ਧੁੰਦ ਦਾ ਕਹਿਰ! ਯਮੁਨਾ ਐਕਸਪ੍ਰੈਸਵੇਅ ‘ਤੇ ਕਈ ਵਾਹਨ ਆਪਸ ‘ਚ ਟਕਰਾਏ

ਮਥੁਰਾ, 16 ਦਸੰਬਰ : ਸੋਮਵਾਰ ਰਾਤ ਲਗਪਗ ਦੋ ਵਜੇ ਯਮੁਨਾ ਐਕਸਪ੍ਰੈਸਵੇਅ ‘ਤੇ ਆਗਰਾ ਤੋਂ ਨੋਇਡਾ ਜਾਣ ਵਾਲੀ ਲੇਨ ‘ਤੇ ਸੰਘਣੀ ਧੁੰਦ ਵਿੱਚ ਤੇਜ਼ ਰਫ਼ਤਾਰ ਨਾਲ ਦੌੜ ਰਹੇ ਕਈ ਵਾਹਨ ਆਪਸ ਵਿੱਚ ਟਕਰਾ ਗਏ। ਸੱਤ ਬੱਸਾਂ ਅਤੇ ਦੋ ਕਾਰਾਂ ਨੂੰ ਭਿਆਨਕ ਅੱਗ ਲੱਗ ਗਈ। ਕਈ ਲੋਕ ਵਾਹਨਾਂ ਦੇ ਅੰਦਰ ਫਸ ਗਏ, ਕੁਝ ਨੇ ਬੱਸਾਂ ਵਿੱਚੋਂ ਛਾਲ ਮਾਰ ਕੇ ਆਪਣੀ ਜਾਨ ਬਚਾਈ। ਹੁਣ ਤੱਕ ਚਾਰ ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਹੋਈ ਹੈ। ਲਗਪਗ 150 ਤੋਂ ਵੱਧ ਜ਼ਖਮੀਆਂ ਨੂੰ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ। ਇੱਥੇ ਸੰਘਣੀ ਧੁੰਦ ਹੋਣ ਕਾਰਨ ਰਾਤ ਨੂੰ ਵਿਜ਼ੀਬਿਲਟੀ ਸਿਫ਼ਰ ਸੀ। ਇਸ ਕਾਰਨ ਅੱਗੇ-ਪਿੱਛੇ ਚੱਲ ਰਹੇ ਵਾਹਨਾਂ ਦੇ ਡਰਾਈਵਰ ਇੱਕ-ਦੂਜੇ ਨੂੰ ਦੇਖ ਨਹੀਂ ਸਕੇ ਅਤੇ ਵਾਹਨ ਆਪਸ ਵਿੱਚ ਟਕਰਾ ਗਏ। ਟੱਕਰ ਇੰਨੀ ਤੇਜ਼ ਸੀ ਕਿ ਵਾਹਨਾਂ ਨੂੰ ਅੱਗ ਲੱਗ ਗਈ। ਸੱਤ ਬੱਸਾਂ ਅਤੇ ਦੋ ਕਾਰਾਂ ਭਿਆਨਕ ਅੱਗ ਦੀ ਲਪੇਟ ਵਿੱਚ ਆ ਗਈਆਂ। ਅੱਗ ਲੱਗਦੇ ਹੀ ਬੱਸਾਂ ਵਿੱਚ ਚੀਕ ਚਿਹਾੜਾ ਮਚ ਗਿਆ। ਅੱਗ ਲੱਗਦੇ ਹੀ ਬੱਸਾਂ ਵਿੱਚ ਚੀਕ ਚਿਹਾੜਾ ਮਚ ਗਿਆ। ਯਾਤਰੀਆਂ ਨੇ ਖਿੜਕੀਆਂ ਤੋਂ ਕਿਸੇ ਤਰ੍ਹਾਂ ਛਾਲ ਮਾਰ ਕੇ ਜਾਨ ਬਚਾਈ, ਜਦੋਂ ਕਿ ਕਈ ਅੰਦਰ ਹੀ ਫਸੇ ਰਹਿ ਗਏ। ਟੱਕਰ ਲੱਗਣ ਨਾਲ ਬੱਸਾਂ ਅਤੇ ਕਾਰਾਂ ਬੁਰੀ ਤਰ੍ਹਾਂ ਨੁਕਸਾਨੀਆਂ ਗਈਆਂ ਹਨ। ਸੂਚਨਾ ਮਿਲਣ ‘ਤੇ ਪਹੁੰਚੇ ਲਗਪਗ ਇੱਕ ਦਰਜਨ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਨੇ ਅੱਗ ‘ਤੇ ਕਾਬੂ ਪਾਇਆ। ਹਾਦਸੇ ਤੋਂ ਬਾਅਦ ਆਗਰਾ ਤੋਂ ਨੋਇਡਾ ਜਾਣ ਵਾਲੀ ਐਕਸਪ੍ਰੈਸਵੇਅ ਦੀ ਲੇਨ ‘ਤੇ ਆਵਾਜਾਈ ਪੂਰੀ ਤਰ੍ਹਾਂ ਠੱਪ ਹੋ ਗਈ। ਕ੍ਰੇਨ ਦੀ ਮਦਦ ਨਾਲ ਵਾਹਨਾਂ ਨੂੰ ਹਟਾ ਕੇ ਪਾਸੇ ਕੀਤਾ ਗਿਆ।

ਅਧਿਕਾਰੀਆਂ ਦਾ ਬਿਆਨ

ਐੱਸਐੱਸਪੀ ਸ਼ਲੋਕ ਕੁਮਾਰ ਨੇ ਦੱਸਿਆ ਕਿ ਚਾਰ ਯਾਤਰੀਆਂ ਦੀ ਸੜ ਕੇ ਮੌਤ ਹੋ ਗਈ ਹੈ। ਵੱਡੀ ਗਿਣਤੀ ਵਿੱਚ ਲੋਕ ਜ਼ਖਮੀ ਹੋ ਗਏ ਹਨ। ਇਨ੍ਹਾਂ ਨੂੰ 20 ਤੋਂ ਵੱਧ ਐਂਬੂਲੈਂਸਾਂ ਰਾਹੀਂ ਹਸਪਤਾਲਾਂ ਵਿੱਚ ਭਰਤੀ ਕਰਵਾਇਆ ਜਾ ਰਿਹਾ ਹੈ। ਮ੍ਰਿਤਕਾਂ ਦੀ ਪਛਾਣ ਅਜੇ ਨਹੀਂ ਹੋ ਸਕੀ ਹੈ।