ਮੂੰਹ ਬੋਲੇ ਚਾਚਾ ਨੇ ਜ਼ਬਰ-ਜਿਨਾਹ ਕਰਕੇ ਕੀਤੀ ਭਤੀਜੀ ਦੀ ਹੱਤਿਆ

ਜਲੰਧਰ, 24 ਨਵੰਬਰ : ਬਸਤੀ ਬਾਵਾ ਖੇਲ ਦੇ ਪਾਰਸ ਅਸਟੇਟ ’ਚ 13 ਸਾਲਾ ਬੱਚੀ ਦੀ ਹੱਤਿਆ ਉਸ ਦੇ ਮੂੰਹ-ਬੋਲੇ ਚਾਚੇ ਨੇ ਗਲ਼ਾ ਘੁੱਟ ਕੇ ਕੀਤੀ। ਹੱਤਿਆ ਤੋਂ ਪਹਿਲਾਂ ਮੁਲਜ਼ਮ ਨੇ ਬੱਚੀ ਨਾਲ ਜਬਰ-ਜਨਾਹ ਵੀ ਕੀਤਾ। ਥਾਣਾ ਬਸਤੀ ਬਾਵਾ ਖੇਲ ਦੀ ਪੁਲਿਸ ਨੇ ਮੁਲਜ਼ਮ ਹਰਮਿੰਦਰ ਸਿੰਘ ਰਿੰਪੀ, ਜੋ ਇਕ ਪ੍ਰਾਈਵੇਟ ਸਕੂਲ ਦਾ ਬੱਸ ਚਾਲਕ ਹੈ, ਨੂੰ ਕਾਬੂ ਕਰ ਕੇ ਉਸ ’ਤੇ ਕਤਲ ਤੇ ਪੋਕਸੋ ਐਕਟ ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ। ਉਕਤ ਮੁਲਜ਼ਮ ਮ੍ਰਿਤਕ ਬੱਚੀ ਦੇ ਪਿਤਾ ਦਾ ਕਰੀਬੀ ਦੋਸਤ ਸੀ। ਮੁਲਜ਼ਮ ਨੂੰ ਸਿਵਲ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ ਹੈ। ਏਡੀਸੀਪੀ ਹਰਿੰਦਰ ਸਿੰਘ ਗਿੱਲ ਨੇ ਦੱਸਿਆ ਕਿ ਮੁਲਜ਼ਮ ਫਿਲਹਾਲ ਬਿਆਨ ਦੇਣ ਦੇ ਯੋਗ ਨਹੀਂ ਹੈ। ਉਸ ਨੂੰ ਪੁਲਿਸ ਕਸਟਡੀ ’ਚ ਰੱਖਿਆ ਗਿਆ ਹੈ ਤੇ ਠੀਕ ਹੋਣ ’ਤੇ ਗ੍ਰਿਫ਼ਤਾਰ ਕੀਤਾ ਜਾਵੇਗਾ। ਇਸ ਮਾਮਲੇ ’ਚ ਲਾਪਰਵਾਹੀ ਕਰਨ ’ਤੇ ਏਐੱਸਆਈ ਮੰਗਤ ਰਾਮ ਨੂੰ ਸਸਪੈਂਡ ਕਰ ਦਿੱਤਾ ਗਿਆ ਹੈ। ਉਸ ’ਤੇ ਦੋਸ਼ ਹੈ ਕਿ ਲੜਕੀ ਦੇ ਗੁੰਮ ਹੋਣ ਦੀ ਸ਼ਿਕਾਇਤ ਮਿਲਣ ’ਤੇ ਉਸ ਨੇ ਢੰਗ ਨਾਲ ਕਾਰਵਾਈ ਨਹੀਂ ਕੀਤੀ। ਲੋਕਾਂ ਨੇ ਮੁਲਜ਼ਮ ਦੇ ਘਰ ’ਚ ਬੱਚੀ ਹੋਣ ਦਾ ਸ਼ੱਕ ਜਤਾਇਆ ਸੀ, ਫਿਰ ਵੀ ਏਐੱਸਆਈ ਨੇ ਘਰ ਦੀ ਢੰਗ ਨਾਲ ਤਲਾਸ਼ੀ ਨਹੀਂ ਲਈ। ਲੜਕੀ ਦੀ ਦੇਹ ਦਾ ਪੋਸਟਮਾਰਟਮ ਡਾਕਟਰਾਂ ਦੇ ਬੋਰਡ ਤੋਂ ਕਰਵਾਇਆ ਗਿਆ। ਗਲੇ ’ਤੇ ਉਂਗਲੀਆਂ ਦੇ ਨਿਸ਼ਾਨ ਮਿਲੇ ਹਨ, ਜਿਸ ਤੋਂ ਲੱਗਦਾ ਹੈ ਕਿ ਗਲ਼ਾ ਘੁੱਟਿਆ ਗਿਆ। ਬਾਕੀ ਸੱਚਾਈ ਰਿਪੋਰਟ ਆਉਣ ’ਤੇ ਸਾਹਮਣੇ ਆਏਗੀ। ਇਸ ਦੌਰਾਨ ਮੇਅਰ ਵਿਨੀਤ ਧੀਰ, ਸਾਬਕਾ ਵਿਧਾਇਕ ਸ਼ੀਤਲ ਅੰਗੁਰਾਲ, ਮੰਤਰੀ ਮੋਹਿੰਦਰ ਭਗਤ ਦੇ ਪੁੱਤਰ ਅਤੁਲ ਭਗਤ, ਕੌਂਸਲਰ ਪਤੀ ਸੌਰਵ ਸੇਠ ਸਮੇਤ ਕਈ ਰਾਜਨੀਤਿਕ ਹਸਤੀਆਂ ਮੌਕੇ ’ਤੇ ਪਹੁੰਚੀਆਂ ਤੇ ਹਾਦਸੇ ’ਤੇ ਦੁੱਖ ਪ੍ਰਗਟਾਇਆ। ਘਰੋਂ ਟਹਿਲਣ ਗਈ ਬੱਚੀ ਨਹੀਂ ਪਰਤੀ ਪਰਿਵਾਰ ਮੁਤਾਬਕ ਬੱਚੀ ਸ਼ਾਮ 4 ਵਜੇ ਟਹਿਲਣ ਲਈ ਨਿਕਲੀ ਸੀ, ਪਰ ਵਾਪਸ ਨਾ ਆਈ। ਤਲਾਸ਼ ਦੌਰਾਨ ਮਿਲੇ ਸੀਸੀਟੀਵੀ ਫੁਟੇਜ ’ਚ ਉਹ ਮੁਲਜ਼ਮ ਰਿੰਪੀ ਸਿੰਘ ਦੇ ਘਰ ’ਚ ਜਾਂਦੀ ਤਾਂ ਦਿਸੀ ਪਰ ਬਾਹਰ ਆਉਂਦੀ ਨਹੀਂ ਦਿਸੀ। ਮੁਲਜ਼ਮ ਦੀ ਪਤਨੀ ਨੇ ਫ਼ੋਨ ’ਤੇ ਦੱਸਿਆ ਕਿ ਉਹ ਪੇਕੇ ਹੈ। ਗੁਆਂਢੀਆਂ ਨੇ ਦੱਸਿਆ ਕਿ ਮੁੱਖ ਦਰਵਾਜ਼ਾ ਅੰਦਰੋਂ ਬੰਦ ਸੀ। ਪਤਾ ਲੱਗਾ ਕਿ ਮੁਲਜ਼ਮ ਦਾ ਆਪਣੀ ਪਤਨੀ ਨਾਲ ਦੋ ਦਿਨ ਪਹਿਲਾਂ ਝਗੜਾ ਹੋਇਆ ਸੀ ਤੇ ਉਹ ਘਰ ਛੱਡ ਕੇ ਚਲੀ ਗਈ ਸੀ। ਬੱਚੀ ਮੁਲਜ਼ਮ ਦੀ ਧੀ ਦੀ ਸਹੇਲੀ ਸੀ। ਉਹ ਸ਼ਾਮ ਨੂੰ ਉਸ ਦੇ ਘਰ ਗਈ ਪਰ ਜਦੋਂ 10 ਵਜੇ ਤੱਕ ਵਾਪਸ ਨਾ ਆਈ ਤਾਂ ਪਰਿਵਾਰ ਨੇ ਬੱਚੀ ਨੂੰ ਲੱਭਣਾ ਸ਼ੁਰੂ ਕੀਤਾ। ਸੀਸੀਟੀਵੀ ਦੇਖਣ ’ਤੇ ਪਤਾ ਲੱਗਾ ਕਿ ਉਹ ਘਰ ’ਚ ਗਈ ਸੀ ਪਰ ਨਿਕਲੀ ਨਹੀਂ। ਪਰਿਵਾਰ ਜਦੋਂ ਘਰ ਪਹੁੰਚਿਆ ਤਾਂ ਮੁਲਜ਼ਮ ਨੇ ਕਿਹਾ ਕਿ ਬੱਚੀ ਉਸ ਦੇ ਘਰ ਨਹੀਂ। ਪੁਲਿਸ ਵੀ ਆਈ ਪਰ ਤਲਾਸ਼ ਬਿਨਾਂ ਹੀ ਵਾਪਸ ਚਲੀ ਗਈ। ਪਰਿਵਾਰ ਨੂੰ ਸ਼ੱਕ ਸੀ, ਇਸ ਲਈ ਉਨ੍ਹਾਂ ਜ਼ਬਰਦਸਤੀ ਘਰ ’ਚ ਦਾਖ਼ਲ ਹੋ ਕੇ ਤਲਾਸ਼ ਕੀਤੀ ਤਾਂ ਬੱਚੀ ਬਾਥਰੂਮ ’ਚ ਮ੍ਰਿਤਕ ਮਿਲੀ। ਇਸ ਤੋਂ ਬਾਅਦ ਉੱਚ ਅਧਿਕਾਰੀਆਂ ਨੇ ਏਐੱਸਆਈ ਮੰਗਤ ਰਾਮ ਨੂੰ ਤੁਰੰਤ ਸਸਪੈਂਡ ਕਰ ਦਿੱਤਾ। ਭੜਕੀ ਭੀੜ ਨੇ ਮੁਲਜ਼ਮ ਨੂੰ ਸਾੜਨ ਦੀ ਕੋਸ਼ਿਸ਼ ਕੀਤੀ ਪਰ ਮਾਚਿਸ ਨੇ ਸਾਥ ਨਹੀਂ ਦਿੱਤਾ ਗੁੱਸੇ ’ਚ ਆਈ ਭੀੜ ਨੇ ਮੁਲਜ਼ਮ ਨੂੰ ਘਰੋਂ ਕੱਢ ਕੇ ਬੇਰਹਿਮੀ ਨਾਲ ਕੁੱਟਿਆ। ਕੁਝ ਲੋਕਾਂ ਨੇ ਉਸ ’ਤੇ ਤੇਲ ਵੀ ਪਾ ਦਿੱਤਾ ਪਰ ਮਾਚਿਸ ਨਹੀਂ ਜਲੀ। ਪੁਲਿਸ ਪਾਰਟੀ ਤੇ ਕੁਝ ਸਹੀ ਸੋਚ ਵਾਲੇ ਲੋਕਾਂ ਨੇ ਮਾਮਲਾ ਰੋਕਿਆ। ਮੁਲਜ਼ਮ ਗੰਭੀਰ ਜ਼ਖ਼ਮੀ ਹੈ ਤੇ ਹਸਪਤਾਲ ’ਚ ਦਾਖ਼ਲ ਹੈ। ਮੌਕੇ ’ਤੇ ਪਹੁੰਚੇ ਅਧਿਕਾਰੀਆਂ ਨੇ ਲੋਕਾਂ ਨੂੰ ਸ਼ਾਂਤ ਕੀਤਾ ਪਰ ਭੀੜ ਉਸ ਨੂੰ ਫਾਂਸੀ ਦੇਣ ਦੇ ਨਾਅਰੇ ਲਗਾਉਂਦੀ ਰਹੀ। ਮੰਗਤ ਰਾਮ ’ਤੇ ਵੀ ਨਿਕਲਿਆ ਭੀੜ ਦਾ ਗੁੱਸਾ ਜਦੋਂ ਏਐੱਸਆਈ ਮੰਗਤ ਰਾਮ ਸ਼ਿਕਾਇਤ ਮਿਲਣ ਤੋਂ ਬਾਅਦ ਲੜਕੀ ਨੂੰ ਲੱਭਣ ਗਿਆ ਤਾਂ ਉਸ ਨੂੰ ਉਹ ਨਹੀਂ ਮਿਲੀ। ਲੋਕਾਂ ਨੇ ਦੋਸ਼ ਲਾਇਆ ਕਿ ਮੰਗਤ ਇਹ ਕਹਿ ਕੇ ਚਲਾ ਗਿਆ ਸੀ ਕਿ ਉਹ ਸਵੇਰੇ ਵਾਪਸ ਆਵੇਗਾ। ਜਦੋਂ ਲੜਕੀ ਦੀ ਲਾਸ਼ ਮਿਲੀ ਤਾਂ ਮੰਗਤ ਵਾਪਸ ਆਇਆ ਤੇ ਲੋਕਾਂ ਨੇ ਉਸ ’ਤੇ ਆਪਣਾ ਗੁੱਸਾ ਜ਼ਾਹਰ ਕੀਤਾ। ਲੋਕਾਂ ਨੇ ਦੋਸ਼ ਲਾਇਆ ਕਿ ਮੰਗਤ ਨੇ ਲਾਪਰਵਾਹੀ ਕੀਤੀ ਸੀ। ਇਹ ਸੰਭਵ ਸੀ ਕਿ ਲੜਕੀ ਜ਼ਿੰਦਾ ਹੁੰਦੀ, ਪਰ ਉਸ ਨੇ ਕੋਸ਼ਿਸ਼ ਨਹੀਂ ਕੀਤੀ। ਬਾਅਦ ’ਚ ਲੋਕਾਂ ਨੇ ਮੁਲਜ਼ਮ ’ਤੇ ਪੈਟਰੋਲ ਛਿੜਕਿਆ ਤੇ ਲੜਕੀ ਦੀ ਮਾਂ ਨੂੰ ਮਾਚਿਸ ਦੀ ਤੀਲੀ ਦਿੱਤੀ। ਅੱਗ ਨਹੀਂ ਲੱਗੀ, ਪਰ ਲੋਕਾਂ ਨੇ ਦਖ਼ਲ ਦਿੱਤਾ। ਇਸ ਦੌਰਾਨ ਮ੍ਰਿਤਕਾ ਦੀ ਮਾਂ ਮੁਲਜ਼ਮ ਨੂੰ ਕੁੱਟਦੀ ਰਹੀ ਤੇ ਸਵਾਲ ਕੀਤਾ ਕਿ ਉਸਦੀ ਧੀ ਦਾ ਕੀ ਕਸੂਰ ਸੀ। ਇਕ ਸਾਲ ਪਹਿਲਾਂ ਪਿਤਾ ਦੀ ਮੌਤ, ਪਰਿਵਾਰ ਇਨਸਾਫ਼ ਦੀ ਗੁਹਾਰ ਲਗਾ ਰਿਹਾ 13 ਸਾਲਾ ਮ੍ਰਿਤਕ ਬੱਚੀ ਆਪਣੀ ਮਾਂ ਤੇ ਇਕ ਭਰਾ ਨਾਲ ਰਹਿੰਦੀ ਸੀ। ਪਿਤਾ ਦੀ ਇਕ ਸਾਲ ਪਹਿਲਾਂ ਮੌਤ ਹੋ ਚੁੱਕੀ ਹੈ। ਲਾਸ਼ ਮਿਲਣ ਤੋਂ ਬਾਅਦ ਮਾਂ ਬੇਹੋਸ਼ ਹੋ ਗਈ ਤੇ ਰੋਂਦੀ ਹੋਈ ਕਹਿੰਦੀ ਰਹੀ ‘ਮੇਰੀ ਬੱਚੀ ਨਾਲ ਕੀ ਹੋਇਆ… ਮੈਂ ਵੀ ਉਸ ਦੇ ਨਾਲ ਜਾਣਾ ਚਾਹੁੰਦੀ ਹਾਂ।’ ਲੋਕਾਂ ਨੇ ਮੁਲਜ਼ਮ ਨੂੰ ਸਖ਼ਤ ਤੋਂ ਸਖ਼ਤ ਸਜ਼ਾ ਦੇਣ ਦੀ ਮੰਗ ਕੀਤੀ। ਮੌਕੇ ’ਤੇ ਪਹੁੰਚੇ ਅਫ਼ਸਰ ਵੀ ਹੋਏ ਭਾਵੁਕ ਜਦੋਂ ਏਡੀਸੀਪੀ ਹਰਿੰਦਰ ਸਿੰਘ ਗਿਲ ਤੇ ਏਡੀਸੀਪੀ ਆਕਰਸ਼ੀ ਜੈਨ ਮੌਕੇ ’ਤੇ ਪਹੁੰਚੇ ਤਾਂ ਬੱਚੀ ਦੀ ਮਾਂ ਦੀ ਹਾਲਤ ਦੇਖ ਕੇ ਉਹ ਵੀ ਭਾਵੁਕ ਹੋ ਗਏ। ਡਾਕਟਰ ਵੀ ਪੋਸਟਮਾਰਟਮ ਦੌਰਾਨ ਪੀੜਤ ਬੱਚੀ ਦੀ ਹਾਲਤ ਵੇਖ ਕੇ ਭਾਵੁਕ ਹੋਏ।