਭਾਰਤ ਅਤੇ ਨਿਊਜ਼ੀਲੈਂਡ ਵਿਚਾਲੇ ਟੀ-20 ਸੀਰੀਜ਼ ਦਾ ਆਗਾਜ਼ 21 ਜਨਵਰੀ ਤੋਂ ਹੋਵੇਗਾ। ਹਾਰਦਿਕ ਪਾਂਡਿਆ ਗੇਂਦ ਅਤੇ ਬੱਲੇ ਨਾਲ ਆਪਣੀ ਬਾਦਸ਼ਾਹਤ ਸਾਬਤ ਕਰਨ ਦੀ ਕੋਸ਼ਿਸ਼ ਕਰਨਗੇ।
