ਸ਼ਿਲਾਂਗ (ਮੇਘਾਲਿਆ), 10 ਜੂਨ : ਰਾਜਾ ਰਘੂਵੰਸ਼ੀ ਮਰਡਰ ਕੇਸ ਵਿਚ ਸੋਨਮ ਰਘੂਵੰਸ਼ੀ ਸਮੇਤ ਸਾਰੇ ਦੋਸ਼ੀਆਂ ਨੂੰ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਪੁਲਿਸ ਸਾਰੇ ਦੋਸ਼ੀਆਂ ਨਾਲ ਗੱਲਬਾਤ ਕਰ ਰਹੀ ਹੈ। ਇਸ ਕੇਸ ਵਿਚ ਇਕ ਹੋਰ ਵੱਡਾ ਖੁਲਾਸਾ ਹੋਇਆ ਹੈ। ਸੋਨਮ ਨੂੰ ਆਪਣੇ ਪਤੀ ਰਾਜਾ ਰਘੂਵੰਸ਼ੀ ਨਾਲ ਰਹਿਣਾ ਪਸੰਦ ਨਹੀਂ ਸੀ। ਇਸ ਦੀ ਜਾਣਕਾਰੀ ਸੋਨਮ ਨੇ ਆਪਣੇ ਬੁਆਏਫ੍ਰੈਂਡ ਰਾਜ ਕੁਸ਼ਵਾਹਾ ਨੂੰ ਵੀ ਦਿੱਤੀ ਸੀ। ਸੋਨਮ ਦੇ ਫੋਨ ਤੋਂ ਪਤਾ ਲੱਗਾ ਹੈ ਕਿ ਉਸਨੇ ਆਪਣੇ ਪ੍ਰੇਮੀ ਰਾਜ ਕੁਸ਼ਵਾਹਾ ਨੂੰ ਮੈਸੇਜ ਕਰਕੇ ਇਹ ਗੱਲ ਦੱਸੀ ਸੀ। ਸੋਨਮ ਨੇ ਰਾਜ ਨੂੰ ਕਿਹਾ ਸੀ ਕਿ ਉਸਨੂੰ ਆਪਣੇ ਪਤੀ ਨਾਲ ਸਰੀਰਕ ਸੰਬੰਧ ਬਣਾਉਣਾ ਪਸੰਦ ਨਹੀਂ ਹੈ। ਸੋਨਮ ਨੇ ਵਿਆਹ ਦੇ ਬਾਅਦ ਜਦੋਂ ਰਾਜ ਨੂੰ ਇਹ ਸਭ ਦੱਸਿਆ, ਉਸ ਤੋਂ ਬਾਅਦ ਹੀ ਰਾਜ ਅਤੇ ਸੋਨਮ ਨੇ ਮਿਲ ਕੇ ਰਾਜਾ ਨੂੰ ਮਾਰਨ ਦੀ ਸਾਜ਼ਿਸ਼ ਬਣਾਈ ਸੀ। ਵਿਆਹ ਦੇ ਬਾਅਦ ਸੋਨਮ ਲਗਾਤਾਰ ਆਪਣੇ ਪ੍ਰੇਮੀ ਰਾਜ ਨਾਲ ਸੰਪਰਕ ਵਿਚ ਰਹੀ। ਸੋਨਮ ਨੇ ਰਾਜ ਨੂੰ ਸੁਝਾਅ ਦਿੱਤਾ ਕਿ ਰਾਜਾ ਦਾ ਕਤਲ ਕਰਨ ਦੇ ਬਾਅਦ ਉਹ ਵਿਧਵਾ ਹੋ ਜਾਵੇਗੀ ਅਤੇ ਫਿਰ ਉਸ ਨਾਲ ਵਿਆਹ ਕਰ ਲਵੇਗੀ।
ਸੋਨਮ ਨੇ ਸਾਂਝੀ ਕੀਤੀ ਪਲ-ਪਲ ਦੀ ਲੋਕੇਸ਼ਨ
