ਝਾਰਖੰਡ ਆਦੀ ਵਾਸੀ ਹੱਕਾਂ ਅਧਿਕਾਰਾਂ ਦੀ ਆਵਾਜ਼ ਸ਼ਿਬੂ ਸੋਰੇਨ ਸਦਾ ਲਈ ਹੋਈ ਖ਼ਾਮੋਸ਼

ਵਿਵਾਦਾਂ ਚ ਵੀ ਘਿਰੇ ਪਰ ਦਬੇ ਨਹੀਂ, ਆਖਰ ਲੰਮੇ ਸਮੇਂ ਤੋਂ ਸਰੀਰਕ ਰੋਗਾਂ ਦਾ ਸਾਹਮਣਾ ਕਰਦੇ ਹੋਏ ਕਿਹ ਗਏ, ਅਲਵਿਦਾ…!
ਰਾਂਚੀ, 4 ਅਗਸਤ (ਜਸਵਿੰਦਰ ਸਿੰਘ ਸੰਧੂ )- ਝਾਰਖੰਡ ਦੇ ਸਾਬਕਾ ਮੁੱਖ ਮੰਤਰੀ ਅਤੇ ਝਾਰਖੰਡ ਮੁਕਤੀ ਮੋਰਚਾ (JMM) ਦੇ ਸੰਸਥਾਪਕ ਸਰਪ੍ਰਸਤ ਸ਼ਿਬੂ ਸੋਰੇਨ ਅੱਜ 81 ਸਾਲ ਦੀ ਉਮਰ ਵਿੱਚ ਇਸ ਸੰਸਾਰ ਤੋਂ ਵਿਦਾ ਹੋ ਗਏ। ਲੰਬੀ ਬਿਮਾਰੀ ਨਾਲ ਜੂਝਣ ਤੋਂ ਬਾਅਦ, ਉਨ੍ਹਾਂ ਨੂੰ ਸਵੇਰੇ 8:56 ਵਜੇ ਸਰ ਗੰਗਾ ਰਾਮ ਹਸਪਤਾਲ (ਦਿੱਲੀ) ਵਿੱਚ ਮ੍ਰਿਤਕ ਘੋਸ਼ਿਤ ਕੀਤਾ ਗਿਆ। ਉਨ੍ਹਾਂ ਦੇ ਬੇਟੇ ਅਤੇ ਮੌਜੂਦਾ ਮੁੱਖ ਮੰਤਰੀ ਹੇਮੰਤ ਸੋਰੇਨ ਨੇ ਸੋਸ਼ਲ ਮੀਡੀਆ ਰਾਹੀਂ ਇਹ ਦੁਖਦਾਈ ਖ਼ਬਰ ਸਾਂਝੀ ਕਰਦੇ ਹੋਏ ਲਿਖਿਆ: “ਮਾਣਯੋਗ ਗੁਰੂ ਜੀ ਸਾਨੂੰ ਸਦਾ ਲਈ ਛੱਡ ਗਏ ਹਨ। ਅੱਜ ਮੈਂ ਜ਼ੀਰੋ ਹੋ ਗਿਆ ਹਾਂ।”
ਕੌਣ ਸਨ ਸ਼ਿਬੂ ਸੋਰੇਨ?
‘ਗੁਰੂ ਜੀ’ ਦੇ ਨਾਮ ਨਾਲ ਪ੍ਰਸਿੱਧ ਸ਼ਿਬੂ ਸੋਰੇਨ ਸਿਰਫ਼ ਇੱਕ ਨੇਤਾ ਨਹੀਂ ਸਨ, ਬਲਕਿ ਝਾਰਖੰਡ ਰਾਜ ਦੀ ਪਹਿਚਾਣ ਬਣਾਉਣ ਵਾਲੇ ਸੰਘਰਸ਼ ਦੇ ਪ੍ਰਤੀਕ ਸਨ। ਉਨ੍ਹਾਂ ਨੇ ਆਪਣੇ ਰਾਜਨੀਤਿਕ ਕਰੀਅਰ ਦੀ ਸ਼ੁਰੂਆਤ ਆਦਿਵਾਸੀ ਹੱਕਾਂ ਲਈ ਲੜਾਈ ਨਾਲ ਕੀਤੀ ਅਤੇ 1970 ਦੇ ਦਸ਼ਕ ਵਿੱਚ ਝਾਰਖੰਡ ਮੁਕਤੀ ਮੋਰਚਾ ਦੀ ਸਥਾਪਨਾ ਕਰਕੇ ਇੱਕ ਵੱਖਰੇ ਰਾਜ ਦੀ ਮੰਗ ਨੂੰ ਰਾਸ਼ਟਰੀ ਚਰਚਾ ਦਾ ਕੇਂਦਰ ਬਣਾਇਆ।
2000 ਵਿੱਚ ਜਦੋਂ ਝਾਰਖੰਡ ਇੱਕ ਅਲੱਗ ਰਾਜ ਵਜੋਂ ਅਸਤਿਤਵ ਵਿੱਚ ਆਇਆ, ਸੋਰੇਨ ਉਸ ਸੰਘਰਸ਼ ਦੇ ਜੀਵੰਤ ਪ੍ਰਤੀਕ ਬਣ ਚੁੱਕੇ ਸਨ। ਉਹ ਤਿੰਨ ਵਾਰ ਝਾਰਖੰਡ ਦੇ ਮੁੱਖ ਮੰਤਰੀ ਰਹੇ ਅਤੇ ਯੂ.ਪੀ.ਏ. ਸਰਕਾਰ ਵਿੱਚ ਕੋਲਾ ਮੰਤਰੀ ਦੇ ਤੌਰ ‘ਤੇ ਵੀ ਸੇਵਾ ਨਿਭਾਈ।
ਵਿਵਾਦਾਂ ਤੋਂ ਵੀ ਰਿਹਾ ਨਾਤਾ
ਸੋਰੇਨ ਦੀ ਰਾਜਨੀਤਿਕ ਯਾਤਰਾ ਸੰਘਰਸ਼ ਅਤੇ ਸਫਲਤਾਵਾਂ ਨਾਲ ਭਰੀ ਰਹੀ, ਪਰ ਇਸ ਵਿੱਚ ਵਿਵਾਦਾਂ ਦੀ ਛਾਂ ਵੀ ਰਹੀ। ਚਿਰੂਦੀਹ ਕਤਲ ਮਾਮਲੇ ਅਤੇ ਹੋਰ ਦੋਸ਼ਾਂ ਨੇ ਉਨ੍ਹਾਂ ਦੀ ਛਵੀ ‘ਤੇ ਅਸਰ ਪਾਇਆ, ਪਰ ਇਨ੍ਹਾਂ ਦੇ ਬਾਵਜੂਦ ਉਹ ਆਦਿਵਾਸੀ ਅਧਿਕਾਰਾਂ ਦੇ ਸਭ ਤੋਂ ਪ੍ਰਭਾਵਸ਼ਾਲੀ ਚਿਹਰੇ ਬਣੇ ਰਹੇ ।
ਝਾਰਖੰਡ ਅਤੇ ਦੇਸ਼ ਲਈ ਵਿਰਾਸਤ
ਸੋਰੇਨ ਦੀ ਮੌਤ ਨਾਲ ਇੱਕ ਅਜਿਹੀ ਆਵਾਜ਼ ਖ਼ਾਮੋਸ਼ ਹੋ ਗਈ ਹੈ ਜਿਸਨੇ ਖੇਤਾਂ, ਜੰਗਲਾਂ ਅਤੇ ਪਹਾੜਾਂ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਰਾਸ਼ਟਰੀ ਪੱਧਰ ‘ਤੇ ਪਛਾਣ ਦਵਾਈ। ਉਨ੍ਹਾਂ ਦੇ ਯੋਗਦਾਨ ਨੇ ਝਾਰਖੰਡ ਨੂੰ ਸਿਰਫ਼ ਨਕਸ਼ੇ ’ਤੇ ਹੀ ਨਹੀਂ, ਸਗੋਂ ਦੇਸ਼ ਦੀ ਰਾਜਨੀਤਿਕ ਧਾਰਾ ਵਿੱਚ ਵੀ ਮਜ਼ਬੂਤ ਥਾਂ ਦਿਵਾਈ।