ਟੌਣੀਦੇਵੀ (ਹਮੀਰਪੁਰ), 5 ਜੂਨ : ਹਿਮਾਚਲ ਦੇ ਹਮੀਰਪੁਰ ਜ਼ਿਲ੍ਹੇ ਦੇ ਟੌਣੀਦੇਵੀ-ਉਹਲ ਸੜਕ ਮਾਰਗ ‘ਤੇ ਪਿਛਲੀ ਦੇਰ ਰਾਤ ਇਕ ਕਾਰ ਦੁਰਘਟਨਾ ’ਚ ਚਾਰ ਲੋਕ ਜ਼ਖਮੀ ਹੋ ਗਏ। ਜ਼ਖਮੀਆਂ ਵਿਚ ਦੋ ਬੱਚੇ ਅਤੇ ਪਤੀ-ਪਤਨੀ ਸ਼ਾਮਲ ਹਨ। ਗਵਾਰਡੂ ਦੇ ਨੇੜੇ ਹੋਈ ਇਸ ਦੁਰਘਟਨਾ ਦੇ ਬਾਅਦ ਜ਼ਖਮੀਆਂ ਨੂੰ ਨਿੱਜੀ ਗੱਡੀ ਵਿਚ ਟੌਣੀਦੇਵੀ ਹਸਪਤਾਲ ਪਹੁੰਚਾਇਆ ਗਿਆ। ਕਾਰ ਨੰਬਰ ਐਚਪੀ 12 ਸੀ – 5499 ਵਿਚ ਸਵਾਰ ਚਾਰ ਲੋਕ ਬਿਲਾਸਪੁਰ ਜ਼ਿਲ੍ਹੇ ਦੇ ਕੁਠੇੜਾ ਤੋਂ ਉਹਲ ਦੇ ਨੇੜੇ ਬਕਨਯਾਰ ਪਿੰਡ ਵਿਚ ਲੇਖ ਰਾਜ ਦੀ ਧੀ ਦੇ ਵਿਆਹ ਵਿਚ ਸ਼ਾਮਲ ਹੋਣ ਜਾ ਰਹੇ ਸਨ। ਦੱਸਿਆ ਜਾ ਰਿਹਾ ਹੈ ਕਿ ਜ਼ਖਮੀ ਪਤੀ-ਪਤਨੀ ਲੇਖ ਰਾਜ ਦੇ ਸਮਧੀ ਅਤੇ ਸਮਧਨ ਹਨ। ਹਸਪਤਾਲ ’ਚ ਜ਼ਖਮੀਆਂ ਨੂੰ ਪ੍ਰਾਇਮਰੀ ਇਲਾਜ ਦਿੱਤਾ ਗਿਆ। ਜਾਣਕਾਰੀ ਮਿਲਣ ’ਤੇ ਹਸਪਤਾਲ ਵਿਚ ਪੁਲਿਸ ਵੀ ਪਹੁੰਚੀ। ਪੁਲਿਸ ਤੋਂ ਮਿਲੀ ਜਾਣਕਾਰੀ ਦੇ ਅਨੁਸਾਰ, ਸਾਰੇ ਜ਼ਖਮੀ ਲੋਕਾਂ ਨੂੰ ਪ੍ਰਾਇਮਰੀ ਇਲਾਜ ਦੇ ਬਾਅਦ ਮੈਡੀਕਲ ਕਾਲਜ ਹਸਪਤਾਲ ਹਮੀਰਪੁਰ ਰੈਫਰ ਕਰ ਦਿੱਤਾ ਗਿਆ। ਜ਼ਖਮੀਆਂ ਵਿਚ ਰਾਜੇਸ਼, ਲਤਾ ਕੁਮਾਰੀ, ਨਿਤਿਆਂਸ਼ ਅਤੇ ਅਨਨਿਆ ਸ਼ਾਮਲ ਹਨ। ਸਾਰੇ ਜ਼ਖਮੀ ਪਿੰਡ ਡੁਗਲੀ ਡਾਕਘਰ ਬਰੜੀ (ਕੁਠੇੜਾ) ਘੁਮਾਰਵੀਂ ਦੇ ਹਨ। ਬੱਚਿਆਂ ਨੂੰ ਜ਼ਿਆਦਾ ਸੱਟਾਂ ਲੱਗੀਆਂ ਹਨ। ਫਿਲਹਾਲ ਜ਼ਖਮੀਆਂ ਦੀ ਸਥਿਤੀ ਖਤਰੇ ਤੋਂ ਬਾਹਰ ਦੱਸੀ ਜਾ ਰਹੀ ਹੈ।
