ਖੰਨਾ-ਜੋੜੇਪੁਲ ਨਹਿਰ ਚੋਂ ਮਿਲੀ ਕਾਰ, ਚਾਰ ਨੌਜਵਾਨਾਂ ਦੀਆਂ ਲਾਸ਼ਾਂ ਬਰਾਮਦ

ਖੰਨਾ, 13 ਮਈ- ਖੰਨਾ-ਮਲੇਰਕੋਟਲਾ ਦੀ ਹੱਦ ਉਪਰ ਜੋੜੇਪੁਲ ਨੇੜਲੇ ਇਲਾਕੇ ਵਿੱਚ ਸੋਮਵਾਰ ਦੀ ਸਵੇਰੇ ਭਿਆਨਕ ਹਾਦਸੇ ਦੀ ਅਸਲੀਅਤ ਸਾਹਮਣੇ ਆਈ ਜਦੋਂ ਜੋੜੇਪੁਲ ਨਹਿਰ ਵਿੱਚੋਂ ਇਕ ਕਾਰ ਨੂੰ ਗੋਤਾਖੋਰਾਂ ਨੇ ਬਾਹਰ ਕੱਢਿਆ। ਇਹ ਉਹੀ ਕਾਰ ਸੀ ਜਿਸ ਵਿੱਚ 10 ਮਈ ਦੀ ਰਾਤ ਤੋਂ ਚਾਰ ਨੌਜਵਾਨ ਲਾਪਤਾ ਹੋ ਗਏ ਸਨ। ਕਾਰ ਦੇ ਮਿਲਣ ਨਾਲ ਹੀ ਇਹ ਗੁੱਥੀ ਹੱਲ ਹੋ ਗਈ ਕਿ ਉਹ ਨੌਜਵਾਨ ਕਿੱਥੇ ਗਾਇਬ ਹੋਏ ਸਨ – ਦੁਖਦਾਈ ਗੱਲ ਇਹ ਰਹੀ ਕਿ ਚਾਰਾਂ ਦੀ ਲਾਸ਼ਾਂ ਵੀ ਕਾਰ ’ਚੋਂ ਮਿਲੀਆਂ। ਮ੍ਰਿਤਕਾਂ ਦੀ ਪਛਾਣ ਜਤਿੰਦਰ ਕੁਮਾਰ (ਉਮਰ 50, ਨਿਵਾਸੀ ਜੈਪੁਰ), ਗੋਪਾਲ ਕ੍ਰਿਸ਼ਨ (28, ਜੈਪੁਰ), ਸੁਜਾਨ ਮਲਿਕ (22, ਹਿਮਾਚਲ ਪ੍ਰਦੇਸ਼) ਅਤੇ ਗਗਨ (ਭਵਾਨੀਗੜ੍ਹ) ਵਜੋਂ ਹੋਈ ਹੈ। ਇਹ ਸਾਰੇ ਨੌਜਵਾਨ ਧੂਰੀ ਰੋਡ ਨੇੜਲੇ ਪਿੰਡ ਸਾਂਗਲਾ ਵਿਚ ਸਥਿਤ ਭਾਰਤ ਆਟੋ ਕਾਰ ਏਜੰਸੀ ਵਿੱਚ ਕੰਮ ਕਰਦੇ ਸਨ। ਮ੍ਰਿਤਕਾਂ ਵਿੱਚ ਇੱਕ ਮੈਨੇਜਰ, ਇੱਕ ਸਟੋਰਕੀਪਰ ਅਤੇ ਦੋ ਹੋਰ ਕਰਮਚਾਰੀ ਸ਼ਾਮਲ ਸਨ। ਇਹ ਨੌਜਵਾਨ ਬਲੈਕਆਊਟ ਦੌਰਾਨ ਬਿਨਾਂ ਕਿਸੇ ਨੂੰ ਦੱਸੇ ਹਰਿਦੁਆਰ ਜਾਣ ਲਈ ਨਿਕਲੇ ਸਨ। ਜਿਵੇਂ ਹੀ ਪਰਿਵਾਰਾਂ ਨੇ ਸੰਪਰਕ ਨਾ ਹੋਣ ਦੀ ਜਾਣਕਾਰੀ ਦਿੱਤੀ, ਉਨ੍ਹਾਂ ਨੇ ਪੁਲਿਸ ਨਾਲ ਸੰਪਰਕ ਕੀਤਾ। ਮੋਬਾਈਲ ਦੀ ਆਖਰੀ ਲੋਕੇਸ਼ਨ ਜੋੜੇਪੁਲ ਨਿਹਰ ਦੇ ਨੇੜੇ ਮਿਲੀ, ਜਿਸ ਦੇ ਆਧਾਰ ’ਤੇ ਨਿਹਰ ਵਿੱਚ ਤਲਾਸ਼ੀ ਸ਼ੁਰੂ ਕੀਤੀ ਗਈ। ਗੋਤਾਖੋਰਾਂ ਨੇ ਕਈ ਦਿਨਾਂ ਦੀ ਜਦੋ-ਜਹਦ ਤੋਂ ਬਾਅਦ ਅੱਜ ਨਿਹਰ ਵਿੱਚੋਂ ਕਾਰ ਨੂੰ ਬਾਹਰ ਕੱਢਿਆ। ਪੁਲਿਸ ਚੌਕੀ ਇੰਚਾਰਜ ਹਰਜਿੰਦਰ ਸਿੰਘ ਮੌਕੇ ’ਤੇ ਪਹੁੰਚੇ ਅਤੇ ਉਨ੍ਹਾਂ ਨੇ ਪੁਸ਼ਟੀ ਕੀਤੀ ਕਿ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਮਲੇਰਕੋਟਲਾ ਭੇਜ ਦਿੱਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਪਰਿਵਾਰਕ ਬਿਆਨਾਂ ਅਤੇ ਪੋਸਟਮਾਰਟਮ ਰਿਪੋਰਟ ਦੇ ਆਧਾਰ ‘ਤੇ ਹੀ ਅਗਲੀ ਕਾਨੂੰਨੀ ਕਾਰਵਾਈ ਹੋਵੇਗੀ। ਭਾਰਤ ਆਟੋ ਏਜੰਸੀ ਦੇ ਮਾਲਕ ਨੇ ਦੱਸਿਆ ਕਿ ਇਹ ਚਾਰੇ ਕਰਮਚਾਰੀ ਇਕੱਠੇ ਬਿਨਾਂ ਕਿਸੇ ਨੋਟਿਸ ਦੇ ਰਾਤ ਨੂੰ ਗਏ, ਅਤੇ ਗੇਟਕੀਪਰ ਨੇ ਇਸ ਬਾਰੇ ਦੱਸਿਆ। ਕਈ ਕੋਸ਼ਿਸ਼ਾਂ ਬਾਵਜੂਦ ਸੰਪਰਕ ਨਹੀਂ ਬਣ ਸਕਿਆ, ਜਿਸ ਤੋਂ ਬਾਅਦ ਗੰਭੀਰਤਾ ਨਾਲ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਗਈ। ਜਿਵੇਂ ਹੀ ਕਾਰ ਮਿਲਣ ਦੀ ਖ਼ਬਰ ਆਈ, ਸਾਰੇ ਕਰਮਚਾਰੀ ਅਤੇ ਪਰਿਵਾਰਕ ਮੈਂਬਰ ਮੌਕੇ ’ਤੇ ਪਹੁੰਚ ਗਏ। ਇਸ ਹਾਦਸੇ ਨੇ ਨਾ ਸਿਰਫ਼ ਚਾਰ ਪਰਿਵਾਰਾਂ ਦੀਆਂ ਖੁਸ਼ੀਆਂ ਖੋਹ ਲਈਆਂ ਹਨ, ਬਲਕਿ ਇਹ ਰਾਤੀ ਸਫ਼ਰ, ਬਿਨਾਂ ਸੁਰੱਖਿਆ ਦੀ ਯਾਤਰਾ ਅਤੇ ਸੜਕਾਂ ਦੀ ਹਾਲਤ ’ਤੇ ਵੀ ਗੰਭੀਰ ਸਵਾਲ ਖੜ੍ਹੇ ਕਰਦਾ ਹੈ। ਹਾਲਾਂਕਿ ਇਹ ਹਾਲੇ ਸਪੱਸ਼ਟ ਨਹੀਂ ਹੋਇਆ ਕਿ ਕਾਰ ਕਿਵੇਂ ਨਿਹਰ ’ਚ ਡਿੱਗੀ – ਕੀ ਇਹ ਹਾਦਸਾ ਸੀ ਜਾਂ ਕਿਸੇ ਤਕਨੀਕੀ ਖ਼ਾਮੀ ਕਾਰਨ ਵਾਪਰਿਆ।