ਨਵੀਂ ਦਿੱਲੀ, 16 ਜੁਲਾਈ : ਕੇਰਲ ਦੀ ਨਰਸ ਨਿਮਿਸ਼ਾ ਪ੍ਰਿਆ ਦੀ ਮੌਤ ਦੀ ਸਜ਼ਾ ਮੁਲਤਵੀ ਕਰ ਦਿੱਤੀ ਗਈ ਹੈ। ਇਹ ਭਾਰਤ ਅਤੇ ਯਮਨ ਦੇ ਧਾਰਮਿਕ ਆਗੂਆਂ ਦੇ ਦਖਲ ਤੋਂ ਬਾਅਦ ਸੰਭਵ ਹੋਇਆ ਹੈ। ਇਸ ਸਜ਼ਾ ਨੂੰ ਰੋਕਣ ਲਈ, ਭਾਰਤ ਦੇ ਗ੍ਰੈਂਡ ਮੁਫਤੀ ਸ਼ੇਖ ਅਬੂਬਕਰ ਅਹਿਮਦ ਨੇ ਯਮਨ ਦੇ ਮਸ਼ਹੂਰ ਵਿਦਵਾਨ ਸ਼ੇਖ ਉਮਰ ਬਿਨ ਹਾਫਿਜ਼ ਤੋਂ ਮਦਦ ਮੰਗੀ ਸੀ। ਇਸ ਤੋਂ ਬਾਅਦ ਸ਼ੇਖ ਉਮਰ ਨੇ ਆਪਣੇ ਚੇਲਿਆਂ ਨੂੰ ਤਲਾਲ ਦੇ ਪਰਿਵਾਰ ਨਾਲ ਗੱਲ ਕਰਨ ਲਈ ਭੇਜਿਆ। ਕਈ ਦੌਰ ਦੀ ਗੱਲਬਾਤ ਤੋਂ ਬਾਅਦ, ਤਲਾਲ ਦੇ ਪਰਿਵਾਰ ਨੇ ਮੌਤ ਦੀ ਸਜ਼ਾ ਨੂੰ ਮੁਲਤਵੀ ਕਰਨ ‘ਤੇ ਸਹਿਮਤੀ ਜਤਾਈ। ਇਸ ਗੱਲਬਾਤ ਵਿੱਚ ਸਭ ਤੋਂ ਮਹੱਤਵਪੂਰਨ ਗੱਲ ਯਮਨੀ ਪਰਿਵਾਰ ਅਤੇ ਸ਼ੇਖ ਉਮਰ ਦਾ ਸੁੰਨੀ ਧਰਮ ਨਾਲ ਸਬੰਧਤ ਹੋਣਾ ਸੀ। ਯਮਨ ਦੀ ਰਾਜਧਾਨੀ ਸਨਾ ‘ਤੇ ਹੂਤੀ ਬਾਗੀਆਂ ਦਾ ਕਬਜ਼ਾ ਹੈ ਪਰ ਸ਼ੇਖ ਉਮਰ ਦੇ ਪ੍ਰਭਾਵ ਕਾਰਨ ਮੌਤ ਦੀ ਸਜ਼ਾ ਮੁਲਤਵੀ ਕਰ ਦਿੱਤੀ ਗਈ। ਭਾਰਤ ਦੇ ਵਿਦੇਸ਼ ਮੰਤਰਾਲੇ ਦੇ ਅਧਿਕਾਰੀਆਂ ਨੇ ਕਿਹਾ ਕਿ ਇਹ ‘ਚੁੱਪ ਅਤੇ ਨਿਰੰਤਰ’ ਯਤਨਾਂ ਦਾ ਨਤੀਜਾ ਸੀ। ਯਮਨ ਮਾਮਲਿਆਂ ਨੂੰ ਸੰਭਾਲਣ ਵਾਲੇ ਸਾਊਦੀ ਦੂਤਾਵਾਸ ਦੇ ਇੱਕ ਅਧਿਕਾਰੀ ਨੇ ਮਹੀਨਿਆਂ ਤੱਕ ਯਮਨ ਸਰਕਾਰ ਨਾਲ ਗੱਲ ਕੀਤੀ। ਇਜ਼ਰਾਈਲ-ਈਰਾਨ ਤਣਾਅ ਕਾਰਨ ਇੱਕ ਅਸਥਾਈ ਰੁਕਾਵਟ ਆਈ, ਪਰ ਜਦੋਂ ਸਥਿਤੀ ਸੁਧਰੀ ਤਾਂ ਕੋਸ਼ਿਸ਼ਾਂ ਦੁਬਾਰਾ ਸ਼ੁਰੂ ਹੋ ਗਈਆਂ।
ਬਲੱਡ ਮਨੀ ਦੇਣ ਦੀਆਂ ਕਈ ਕੋਸ਼ਿਸ਼ਾਂ ਹੋ ਗਈਆਂ ਅਸਫ਼ਲ
ਭਾਰਤ ਨੇ ਤਲਾਲ ਦੇ ਪਰਿਵਾਰ ਨੂੰ ਬਲੱਡ ਮਨੀ ਵਜੋਂ ਵੱਡੀ ਰਕਮ ਦੀ ਪੇਸ਼ਕਸ਼ ਕੀਤੀ। ਇੱਕ ਅਧਿਕਾਰੀ ਨੇ ਕਿਹਾ, “ਜੇ ਬਲੱਡ ਮਨੀ 2 ਕਰੋੜ ਰੁਪਏ ਹੈ ਤਾਂ ਅਸੀਂ 20 ਕਰੋੜ ਰੁਪਏ ਦੇਣ ਦੀ ਪੇਸ਼ਕਸ਼ ਕੀਤੀ ਪਰ ਪਰਿਵਾਰ ਫਿਰ ਵੀ ਸਹਿਮਤ ਨਹੀਂ ਹੋਇਆ।” ਇਸ ਵੇਲੇ ਫਾਂਸੀ ਸਿਰਫ਼ ਮੁਲਤਵੀ ਕੀਤੀ ਗਈ ਹੈ, ਕੋਈ ਮਾਫ਼ੀ ਨਹੀਂ ਹੋਈ ਹੈ। ਗੱਲਬਾਤ ਚੱਲ ਰਹੀ ਹੈ ਤਾਂ ਜੋ ਨਿਮਿਸ਼ਾ ਦੀ ਸਜ਼ਾ ਨੂੰ ਬਲੱਡ ਮਨੀ ਜਾਂ ਕਾਨੂੰਨੀ ਤਰੀਕਿਆਂ ਨਾਲ ਮਾਫ਼ ਕੀਤਾ ਜਾ ਸਕੇ।ਭਾਰਤ ਨੇ ਨਾ ਸਿਰਫ਼ ਰਾਜਨੀਤਿਕ ਸਗੋਂ ਧਾਰਮਿਕ ਤਰੀਕਿਆਂ ਨਾਲ ਵੀ ਨਿਮਿਸ਼ਾ ਨੂੰ ਬਚਾਉਣ ਦੀ ਕੋਸ਼ਿਸ਼ ਕੀਤੀ। ਡਿਪਟੀ ਮੁਫ਼ਤੀ ਹੁਸੈਨ ਸਾਕਾਫੀ ਨੇ ਕਿਹਾ ਕਿ ਭਾਰਤ ਸਰਕਾਰ ਨੇ ਸੁਪਰੀਮ ਕੋਰਟ ਵਿੱਚ ਨਿਮਿਸ਼ਾ ਨੂੰ ਬਚਾਉਣ ਵਿੱਚ ਆਪਣੀ ਬੇਵਸੀ ਜ਼ਾਹਰ ਕੀਤੀ ਸੀ। ਇਸ ਤੋਂ ਬਾਅਦ ਕੇਰਲ ਦੇ ਕੁਝ ਨੇਤਾਵਾਂ ਨੇ ਮੁਫ਼ਤੀ ਸਾਹਿਬ ਨੂੰ ਯਮਨੀ ਵਿਦਵਾਨ ਨਾਲ ਗੱਲ ਕਰਨ ਦੀ ਬੇਨਤੀ ਕੀਤੀ ਕਿਉਂਕਿ ਦੋਵਾਂ ਵਿਚਕਾਰ ਚੰਗੇ ਸਬੰਧ ਸਨ। ਵਿਦੇਸ਼ ਮੰਤਰਾਲੇ ਦੇ ਸੂਤਰਾਂ ਨੇ ਕਿਹਾ, “ਕੀ ਇੱਕ ਫੋਨ ਕਾਲ ਫਾਂਸੀ ਨੂੰ ਰੋਕ ਸਕਦੀ ਹੈ? ਇਹ ਮਹੀਨਿਆਂ ਦੀ ਮਿਹਨਤ ਦਾ ਨਤੀਜਾ ਹੈ।
ਨਿਮਿਸ਼ਾ ਨੂੰ ਕਿਉਂ ਸੁਣਾਈ ਗਈ ਮੌਤ ਦੀ ਸਜ਼ਾ?ਨਿਮਿਸ਼ਾ ਪ੍ਰਿਆ 2008 ਵਿੱਚ ਬਿਹਤਰ ਕਮਾਈ ਲਈ ਯਮਨ ਗਈ ਸੀ। ਪਹਿਲਾਂ ਉਹ ਹਸਪਤਾਲਾਂ ਵਿੱਚ ਕੰਮ ਕਰਦੀ ਸੀ, ਫਿਰ ਉਸ ਨੇ ਆਪਣਾ ਕਲੀਨਿਕ ਖੋਲ੍ਹਿਆ। ਯਮਨ ਦੇ ਕਾਨੂੰਨ ਅਨੁਸਾਰ, ਉਸ ਨੂੰ ਇੱਕ ਸਥਾਨਕ ਸਾਥੀ ਤਲਾਲ ਅਬਦੁਲ ਮੇਹਦੀ ਨੂੰ ਲੈਣਾ ਪੈਂਦਾ ਸੀ ਪਰ ਤਲਾਲ ਨੇ ਉਸ ਦੇ ਪੈਸੇ ਅਤੇ ਪਾਸਪੋਰਟ ਚੋਰੀ ਕਰ ਲਿਆ ਅਤੇ ਉਸ ਨੂੰ ਤੰਗ ਕਰਨਾ ਸ਼ੁਰੂ ਕਰ ਦਿੱਤਾ। 2017 ਵਿੱਚ ਨਿਮਿਸ਼ਾ ਨੇ ਤਲਾਲ ਨੂੰ ਬੇਹੋਸ਼ ਕਰਨ ਲਈ ਸੈਡੇਟਿਵ ਦਿੱਤਾ ਤਾਂ ਜੋ ਉਹ ਆਪਣਾ ਪਾਸਪੋਰਟ ਵਾਪਸ ਲੈ ਸਕੇ ਪਰ ਤਲਾਲ ਦੀ ਮੌਤ ਹੋ ਗਈ। ਨਿਮਿਸ਼ਾ ਨੂੰ ਯਮਨ ਤੋਂ ਭੱਜਣ ਦੀ ਕੋਸ਼ਿਸ਼ ਕਰਦੇ ਹੋਏ ਗ੍ਰਿਫ਼ਤਾਰ ਕਰ ਲਿਆ ਗਿਆ।
URL Copied