ਇਸ ਸਾਜਿਸ਼ ਨੂੰ ਅੰਜਾਮ ਦੇਣ ਲਈ ਸੋਨਮ ਰਘੂਵੰਸ਼ੀ ਆਪਣੇ ਪਤੀ ਰਾਜਾ ਰਘੂਵੰਸ਼ੀ ਨਾਲ ਹਨੀਮੂਨ ਮਨਾਉਣ ਮੇਘਾਲਿਆ ਪਹੁੰਚੀ ਅਤੇ ਤਿੰਨ ਸੁਪਾਰੀ ਕਿਲਰਾਂ ਨੂੰ ਉਥੇ ਬੁਲਾਇਆ। ਸੋਨਮ ਲਗਾਤਾਰ ਆਪਣੇ ਬੁਆਫ੍ਰੈਂਡ ਰਾਜ ਅਤੇ ਤਿੰਨ ਦੋਸ਼ੀਆਂ ਨਾਲ ਆਪਣੀ ਲੋਕੇਸ਼ਨ ਸਾਂਝੀ ਕਰ ਰਹੀ ਸੀ, ਜਿਸਨੂੰ ਫਾਲੋ ਕਰਦੇ ਹੋਏ ਸੁਪਾਰੀ ਕਿਲਰ ਮੌਕੇ ‘ਤੇ ਪਹੁੰਚੇ ਅਤੇ ਰਾਜਾ ਦੀ ਹੱਤਿਆ ਕਰ ਦਿੱਤੀ।
ਪੁਲਿਸ ਨੂੰ ਚਾਕੂ ਤੋਂ ਮਿਲਿਆ ਸੁਰਾਗ
ਰਾਜਾ ਦੀ ਲਾਸ਼ ਮਿਲਣ ਦੇ ਬਾਅਦ ਜਦੋਂ ਸ਼ਿਲਾਂਗ ਪੁਲਿਸ ਨੇ ਜਾਂਚ ਸ਼ੁਰੂ ਕੀਤੀ ਤਾਂ ਮੌਕੇ ਤੋਂ ਇਕ ਚਾਕੂ ਬਰਾਮਦ ਹੋਇਆ। ਇਸੇ ਚਾਕੂ ਨਾਲ ਪੁਲਿਸ ਨੂੰ ਕਿਸੇ ਬਾਹਰੀ ਵਿਅਕਤੀ ਦੇ ਹੋਣ ਦਾ ਸੁਰਾਗ ਮਿਲਿਆ। ਸ਼ਿਲਾਂਗ ਪੁਲਿਸ ਦੇ ਇਕ ਅਧਿਕਾਰੀ ਦੇ ਅਨੁਸਾਰ, ਇਸ ਤਰ੍ਹਾਂ ਦਾ ਚਾਕੂ ਸਥਾਨਕ ਥਾਵਾਂ ‘ਤੇ ਨਹੀਂ ਮਿਲਦਾ। ਇਸੇ ਕਾਰਨ ਪੁਲਿਸ ਨੂੰ ਸ਼ੱਕ ਹੋਇਆ ਕਿ ਰਾਜਾ ਦੀ ਹੱਤਿਆ ਕਿਸੇ ਸਥਾਨਕ ਵਿਅਕਤੀ ਨੇ ਨਹੀਂ, ਸਗੋਂ ਬਾਹਰੀ ਰਾਜ ਤੋਂ ਆਏ ਵਿਅਕਤੀ ਨੇ ਕੀਤੀ ਹੈ।
ਦੋਸ਼ੀਆਂ ਤੱਕ ਪੁਲਿਸ ਕਿਵੇਂ ਪੁੱਜੀ?
ਚਾਕੂ ਮਿਲਣ ਦੇ ਬਾਅਦ ਪੁਲਿਸ ਨੇ ਕਾਤਿਲ ਤੱਕ ਪਹੁੰਚਣ ਲਈ ਰਾਜਾ ਅਤੇ ਸੋਨਮ ਦੀਆਂ ਕਾਲ ਡੀਟੇਲਜ਼ ਖੰਗਾਲੀਆਂ। ਤਦ ਪੁਲਿਸ ਨੂੰ ਪਤਾ ਲੱਗਾ ਕਿ ਸੋਨਮ ਆਪਣੇ ਪ੍ਰੇਮੀ ਰਾਜ ਦੇ ਸੰਪਰਕ ਵਿਚ ਸੀ ਅਤੇ ਰਾਜ ਵੀ ਸਾਰੇ ਦੋਸ਼ੀਆਂ ਦੇ ਸੰਪਰਕ ਵਿਚ ਸੀ। ਇਸ ਕੜੀ ਵਿਚ ਪੁਲਿਸ ਨੇ ਪਹਿਲਾਂ ਸਾਰੇ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕੀਤਾ।
