ਗੈਂਗਸਟਰਾਂ ਨੂੰ ਕਾਰੋਬਾਰੀ ’ਤੇ ਗੋਲ਼ੀ ਚਲਾਉਣ ਦੇ ਮਿਲੇ ਸੀ 10 ਹਜ਼ਾਰ ਰੁਪਏ, ਜ਼ਖ਼ਮੀ ਹੋਏ ਰੋਹਿਤ ਨੇ ਪੁਲਿਸ ਹਿਰਾਸਤ ’ਚ ਉਗਲੇ ਕਈ ਰਾਜ਼

ਅੰਮ੍ਰਿਤਸਰ, 27 ਫਰਵਰੀ- ਵਿਦੇਸ਼ੀ ਗੈਂਗਸਟਰ ਡੋਨੀ ਬਲ ਦੇ ਨਿਰਦੇਸ਼ਾਂ ’ਤੇ ਅਰਸ਼ ਬੱਗਾ ਨਾਂ ਦਾ ਮੁਲਜ਼ਮ ਮਾਝਾ ਖੇਤਰ ਵਿਚ ਫਿਰੌਤੀ ਵਸੂਲਣ ਅਤੇ ਗੋਲੀਬਾਰੀ ਦੀਆਂ ਘਟਨਾਵਾਂ ਨੂੰ ਅੰਜਾਮ ਦੇ ਰਿਹਾ ਹੈ। ਉਪਰੋਕਤ ਰਾਜ਼ ਮਹਿਤਾ ਵਾਸੀ ਰੋਹਿਤ ਨੇ ਉਗਲਿਆ ਹੈ ਜੋ ਮੁਕਾਬਲੇ ਦੌਰਾਨ ਗੋਲੀ ਲੱਗਣ ਨਾਲ ਜ਼ਖ਼ਮੀ ਹੋ ਗਿਆ ਸੀ। ਐੱਸਐੱਸਪੀ ਮਨਿੰਦਰਜੀਤ ਸਿੰਘ ਨੇ ਦੱਸਿਆ ਕਿ ਅਰਸ਼ ਬੱਗਾ ਅਤੇ ਫਰਾਰ ਜਰਮਨਜੀਤ ਸਿੰਘ ਨੂੰ ਗ੍ਰਿਫ਼ਤਾਰ ਕਰਨ ਲਈ ਛਾਪੇਮਾਰੀ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਨੇ ਦਾਅਵਾ ਕੀਤਾ ਹੈ ਕਿ ਦੋਵਾਂ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਇਸ ਮਾਮਲੇ ਵਿਚ ਕਈ ਰਾਜ਼ ਖੁੱਲ੍ਹਣਗੇ। ਦੂਜੇ ਪਾਸੇ ਰੋਹਿਤ ਨੂੰ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ। ਅਦਾਲਤ ਨੇ ਮੁਲਜ਼ਮ ਨੂੰ ਤਿੰਨ ਦਿਨ ਦੇ ਪੁਲਿਸ ਰਿਮਾਂਡ ’ਤੇ ਭੇਜ ਦਿੱਤਾ ਹੈ। ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਦੋਵੇਂ ਮੁਲਜ਼ਮ ਛੇ ਮਹੀਨਿਆਂ ਤੋਂ ਅਰਸ਼ ਬੱਗਾ ਦੇ ਸੰਪਰਕ ਵਿਚ ਸਨ। ਅਰਸ਼ ਬੱਗਾ ਵਿਦੇਸ਼ ਵਿਚ ਬੈਠੇ ਖ਼ਤਰਨਾਕ ਗੈਂਗਸਟਰ ਡੋਨੀ ਬਲ ਦੇ ਇਸ਼ਾਰੇ ’ਤੇ ਜਬਰੀ ਵਸੂਲੀ ਦੀਆਂ ਵਾਰਦਾਤਾਂ ਕਰਵਾਉਂਦਾ ਸੀ। ਦੋ ਮੁਲਜ਼ਮਾਂ ਰੋਹਿਤ ਅਤੇ ਜਰਮਨਜੀਤ ਸਿੰਘ ਨੂੰ ਕੁਝ ਦਿਨ ਪਹਿਲਾਂ ਮਹਿਤਾ ਖੇਤਰ ’ਚ ਸਪੇਅਰ ਪਾਰਟਸ ਡੀਲਰ ਬਲਦੇਵ ਸਿੰਘ ਅਤੇ ਉਸ ਦੇ ਸਾਥੀ ਨੂੰ ਗੋਲੀ ਮਾਰਨ ਲਈ 10,000 ਰੁਪਏ ਦਿੱਤੇ ਗਏ ਸਨ। ਅਰਸ਼ ਬੱਗਾ ਨੇ ਮੁਲਜ਼ਮਾਂ ਨੂੰ ਕਿਹਾ ਕਿ ਫਿਰੌਤੀ ਦੀ ਵਸੂਲੀ ਦੇ ਪੈਸੇ ਮਿਲਣ ਤੋਂ ਬਾਅਦ ਉਨ੍ਹਾਂ ਨੂੰ ਕੁਝ ਹੋਰ ਪੈਸੇ ਦਿੱਤੇ ਜਾਣਗੇ। ਰੋਹਿਤ ਨੇ ਦੱਸਿਆ ਕਿ ਹੁਣ ਉਸ ਨੂੰ ਅਰਸ਼ ਬੱਗਾ ਤੋਂ ਨਵਾਂ ਆਰਡਰ ਮਿਲਣ ਵਾਲਾ ਸੀ। ਇਹ ਖੁਲਾਸਾ ਹੋਇਆ ਹੈ ਕਿ ਅਰਸ਼ ਰਾਹੀਂ ਹੀ ਡੋਨੀ ਬਲ ਨੂੰ ਇੱਥੋਂ ਦੇ ਕਾਰੋਬਾਰੀਆਂ ਦੇ ਨਾਂ ਅਤੇ ਮੋਬਾਈਲ ਨੰਬਰ ਪਤਾ ਲੱਗਦੇ ਹਨ। ਜ਼ਿਕਰਯੋਗ ਹੈ ਕਿ ਪੁਲਿਸ ਨੇ ਰੋਹਿਤ ਅਤੇ ਉਸ ਦੇ ਸਾਥੀ ਜਰਮਨਜੀਤ ਸਿੰਘ ਨੂੰ ਗ੍ਰਿਫ਼ਤਾਰ ਕਰਨ ਲਈ ਛਾਪੇਮਾਰੀ ਕੀਤੀ ਸੀ। ਰੋਹਿਤ ਨੂੰ ਪੁਲਿਸ ਨੇ ਫੜ ਲਿਆ, ਪਰ ਜਰਮਨਜੀਤ ਬਚ ਗਿਆ। ਮੰਗਲਵਾਰ ਸ਼ਾਮ ਨੂੰ ਪੁਲਿਸ ਰੋਹਿਤ ਨੂੰ ਮਿੱਟੀ ਵਿਚ ਲੁਕੋਇਆ ਪਿਸਤੌਲ ਬਰਾਮਦ ਕਰਨ ਲਈ ਇਕ ਖਾਲੀ ਥਾਂ ’ਤੇ ਲੈ ਗਈ। ਮੌਕਾ ਮਿਲਦੇ ਹੀ ਰੋਹਿਤ ਨੇ ਜਿਵੇਂ ਪਿਸਤੌਲ ਕੱਢੀ ਅਤੇ ਪੁਲਿਸ ਪਾਰਟੀ ’ਤੇ ਗੋਲੀ ਚਲਾ ਦਿੱਤੀ। ਜਵਾਬੀ ਗੋਲੀਬਾਰੀ ਵਿਚ ਪੁਲਿਸ ਨੇ ਰੋਹਿਤ ਦੀ ਲੱਤ ਵਿਚ ਗੋਲੀ ਮਾਰ ਦਿੱਤੀ, ਜਿਸ ਨਾਲ ਉਹ ਜ਼ਖਮੀ ਹੋ ਗਿਆ।